現場即興演繹《Amazing Grace》 真人張敬軒完勝AI張敬軒

張敬軒出席AI的營銷會議，分享AI對娛樂行業、音樂、藝術等創意工業的影響。

張敬軒昨日（9月26日）獲邀出席由IAB Hong Kong主辦全港最大型的AI的營銷會議「 IABHK C23」（C23），活動吸引了來自多個國家及地區、超過五百位業界管理高層親身參加，以及五百名人士在線上參與，探討人工智能對數碼營銷領域的變革性影響。

大合照

去年獲跨社交平台總結成為最Top KOL的軒仔，於會談中分享AI對娛樂行業、音樂、藝術等創意工業的影響。他坦言這十年中最大的恆常收入並非來自音樂，而是透過social media層面。而過去一年於youtube見到很多「AI尹光」、「AI張敬軒」等不同的AI藝人，都是一些好的嘗試，但同時自己亦存在矛盾，甚至偏向有點擔憂，「作為網民、消費者、用家嘅角度，AI嘅存在一定令到我哋嘅生活各方面嘅層面好方便；另一方面作為從業者、版權持有人，我哋見到嘅係一啲令我哋不安嘅未來。譬如當呢啲AI生成嘅sound bite喺internet viral嘅時候，copyright問題點去解決呢？唔同範疇嘅版權，呢啲可能會顯伸一啲再大啲嘅議題。」

軒仔分享AI對娛樂行業、音樂、藝術等創意工業的影響。

對於現在的AI時代，軒仔自言仍處於觀察者的角度，抱着學習心態。雖然擔憂，但他不得不承認AI對於修復舊母帶有一定的程度的貢獻，「譬如我接手Avon呢間錄音室時，有471餅母帶由於年代久遠而冇辦法修復。其中一餅係Beyond喺麥花臣球場一個從來未公開過嘅錄音。磁帶有啲溶化，就算通過焗爐，夾硬拉番開兩個磁帶，佢個磁粉都係食咗喺上一層，但有咗AI之後，由於佢有數據推算嘅模式，可以推算番家駒把聲，做到一個數碼修補。呢個修補方法令到我哋可以聽到一啲我哋從來未聽到過嘅錄音，或者一啲已經受損咗嘅錄音，對於我哋備份嚟講絕對有好處。不過始終文物嘅本身、嗰個錄音帶嘅本身佢所存在嘅歷史價值，亦都係佢稀有嘅原因。所以呢個係兩個層面嘅考量，但我覺得喺修復嘅過程入面係絕對有可能做得到。」

軒仔坦言對AI偏向有點擔憂，但不得不承認AI對於修復舊母帶有一定的程度的貢獻。

隨後，軒仔與主辦準備了一小段由「AI張敬軒」演繹的《Amazing Grace》於座談會上播放，軒仔表示自己聽完後都十分驚訝，「呢個係咪我嚟㗎？呢個sound bite生成嘅方式，就係用copilot嘅形式，通過某一個骨架，再結合張敬軒對樂句、對咬字嘅處理而生成嘅一段AI嘅sound bite。」播放完後，台下觀眾報以掌聲，軒仔笑說代「AI張敬軒」多謝大家的掌聲。他謂雖然AI張敬軒聲線酷似自己，但他的震音並非如此，更即席獻唱《Amazing Grace》的第一句，台下觀眾頓時起哄呼歡及拍掌，「所以喺音樂範疇，如果純粹以網友角度，大家如果好鍾意聽到尹光唱林家謙、林家謙唱尹光、張敬軒唱邊個邊個，係滿足網友一種情感投射，僅此而已。」

軒仔即場演繹的《Amazing Grace》。

軒仔又自爆跟Tyson Yoshi嘗試叫ChatGPT填詞，但效果並不理想，「邏輯上面係有問題，喺個story telling嘅邏輯上面係有bugs嘅，呢啲將來可能解決到都未定，但而家暫時呢一個以創作人嘅角度，我哋自己業內未係太擔心。廣東話係九音，係一個相當之複雜嘅語言體系，第二樣係廣東話中文入面都有一啲詞彙運用，首先如果真係有AI去做呢啲嘢，佢要識得分析，啊，呢隻歌想口語化啲，譬如有首歌「你唔愛我啦」，呢啲口語啲嘅，或者係「你不愛我了」，首先AI個data base要識得分辨呢啲先。」

