有人認為多此一舉
有些公司會為加班或外勤的員工支付的士費,卻有貪心的員工為圖差價錢,叫85折的士後再以正價單據向公司報銷。近日有的士司機於社交平台發文,表示為防止乘客以正價收據報銷折扣車費,而製作「85折印章」,豈料第一次使用已成功令乘客主動付正價。雖然不少網民讚賞司機之舉,但亦有人認為司機根本不應該提供折扣服務。
該的士司機於Facebook群組「的士司機資訊網Taxi」發文,表示以$100訂製了一個紅色原子印章,上面印有「的士85折、Taxi 15% OFF」的字樣。當遇到乘客要求85折的士服務及單據時,司機便會在單據上蓋上該印,以杜絕乘客「食夾棍」的行為。
司機憶述首次使用印章時,有客人電召85折的士從大埔上車「接呢張單嘅時候佢張單冇表明要收據」,至到達時客人要求司機出單,於是司機便在單據上蓋上印章,明確標明車費已獲折扣。怎料客人見狀後立即「黑面」更主動要求付全額車資,及從新列印單據「俾完收據客人之後,客人話要俾返正價,真奇怪,係咪冇得賺,索性唔同公司慳呢」。
司機沾沾自喜,覺得這個方法能有效打擊乘客食差價「咁至少我會覺得佢哋唔會利用到個漏洞俾機會去呃十幾蚊先」,亦可能令一些乘客寧願付正價,能賺多點車資「至少今次個客會俾返正價,要返張正價收據」。
此帖一出引起網民熱議,不少人讚賞司機的做法「擺明食夾棍啦,下次折頭要單學下師兄咁蓋印先」、「咁又正路喎!做85吸印係好事,等呢D西客吾敢再叫85叫正價,整返個先」、「嘩!樓主呢招真係絕」。
不過亦有人笑司機五十步笑百步,收85折本來就不對「雖然呢招好似糯米治木蝨,其實唔應該接呢啲單,西客等到天荒地老都冇車時,要車就要比正價」、「又要接又要做小學雞嘢」、「自己做折頭黨但又眼紅人哋claim公司數」、「食得鹹魚抵得渴,做得85就唔好搞咁多嘢啦,咁有骨氣見到85就唔好接,只做街客咪所有都正價囉」、「又要搵大旗同流合污,又要喺污水中做一滴清泉」。
亦有人指樓主此舉存在風險「你扱呢個印簡直係捉蟲,公司會問邊個主動、邊個被動?再交畀交通投訴組,職員可能口頭警告,司機不按錶收費,後果難料」、「唔跟咪錶收費有機會係犯法,你一係唔做,一係唔好俾人知,而家即係攞把刀俾人去插自己,自己提供證據去鋤自己」。
樓主則回應指雖然提供85折的士服務並不被鼓勵,但想杜絕乘客騙取公司差價「我唔係要將呢個85折嘅行為洗白!但係,當客人拎咗85之後再拎返張正價收據,咁就真係犯法,你可以唔認同我嘅做法,我亦冇興趣逼你接受」。
亦有網民指出,若乘客騙取差價而被公司發現報警,司機有機會被連累「據我所知,乘客要求八五折,司機接受,並不犯法,樓主單據給了八五折印章,應該是好事,因為乘客的單據,給公司claim錢,如果公司發現是八五折找數,報警的話,司機和乘客就是(串謀行騙)聽講曾經有司機中招要坐監」。
帖文來源:Facebook群組「的士司機資訊網Taxi」