馬航已經失蹤多日。每一次傳出來有法航踪跡的消息，都係假消息。除了航機改變路線U turn飛向了印度洋呢條料比較似樣之外，其他例如馬爾代夫居民曾看到疑似馬航失聯航班在當地超低空飛過、台灣學生聲稱從衛星相搵到疑似飛機，又或者航機被劫持到塔利班基地等等，最後證明都係「流料」。希望今次澳洲搵到疑似馬航殘骸係堅料。
在茫無頭緒的情況下，令人想起2009年6月時發生的法航447失蹤兩年的事件。法航447在大西洋上空「神祕失蹤」，當時引起好多猜疑同恐慌，與馬航MH370失蹤後的資訊混亂十分相似。在法航失事客機乘客名單中出現兩名可疑伊斯蘭武裝分子的名字，令人懷疑係恐怖襲擊，事後發現，名字只係剛好相同而已。
法航出事後，經過5日的搜索後，法航447的少部份碎片及機上兩名乘客的屍體在大西洋一處海面上被發現，官方於是宣佈機上共228名乘客及機組人員無人生還。若今次在澳洲附近真係搵到飛機殘骸，又進一步令馬航事件接近法航意外的情況。
不過法航的啟示是找到少量飄浮的飛機碎片，不等如好快找到飛機主體殘骸和「黑盒」。飛機「黑盒」外部都加裝了一個碰到水就會持續30天發出37.5kHz頻率的信號的蜂鳴器，在法航事件中，搜索人員從來沒有發現法航客機的「黑盒」訊號，因為失事法航客機跌入了極深的海底山脈中，故搜尋人員收唔到訊號。但馬航黑盒無訊號是否人為熄機，尚待查證。
法航意外搞咗近兩年都搵唔番架機，最終在2011年5月，才由專業的打撈公司在4000公尺的海底搵到失蹤的法航447及其「黑盒」。經過一年的分析，失事原因最終水落石出。
原來法航墜機原因原來唔係人們想的那樣複雜，只係天氣惡劣，碰正機組人員訓練及安全意識不足，沒有遵循飛行指引行事所致。當時飛機遇到強大的氣流，飛機已顛簸飛行了半小時，機外的感應器上覆蓋了厚厚一層冰晶，毀壞了風速表，觸發自動駕駛儀、自動引擎控制系統和飛行電腦接連關閉，轉作人手操作。
機長當時正在休息，副機長訓練不足，落錯指令，導致飛機失速，失速期間機鼻持續向上。機長返回駕駛室時，副機長又無將情況告知機長。其實上，失速警報一直在響，只要其中一個飛行員有留意的話，將機鼻及時拉低，就可以讓飛機重獲氣流承托而爬升，回復正常飛行，可惜他們卻毫無反應，在飛機急促下墮時維持機鼻向上的錯誤姿勢，沒有修正，令飛機直跌落大西洋，插水無痕，就係咁攞走咗228條人命。
回顧法航447肇事過程，天氣加上人為疏忽，咁簡單的原因就令飛機跌落海，原本以為「黑盒」可以標示位置，但跌落深海，就發揮唔到作用，無刧機無掙扎。但今次馬航在飛行中曾經U turn，增加刧機或機師刧持飛機的可能性，但呢一切都要搵番「黑盒」才可確認。當日用了3000萬美元同兩年時間才撈到法航447飛機殘骸，唔知今之會唔會好運啲呢?
盧永雄
(更新時間：3月20日下午14:00)
早前開人大政協兩會期間，阿爺大吹硬風，中央港澳工作協調小組組長張德江暗罵泛民賣假藥，大有山雨欲來風滿樓之勢。但兩會一完，阿爺改吹軟風，仲伸出橄欖枝，請全體立法會議員去上海，當然最反斗的泛民也在受邀之列。阿爺忽軟忽硬，泛民似乎有少少反應不過來。
鏡頭先回轉到早前張德江見港區人大時，提到「一個立場三個原則」(總之係硬嘢)。大家以為佢咁講已經好辣，原來初時有構思張德江的發言更辣，一舖否定公民提民，但後來暫時按下，只是唔提公民提民，暫不翻這隻底牌。
阿爺開人大時未去到盡，看來為如今出軟招舖路。今趟由特首CY帶全體立法會議員訪上海。泛民議員初時雖未至一口否定北訪，但都好有保留，首先批評「只是一場騷」，唔會傾到實質嘢，大有「做騷唔使預我」的口氣。點知阿爺話無問題，港澳辦主任王光亞和人大常委會副秘書長李飛會發到上海，專門同立法會議員傾包括政制在內的各種實質問題。泛民又話大圍70個議員一齊傾，傾唔出所以然，點知阿爺覆番來話，可以分組同議員傾，換言之可以單獨同泛民議員面對面傾政制。阿爺對泛民的合理要求無托手踭。
睇吓阿爺的手法，發覺佢真係軟硬天師，硬又得，軟亦得。至少表面功夫做出來，唔止係只識擺硬，亦有誠意同泛民坐低傾，唔會為對話設定好多障礙，而且一請請晒所有泛民，避免了上次民主黨單獨入中聯辦跟手被人鋤到暈的問題。
所以泛民唔應該理阿爺係真情或假意啦，何不食住上，就傾他一傾呢？ 反正傾唔掂又唔係放棄上街的權利，又怕乜去傾呢?
順帶一提今次由CY宣布請立法會議員北上，又由CY宣布王光亞和李飛南下出席，有立法會議員就批評CY抽水。不過有知情者就話議員只是隨口講，因為按基本法，由特首代表特區向中央負責，所以中央有嘢都係透過佢來講。上次中央請議員訪問廣東省也是由煲呔曾講出來，不是由當時的立法會主席范太透露，道理本應如此。
盧永雄
