帶隊慘成「遊戲黑洞」 錢嘉樂遭報復式掉Cream變「行走雪人」

獎門人話等咗20幾年，終於可以掉Cream落錢嘉樂身上。

逢周日晚8 點半翡翠台播映的《開心無敵獎門人》12月11日晚播出一集兩大獎老錢嘉樂和阮兆祥（祥仔）將親自落場玩，並分別率領嘉賓「不可能任務隊」張振朗、戴祖儀、孔德賢、何慈茵及劉展霆（Eden），及「歌星隊」商天娥（娥姐）、王梓軒、范振鋒、黃翊及Judas Law（羅凱鈴）。

今集嘉賓是「不可能任務隊」VS「歌星隊」。

「不可能任務隊」成員有（右起）劉展霆、張振朗、戴祖儀、孔德賢及何慈茵。

歌星隊」成員有（右起）王梓軒、范振鋒、商天娥、黃翊及Judas Law。

是集嘉樂帶隊的「不可能任務隊」瘋狂輸Game成為「遊戲黑洞」，當中最大的「老鼠屎」非張振朗和戴祖儀莫屬，事關這對「呆萌二人組」不但傻更更、還運氣欠奉。二人甫開場玩「開心無敵估嘢食」經已累鬥累，先是戴祖儀不停盲舂舂撞枱「覓食」，搞到獎門人都睇唔過眼「專人服侍」餵到她嘴邊，未料戴祖儀忽然詞窮，竟以「發」和「逢」演繹該款食品，搞到張振朗黑人問號兼大呻：「點估呀大佬！」殊不知「有口話人」張振朗，輪到自己落場「盲食」時不單止口窒窒，更要問旁人攞貼士，認真失威。

戴祖儀「覓食」期間不停撞枱，結果要獎門人出手餵食。

張振朗埋怨完戴祖儀是旦噏，點知佢自己連食品名幾多隻字都講唔出，好過份。

接著「辣辣壽桃邊個食」環節，張振朗一開始便連輸三回合，幸有嘉樂捱義氣幫手啃「重料Wasabi壽桃」。未知是否受張振朗「黑氣」影響，嘉樂與祥仔進行表演賽期間，前者不論玩「口不對心我最勁」或是「你妹妹搬咗去大埔墟（正鏡杯獎門人版）」都鋪鋪輸；見嘉樂傾盡全力挑戰「伸脷版」正鏡杯兼不顧形象玩到面容扭曲，在旁觀戰的娥姐都忍不住笑到標晒眼水！

喺「辣辣壽桃邊個食」環節，張振朗（左）一玩就輸，削！

錢嘉樂（後左）幫手啃Wasabi壽桃，大師兄好嘢！

有難同當，呢組好有Team spirit。

錢嘉樂（左）同阮兆祥落力玩，呢個畫面令人諗起電影《唐伯虎點秋香》中的兄弟「華文、華武」。

娥姐睇到錢嘉樂個伸脷即刻笑到標晒眼水！

傻大姐戴祖儀連玩「口不對心我最勁」都窒窒吓，好搞笑。

正所謂「輸人唔輸陣」，之後張振朗和孔德賢齊齊換上Man爆「晒臂Look」迎戰「開心無敵開口中」。繼續「穩輸」的嘉樂爆波後慘遭大家「報復式」掉Cream，連獎門人也忍不住掉埋一份兼打趣道：「我等咗廿幾年喇！」成身Cream的嘉樂頓變「行走雪人」，全場爆笑。到「開口中」尾聲，現場陷入一片混亂，皆因「衰收尾」的戴祖儀遭自己友孔德賢以「厚Cream」無情招呼，獎門人見狀即下「全Team懲罰」令，不單止「不可能任務隊」個個中Cream，更波及程浩駿及林秀怡。

張振朗同孔德賢換上背心大晒麒麟臂。

張振朗同孔德賢換上背心大晒麒麟臂。

錢嘉樂「開口中」爆波。

大家即刻Get ready掉Cream。

獎門人話等咗廿幾年，終於可以掉Cream落錢嘉樂身上。

戴祖儀未輸已經畀人整到一身Cream。

戴祖儀爆波，Teammate孔德賢秒速請佢歎「厚Cream」，真係好有義氣囉。

「不可能任務隊」全軍覆沒，（左二起）錢嘉樂、孔德賢和戴祖儀變晒「行走雪人」。

程浩駿（中）同林秀怡都遭殃。

程浩駿同林秀怡（左）都遭殃。

最後一班嘉賓齊齊趁「開心無敵彈遮遮」環節沖身，當問到關於香港地方名的題目時，一頭Cream的張振朗爆笑搶答：「我想洗頭！」語畢便揀了其中一個無厘頭答案「花From home」，並隨即上演「淋浴Show」，乾淨晒～

一班嘉賓喺「開心無敵彈遮遮」環節乘機沖身。

張振朗（左）故意答錯，仲喺現場上演「淋浴Live Show」。

難得落場玩，錢嘉樂（右）同阮兆祥都好開心。

呢個畫面……兩Pair都好Sweet。

歷代「獎老」Reunion ！

清談節目《MORAZ天然草本驅蚊靈呈獻：Mayanne小喇叭》由麥美恩（Mayanne）擔任主持，曾展望（GM）擔任助理主持，本周四及五晚10點半翡翠台播映最後兩集。

