特區政府的政改諮詢將於5月初完結，《星島日報》日前引述消息人士透露，中央政府的主流意見認為，特首候選人須獲得提名委員會過半數支持，才能體現提名委員會的「集體意志」。全國人大常委會在八月的會議，將決定提名機制
追查一吓，發現呢單料相當堅，中央的意見就係咁，提委會過半數揀出候選人，可能揀2至4個候選人出賽，意味住泛民主派一直爭取的無篩選提名，唔可能實現啦。
跟住落嚟，就係睇泛民的反應。公民黨立法會議員郭家麒昨日已經出來，指有關方案是「真篩選、假普選」，「如果8月有呢個消息，我地立刻佔中，別無其他辦法」。估計阿爺一旦宣布選特首最終程序，泛民就會發動「佔中」行動。八月「打大交」在所難免。
而家睇番轉頭，政府政改諮詢分兩步，去年開始第一階段諮詢，並無實質，可以話只係一個空諮詢，其實想避過每年一度的7.1遊行。到7.1過後，第二階段政改諮詢開始，先會嚟真料，真命天子的政改方案就會出籠，當中的特首提名程序難免成為焦點。
究竟呢個「亮劍」過程，係由中央出手、還是由特區政府出手? 由中央出手，就係由人大常委會出招; 若由特區出手，就由特區政府在第二階段將屬意的方案當作其中一個方案提出。若由特區政府出手，上街反對的矛頭一定會直指特首CY，若由中央出手，雖然泛民唔會唔鬧CY，但都係主要由中央接招了。睇而家的牌局，係由中央出招，好可能由人大常委會以一個決議形式，羅列中央對政改的意見，當中否定公民提名只是前菜，主菜是講到由提委會過半數揀出特首候選人，意味有篩選的方案會現身。人大常委會在8月和10月都會開會，如今很可能在8月出招。
中央出招後，佔中馬上嚟，亂一亂難免。無怪乎原定9月下旬在香港舉行的亞太區經濟合作組織財長會議突然難產，改在北京舉行。阿爺預咗會有佔中，若然9月照搞 APEC，全世界傳媒集中香港，就更被動啦。我諗無論在攻在守的一方，都唔好預咗今年秋天會好過啦，暑假都唔使放。若然係生意人、投資者，都要預咗有變局呀。
盧永雄
魔童王維基放慢搞港視單嘢，真係愈講愈亂，佢同通訊局拗嚟拗去，一般市民唔易聽得明，但佢昨日話「通訊局無講任何制式用得」呢一個重大指控，今日就被通訊局技術性擊到，通訊局話1月24日同港視開會已講明，可用中移動用開的制式或歐洲和美國的指定制式，仲有會議紀錄為證。其後維基哥的反駁，就唔係咁有力啦。
維基哥雖然辯論好叻，但佢今日連番強辯，就令人有一個感覺，佢咁樣講得就講，屈咗班搞技術的公務員。過去坊間一直有一個信念，話只是特首CY不想發電視牌俾王維基，公務員其實唔係咁睇。無論呢個講法係真唔係，但經此一役，通訊局的官員顯然覺得維基哥老屈佢地，搞到佢地慶到飛起，你睇通訊局官員出來個面口有幾黑就知。港視以後再和通訊局打交道時，官員肯定會揸到正一正嚟做，所以維基哥賣弄辯材的代價唔細也。
睇番成件事，維基哥好有「一路喊打喊殺，一路搵路退場」的味道，似乎真係怕搞落去唔掂，所以只是佯攻撤退。若然係咁，我估好多人都接受唔到，因為大家都想佢開台，想電視觀眾有多一個選擇，唔係想佢撤退。
正如我昨日所講，只要佢用足中移動做流動電視的CMMB制式(或者用通訊局建議的歐洲、美國制式)，唔係用佢想用、有強大輸出的DTMB制式，只是將訊號發去手機上，我睇唔到政府點樣可以唔俾佢做，再加上用互聯網傳送的電視訊息都得，咁我哋就可以在手機、在電腦、或者你自己識用電腦或機頂盒駁電視，都睇到港視節目。所以維基哥唔好話政府唔俾佢播啦，政府只係唔俾佢用入屋的方式播，雖然維基哥而家唔認想入屋，但若佢只是想播電視訊息入手機，又使鬼用到DTMB呢種可播高清的制式咩。
點解維基哥千方百計要直入電視，否則情願唔做? 一句說穿了，就係迷信「牛頭角順嫂」的價值。我幾年前同一個電視台老闆傾過，佢話美國三大全國電視台早已半死不活，反觀香港的無綫仲生活得不錯，皆因香港比較多「牛頭角順嫂」、比較多新移民，佢哋坐定定在家睇電視，所以免費電視觀眾雖跌，但不如外國跌得咁厲害。我當時心諗，電視業界真係幾迷信「牛頭角順嫂」的作用喎。
美國互聯網電視公司「Netflix 」自費拍出的皇牌劇《紙牌屋》，一句話:正。香港幾時有呢種劇?
幾年過去，自2008年iPhone3面世開始，互聯網翻天，但香港電視業者仍然一樣，靠順嫂食糊。維基哥的思維也一模一樣，不滿足做流動電視和互聯網電視，成日想擴大流動電視的輸出，由屋頂公共天線放訊號入屋，說穿了也是迷信牛頭角順嫂作用的思維，認為呢班人唔識上網，唔識自己買機頂盒，無咗佢哋做電視無得做。
算吧啦，時代變啦，維基哥以創意起家，根本就唔應該睇呢班舊觀眾。香港智能手機有350萬部，平板電腦有150萬部，剩係睇住呢班新觀眾都得啦，繼續開台唔使驚喎，唔使算到咁盡先開台呀。只想針對屋內坐定定睇電視的入屋用戶，out晒啦。
盧永雄
