維基放棄順嫂吧啦!

魔童王維基放慢搞港視單嘢，真係愈講愈亂，佢同通訊局拗嚟拗去，一般市民唔易聽得明，但佢昨日話「通訊局無講任何制式用得」呢一個重大指控，今日就被通訊局技術性擊到，通訊局話1月24日同港視開會已講明，可用中移動用開的制式或歐洲和美國的指定制式，仲有會議紀錄為證。其後維基哥的反駁，就唔係咁有力啦。

維基哥雖然辯論好叻，但佢今日連番強辯，就令人有一個感覺，佢咁樣講得就講，屈咗班搞技術的公務員。過去坊間一直有一個信念，話只是特首CY不想發電視牌俾王維基，公務員其實唔係咁睇。無論呢個講法係真唔係，但經此一役，通訊局的官員顯然覺得維基哥老屈佢地，搞到佢地慶到飛起，你睇通訊局官員出來個面口有幾黑就知。港視以後再和通訊局打交道時，官員肯定會揸到正一正嚟做，所以維基哥賣弄辯材的代價唔細也。

睇番成件事，維基哥好有「一路喊打喊殺，一路搵路退場」的味道，似乎真係怕搞落去唔掂，所以只是佯攻撤退。若然係咁，我估好多人都接受唔到，因為大家都想佢開台，想電視觀眾有多一個選擇，唔係想佢撤退。

正如我昨日所講，只要佢用足中移動做流動電視的CMMB制式(或者用通訊局建議的歐洲、美國制式)，唔係用佢想用、有強大輸出的DTMB制式，只是將訊號發去手機上，我睇唔到政府點樣可以唔俾佢做，再加上用互聯網傳送的電視訊息都得，咁我哋就可以在手機、在電腦、或者你自己識用電腦或機頂盒駁電視，都睇到港視節目。所以維基哥唔好話政府唔俾佢播啦，政府只係唔俾佢用入屋的方式播，雖然維基哥而家唔認想入屋，但若佢只是想播電視訊息入手機，又使鬼用到DTMB呢種可播高清的制式咩。

點解維基哥千方百計要直入電視，否則情願唔做? 一句說穿了，就係迷信「牛頭角順嫂」的價值。我幾年前同一個電視台老闆傾過，佢話美國三大全國電視台早已半死不活，反觀香港的無綫仲生活得不錯，皆因香港比較多「牛頭角順嫂」、比較多新移民，佢哋坐定定在家睇電視，所以免費電視觀眾雖跌，但不如外國跌得咁厲害。我當時心諗，電視業界真係幾迷信「牛頭角順嫂」的作用喎。

美國互聯網電視公司「Netflix 」自費拍出的皇牌劇《紙牌屋》，一句話:正。香港幾時有呢種劇?

幾年過去，自2008年iPhone3面世開始，互聯網翻天，但香港電視業者仍然一樣，靠順嫂食糊。維基哥的思維也一模一樣，不滿足做流動電視和互聯網電視，成日想擴大流動電視的輸出，由屋頂公共天線放訊號入屋，說穿了也是迷信牛頭角順嫂作用的思維，認為呢班人唔識上網，唔識自己買機頂盒，無咗佢哋做電視無得做。

算吧啦，時代變啦，維基哥以創意起家，根本就唔應該睇呢班舊觀眾。香港智能手機有350萬部，平板電腦有150萬部，剩係睇住呢班新觀眾都得啦，繼續開台唔使驚喎，唔使算到咁盡先開台呀。只想針對屋內坐定定睇電視的入屋用戶，out晒啦。

盧永雄

王維基屬下的香港電視宣布收到通訊辦話用港視建議的傳送制式，傳送到超過5000個「指明處所」就要攞電視牌照，港視決定暫停拍攝電視節目，原定7月1日開台都要無限延期。

 

魔童王維基近日可謂頭頭踫著黑，本來搵緊亞視租頻道，但最後亞視大老闆王征臨時轉態，租頻道一事又泡湯。只能還原基本步，重新審視原來搞電視的方式行唔行得通，最後收到政府的負面訊息。維基在記者會上大罵政府，話香港政府一而再，再而三阻他，令他走投無路，政府不合理、強權。他一再質問政府「乜制式可以做? 點解中移動做移動電視時唔使攞電視牌我要攞牌? 點可以一面要求移動電視要一半香港人收到，但又唔俾多過5000戶收到否則要攞牌?」

先此聲明，我自己都好想維基開到台，等電視觀眾多一個選擇。在網上睇過港視拍的《警界線》第一集，都想睇落去。不過睇完王維基的記者會，又覺得佢無講晒事實的全部，因為如果佢用番中移動的制式照做手機流動電視，我又睇唔到政府點樣可以唔俾佢開台，佢只不過係要經天台入屋先至要攞電視牌啫。

 

維基話佢用DTMB制式，呢個就係問題的關鍵。中移動以前用CMMB制式，呢種制式專為做手機電視而設，解象度較差，不要說高清、連標清的畫質也不到，但做小螢幕的手機電視已綽綽有餘。港視用的DTMB制式，遠比CMMB強，可擴大頻寛，可播標清、甚至高清節目，遠超手機電視所需。但中移動獲政府發牌時註明用CMMB制式，若維基照用CMMB制式，完全可以幅蓋大部份人口，由於不是進入「指明處所」(即是所謂定點入屋)，所以亦沒有到達5000個指明處所要攞電視牌的問題。

維基無講的部份，是他用的DTMB制式，由於發射能力強勁，根本就可以由天台接收直送入屋，還有一種更強的E-DTMB制式，系統兼容性強比無綫現時的還要強，若維基用這些制式入屋，其訊號根本和兩大免費電視台無異，政府叫佢攞電視牌又唔係全無道理喎。

揭開表象，維基本來係想博矇好似一般免費電視咁樣入屋，而不止想做手機流動電視，政府唔俾佢用咁方式入屋，佢就唔做，呢啲只係商人諗縮數的商業考慮，佢怕客量少啲收唔夠廣告就索性唔做，有違佢一直講要向公眾提供電視選擇的說詞。所以我倒過頭來要求王維基唔好唔播，要拍劇如期啟播，只要用番晒中移動的CMMB制式照播就得，仲可以加埋用正宗的互聯網電視的方式在網上播，維基哥唔好借啲意就話唔做走數喎，其實互聯網電視在美國已經搞到好蓬勃啦，互聯網電視公司Netflix 非常成功，並自資拍出 House of Cards(紙牌屋)這套名劇，珠玉在前，維基哥何不冒一冒險搞互聯網電視，闖出一條新路，為觀眾帶來更多的選擇呢？

盧永雄

有關港視的流動電視使用制式問題，可參考本網一月的報道：

防維基博矇　無記一劍封喉

http://www.bastillepost.com/hongkong/%E6%94%BF%E4%BA%8B/%E9%98%B2%E7%B6%AD%E5%9F%BA%E5%8D%9A%E7%9F%87%E3%80%80%E7%84%A1%E8%A8%98%E4%B8%80%E5%8A%8D%E5%B0%81%E5%96%89