Super~~

由於蘭茜講嘢相對正經，即刻激發咗嘉樂嘅「口賤」神經。

「大師兄」原來係暗藏特別任務架。

林曉峰初初做第一輯時直認好驚獎門人。

林曉峰笑言首度與獎門人會面時，排場似足電影《無間道》韓琛食飯經典場口。

今晚（18日）一集，兼任《獎門人》現任獎老的Mayanne，邀得四位獎老界前輩林曉峰、錢嘉樂、蘭茜及阮兆祥（按加入年期順序）擔任嘉賓，大談參與《獎門人》拍攝的喜與樂。四人之中，雖然嘉樂被專稱「大師兄」，但原來第一代獎老竟是林曉峰（阿Lo）及陳小春，阿Lo大爆當年嘉樂之所以被「獎門人」曾志偉睇中接小春棒，全因「把口夠賤」；嘉樂憶述當年接到獎門人邀約電話時相當意外，並笑言全靠獎門人自己的口賤才能才得以跳出武師界。談到獎門人當年為何睇中阿Lo，原因竟和張國榮和一條鞋帶有關，阿Lo說：「嗰時拍《金枝玉葉》，有一場戲講張國榮先生上樓梯，我做助手跟住後面，當時佢唔知左腳定右腳甩咗鞋帶。拍完嗰場後我哋放Break，返到嚟個甩嘅鞋帶就調轉咗喺另一隻腳。當時導演嗌完Roll機後，我就嗌『咪住，好似唔連戲喎』，大家咪即刻睇番錄影帶：『係喎』。嗰日原來獎門人都喺現場，佢心諗原來呢條𡃁仔都幾上心，就搵佢嚟做嘢啦。」至於蘭茜擔任獎老的原因，則與玩獎門人遊戲時全情投入「刨西瓜」及「刨粟米」有關。祥仔則暢談當年如何與志偉、洪天明及鄧兆尊夾計，以各人的腳毛及腋窩毛整蠱遲入組的姚樂怡，最後遭樂怡喊打喊殺，十分搞笑。

估唔到一條鞋帶咁細微嘅嘢，都會畀阿Lo留意到，再畀志偉發現到阿Lo細心嘅一面，足證志偉係幾咁積極同樂意提攜後輩。

錢嘉樂透露未做《獎門人》之前，自己其實算是寡言的人。

蘭茜回想當年玩遊戲時係幾咁投入。

嘉樂大嘆遊戲節目幕後唔易做。

麥美恩都好記得當年姚樂怡係點樣被整蠱，仲大嘆「童年被污染」。

阿Lo仲搞笑大談自己如何成為「公司殺手」。

阿Lo同「大師兄」齊齊回味當年一起創作的「嘉賓名字歌」，仲扮番當年獎門人點把關。

阿Lo重演當年點樣馬拉松式開會開到靈魂出竅。

嘉樂講嘢時係咁向上望，當時阿Lo已懷疑獎門人會唔會已經喺現場。

四人還大談當年錄影《獎門人》的「宵夜度橋日常」，當年因為電視台大戰，《獎門人》最高峯一星期連播五晚，阿Lo大方分享了當年的度橋及上班流程日常：「下午三點返嚟開會，一路開到八點五十分。當年我哋就諗咗改歌詞唱啲嘉賓名出嚟，咁每日揸車就要度18隻歌，每個嘉賓要有3隻，返到去獎門人就會坐喺度問邊隻好笑。然後度度度度到食飯，其實係食唔落架喎。有時做到一點鐘左右收廠，但未完架，喺化妝間再開會，開到三點度，跟住就宵夜架喇，然後再搵地方。記得有一次打風，我哋搵到地方時已天光，成六點幾七點。」

阿Lo嘉樂鬥扮獎門人。

阿Lo嘉樂鬥扮獎門人。

獎門人踩場！

全集最驚喜部分，是當眾人輪流模仿獎門人時，頑皮的志偉即手持小喇叭走入廠送驚喜，令當時除掉雙鞋跪地扮緊志偉的嘉樂大嗌驚驚。志偉一到埗即扮作氣沖沖搞笑謂：「幾多人打電話畀我呀，問：『你仲唔落去？佢哋踩到你一文不值呀！』」之後眾人瘋狂互窒，混亂間曾展望竟大叫志偉「Daddy」，隨即惹起哄動，志偉反應極快接招謂：「出得街架咩？你話畀大家聽媽咪係邊個？！」並親解為何被專稱「阿爸」，志偉說：「阿爸負責畀錢（埋單）架嘛，咁咪叫阿爸咯。」蘭茜聞言即指志偉另一外號是「埋單俠」。另志偉又會親解《獎門人》換主題曲之謎，答案更相當有愛，並與小朋友有莫大關係，欲知詳情？密切留意節目。

獎門人嚟咗氣氛即時升溫。

曾展望叫Daddy，嚇到志偉即刻望錶，現場陷入一片喧鬧。