《新聞週刋》貴得嗱脷

有冇雜誌復刋第一日，隻封面故仔就瀨嘢，俾當事人否認㗎？有，就係堂堂美國權威時事雜誌《新聞週刋》。佢之前傳咗做純網上版，近排又走番轉頭玩番印刷版，就係佢印刷版復印封面玩獨家，踼爆比特幣係日裔工程師中本聰發明嘅，仲影埋一個「中本聰」出來。題材夠人氣，諗住今次仲唔威威，點知那個「中本聰」否認同比特幣有任何關連，仲唔客氣揾律師告《新聞週刋》。

《新聞週刋》點解錯？咪住，份週刋堅持報道正確，到依家都冇話自己錯噃。但隻故仔就俾同行驗屍咁驗，點解錯，錯邊度，「吓！中本聰話『家陣唔關我事，交咗俾其他人做，同我冇關聯嘞』，就當係佢發明呀！」，冷嘲熱諷，冇句好話。

《新聞週刋》分明前年先至話轉型做數碼媒體，無端端又恢復印刷版，啲傳媒反而少講，只講佢搞錯嘢，唔知係唔係同行相爭，費事幫佢宣傳，定係覺得唔重要，講都無謂。

點解復刋？因為老板轉咗，東家《野獸日誌》（Daily Breast） 將份雜誌賣咗俾IBT Media。當人人都去做數碼媒體，佢走番轉頭做印刷版，有乜把炮咁創新? 原來新老細做咗市塲硏究，認為優質雜誌，讀者肯長期俾錢睇，咁《新聞週刋》係名牌，有大批老讀者追隨，佢地事業有成，關心政經大事，相信學《經濟學人》咁，做份高檔政經雜誌，應該有生存空間，於是請咗《紐約時報星期日版》商業編輯Jim Impoco揸fit 開莊。

佢哋嘅經營模式，話係既靠廣告也靠零售收費。零售價貴囉！成＄7.99美金(62港元)一期，停刋前都只係＄4.99美金(39港元)一期，貴咗六成，全年訂閱＄149.99，拍得住《經濟學人》＄160嘅收費。但係老友，同係美國雜誌，《時代雜誌》訂全年只係＄30美金咋！《新聞週刋》內容真係咁值錢？係《時代雜誌》5倍! 讀者有幾接受，要睇耐啲先知。讀者當然有高端客，《經濟學人》亦好成功，咁《新聞週刊》的新老闆IBT Media又有幾多錢，燒呀燒、燒開個市場先?

貝貝

貝貝

** 博客文章文責自負,不代表本公司立場 **

唔知大家仲記唔記得，舊年BBC單衰嘢，揾三個記者扮學生，混入著名學府倫敦政治經濟學院的北韓旅行團，真學生就去旅行，真記者就去採訪拍攝。事後，學校同學生家長齊齊投訴，唔可以揾學生做採訪人盾！

今日BBC終於道歉。BBC編採標準委會調查咗大半年，結論係BBC 「嚴重失職，未有考慮及洽當處理眾多重要問題和風險。」當日時事節目《廣角鏡》（Panorama）的記者斯威尼（John Sweeney）曾經狡辯，話去之前講咗俾學生聽，有記者同行。不過，編採標準委會就話，學生所收到嘅資料唔足夠兼唔充足，就是同意也缺乏足夠知識去判斷。（to give informed consent)。

調查又發現，三個記者申請visa時，用咗學院嘅詳細地址。委員會批評，咁做可能把學院與記者行程掛釣，為學院帶來不公平待遇。

結論有咗，BBC管理層無得扺頼，話會寫信向學校及學生家長道歉。話時話，BBC真係唔多掂，呢單係大錯，小錯都唔少喎。之前馬年串錯字，變娼妓年，上星期日又搞錯張相，故仔明明寫中信銀行，張相就出咗中信證劵，見到係Citic就以為一樣，馮京做馬涼，BBC變咗差不多先生，咁做新聞，唔係嘛！

貝貝