古天后日誌｜港股若失守250日線只有再向下尋底

5月3日，大致多雲，日間部份時間陽光及較為炎熱。隔晚美股偏軟，雖然FRC已被JP收購，但市場仍擔心有其他地方銀行爆鑊，地方銀行股急挫，嚴重影響市場氣氛，加上議息在即，市場更為保守。道指一度跌逾500點，收市跌367點；標指跌48點，再度回試4100短線支持；納指則跌132點。今次聯儲局議息未知會否繼續加息0.25%，但估計喺銀行風暴下，息口或早於預期見頂，未知聯儲局會否繼續擺姿態，留意會後議明有乜講。

美股業績期都過咗一段時間，重磅科網股業績已公布得七七八八，雖然唔少業績都表現唔錯，但喺地方銀行爆煲潮重現，以及企業不景氣及破產消息下，美股或借勢回調。由於息口高企，FRC因此流失大量存款，局住向貼現窗借錢，但喺息口高企下，利息成本高昂，終令FRC走上破產之路。喺目前地區銀行人人自危下，嚟緊一段時間利息成本都會高企，即使唔使搞到破產，息差收窄定必影響收入，呢個亦係中小型銀行股價下跌原因。連百業之母嘅銀行業都搞成咁，其他企業會否陷入財政危機真係好難講。除咗銀行業之外，另一個較為令人擔心嘅部份係商廈空置率高企，大量資金從相關RIETS流走，不得不防有相關資產嘅基金爆煲。

至於港股噚日開始無北水，成交縮減至755億元，雖然全日港股最終仍收升39點，睇款似跌唔落，不過喺成交薄弱嘅情況下，兼且已失守多條移動平均線，僅餘250日線噚日力保，後市古天后都係睇得比較淡。尤其成交薄靜，更難說服有資金買貨，久守必失下，一旦再失守19700及19400水平，繼續尋底機會較大。

即使近呢兩個月，中字頭股份炒上，部份科網股亦不斷以好消息吸引市場，但科網股唔少已打回原形，甚至已跌穿1月高位，京東(09618)更衰到創上市新低，主要係大股東借好消息出貨，散戶信好消息追入，結果又係被割韭菜，試問咁嘅市場仲有邊個願意投入資金。古天后已苦口婆心多次勸告，港股並非機會處處，反而係危機四伏，寧願等待美股回吐，喺美股尋找機會更為實際。

6月21日，天氣炎熱，大致天晴，局部地區間中有幾陣驟雨。隔晚美股低開低走，不過龍頭股之一嘅Tesla股價因為再有車商加盟其充電站，帶動股價升5%，美股亦於低位反彈，道指收市跌245點；標指跌20點，納指跌22點，標指喺4300有不俗支持，暫時仍然算係高位整固。VIX唔算過，市場等待鮑爺今晚聽證會有乜講，睇睇會唔會從佢嘅口中，得知未來息口路徑方向。

美股方面無乜特別消息，但隔晚中概股跌到一仆一碌，反映中概股嘅金龍指數跌逾5%，主要係618購物銷售未如理想，大行出晒報告唱好電商股亦幫唔到手，拼多多插水7%，京東(09618)亦跌6%。雖然阿里(09988)指張勇辭去CEO一職，係為咗專注阿里雲發展，但市場又未必會好放心。事關有消息指，馬雲對於目前阿里狀況相當擔心，怕失去其龍頭地位，喺激烈競爭下，如不能走出困局，阿里會相當大鑊，呢個亦係點解阿里喺低估值下，股價遲遲未能重返紅底水平。

至於港股都無乜好講，國常會結束，但阿爺未有推出任何刺激經濟措施，繼續打嘴炮，雖然減咗息原意係想鬆一鬆銀根，卻搞到人民幣繼續走軟，A股跟港股噚日都腳軟。美國國務卿訪華，雖獲習大大會見，雙方見面後，未有發表任何聯合聲明，反映雙方未有共識，只係關係上打開僵局缺口，但始終你有你講，我有我做，唔見得美國會停止制裁中國企業。等待好消息嘅投資者失望，又再沽貨離場，恒指回試50日線及250日線，成交更縮水至1000億之下，一句到尾，港股缺水情況，由18000展開反彈都無改善過，挾淡倉亦有停止嘅一日，北水買入又賣出，周一淨買入，噚日又淨沽出，根本唔會同你坐定定。散戶更加係心灰意冷，韭菜被割得多，早已轉戰美股，甚至其他市場，跟巴菲特買日股都仲有希望，港股早成棄嬰，上上落落，有波幅，冇升幅，當早前港股重見二萬，古天后已提示反彈浪隨時完結，今日一旦再失守最後防線20日線，睇怕新一輪跌浪又再展開。