唔知點解，膠仔身邊朋友經常出事。發生得最多嘅係「阿邊個又同人散咗」，之後「阿邊個」就會去歡場惹埋一班狂風浪蝶，最後麻煩到其他朋友。
一個人失戀、空虛寂寞，個心梗係郁郁去買春或者試下一夜情，我明喎，不過咁樣係咪真係高興先？其實真係唔會。美國都有研究指出，濫交只會令人更加唔開心；建立穩定人際關係，先係治療情傷嘅最佳方式。
美國丹佛大學心理學教授Wyndol Furman喺《Emerging Adulthood》期刊發表研究結果，劈頭就批評「現今19至22歲男女勾搭情況好普遍」，40%男性同埋31%女性過去一年都曾經發生過非戀愛性行為，對象包括朋友、點頭之交、有利益關係者甚至陌生人。
研究結果表示，愈習慣濫交嘅人，生活滿意度評分愈低，日子幾乎可以用個「爛」字嚟概括。一個人若有濫交傾向，思想同埋處事手法非常消極，好容易就有負面諗法，包括自殺、自殘、隱閉等。有穩定戀人嘅生活就高興得多，工作表現較好，俾人感覺亦會較「陽光」。
Wyndol Furman認為，有穩定伴侶嘅人較有安全感同埋親密感，所以內心較易滿足，反而濫交激情過後，其實內心唔會有任何歡愉，特別係對象並不處於舒適圈時，反彈更加大。愈墮落，並不會愈快樂。
研究報告呢度睇：
http://eax.sagepub.com/content/4/2/71.abstract
神州快訊
** 博客文章文責自負,不代表本公司立場 **
有時一個擁抱或者搭搭膀頭，不需一句話就能鼓勵人心。大家又知唔知，原來有啲人因為疾病，天生就唔能夠與人接觸，無法感受他人掌心傳嚟嘅溫暖呢？美國幾十年前有個著名「泡泡人」，因為身患奇症，免疲系統完全失效，自出生開始就要活在一個特製泡泡內。直到佢臨死前一刻，父母先可以首次撫摸自己親生仔。
David Vetter喺1971年9月出世，一落地就俾人安放喺個無菌泡泡內，因為佢患有「嚴重複合性免疫缺陷症」，任何細菌都有能力殺死佢。本來家人期望姐姐捐獻骨髓可以幫佢重新建立免疫系統，但醫生檢查發現兩者血型無法配對，意味佢終生要同外界隔離。
美國太空總署為咗研究呢個怪病，全力協助David Vetter建立無菌環境。除咗「泡泡衫」，仲打造咗間「泡泡屋」，內裏物品全部經過無菌處理。佢會喺屋內學習、睇電視、玩玩具，可惜永遠只能自己一個人生活。望出窗外見到其他人可以一齊玩、吵吵鬧鬧時，小朋友難免感到不快。
就喺佢12歲時，幾名波士頓科學家話研究到新方法令姐姐骨髓安全移植到佢身上。無奈手術結束幾日後，David Vetter開始嘔吐，無幾耐陷入昏迷，幾小時後證實不治。直到佢去世前一刻，父母先可以摸一下自己寶貝仔。阿仔輕輕一笑，首次感到別人體溫後就離開人世。
好多人都責怪科學家安排佢接受骨髓移植，但係驗屍報告就表明，佢係死於姐姐骨髓一種病毒，誘發身體出現一種罕見癌症。呢位「泡泡人」嘅個案，為研究員提供唔少資料，如今超過九成嚴重複合性免疫缺陷症患者都可以成功康復。