軒仔不擔心AI會取代創作人，因為他與Tyson Yoshi嘗試叫ChatGPT填詞，但效果並不理想。

最後，問到對AI的發展潛力，軒仔認為人類所發明所有的科技，應該是要延續人類的文明，而並非摧毀，「所以我哋喺運用AI或科技嘅時候﹐我覺得我哋盡量keep番自己作為一個人類正常閱讀時間，每日一杯咖啡睇一本書，或者一本書裏面嘅一段，增長自己知識，培養自己要think out of the box，跳出框框，之後先會有更好嘅AI，咁我哋嘅文明先至唔會被我哋自己所發明嘅嘢摧毀，呢個係我自己嘅諗法。」

一連兩場《TYSON YOSHI THE VILLAIN LIVE IN MACAO》昨晚在倫敦人綜藝館圓滿結束，Tyson於尾場送上三大驚喜，第一擊是與「亞洲男神」Jackson Wang王嘉爾首唱新歌《DeadEnd》，以千禧年代旋律勾起觀眾的集體回憶，Tyson邀請Jackson登場時竟笑稱若不穿回外套，定必遭對方粗口問候；Jackson唱完新歌後即反擊說：「為何你要說不除衫是因為我呢？若然是這樣，我也脫掉吧！不止是你有胸肌呢！如果我除衫的話，你是否即席跳舞呢？Free Style嗎？大家好像還未看過Tyson跳舞呢？」Tyson即耍手擰頭狂叫「唔好」，場面爆笑！

Tyson Yoshi與王嘉爾首唱新歌《DeadEnd》。

「兩Son合體」變爆粗大會兼玩「禮貌跪」
Jackson固之然夠Real，但Tyson亦非省油的燈，他親解《DeadEnd》的創作過程，原本Jackson提議製作《1994年的第一場雪》之類的千禧年代K歌，並說：「我看了你接受芷珊姐姐的訪問，所以專誠寫了一句『獨自解決』給你，我是否很貼心？度身訂造歌詞呢！」Jackson聞言即以兩字粗口回應，果然夠Real！Jackson又講到自己從未正式出過廣東歌，希望之後跟「Tyson老師」合作出廣東歌，Tyson甫聽到「老師」一詞即爆Seed說：「x你呀！千萬不要！老咩師呀？一聽到老師這個詞語通常便會出事！」其後Jackson再接再厲，不斷稱呼Tyson做老師，以及感謝對方邀請自己做嘉賓，最終演變成「禮貌跪」，「兩Son合體」笑爆全場！

Tyson感謝「大佬軒」張敬軒專程來澳門陪自己玩。

「大佬軒」主動撥頭髮兼執衫勁有愛
尾場驚喜第二擊則是「大佬軒」張敬軒「彈出台」，Tyson即跪地迎接「皇上」聖駕，二人隨即合唱《By My Side》。Tyson先感謝「大佬軒」專程來澳門陪自己玩，又讓他試玩「黑白大戰」，分兩邊測試Fans的尖叫聲，High爆全場！期間有Fans送上「大佬軒」最愛的公仔，他當然愛不釋手，其後軒仔主動幫Tyson撥去頭髮上的彩紙碎，又幫他拿走掉在地上的外套，兄弟情深令全場嘩聲四起！

來到演唱會尾聲，Tyson例牌收到大批熱情Fans「飛Bra上台」，當他送上最後一首歌《In My Dream》時，Jackson與大佬軒再度「Encore出場」，Tyson見狀即「分Bra同味」，兩位亦開心揈Bra，最後更與全場觀眾齊齊締造第二晚的「澳門地震」！兩位「老Best」張敬軒與王嘉爾破天荒合體力撐 Tyson，為首個澳門騷增添一幕又一幕黃金畫面，集氣三位音樂才子下次再聚，同時期待Tyson之後重返「音樂家鄉」台灣開騷！

三大男神破天荒合體。

Tyson預告重返「音樂家鄉」台灣開騷。

見軒公揈Bra證成功「污染樂壇」 堅守底線拒除褲
完騷後，Tyson感謝「空中飛人」Jackson專誠來澳門撐自己，並坦承刻意將歌詞填得較露骨，貼合對方的Sexy風格，又強調自己並非不敢跳舞，而是不懂跳舞，獻醜不如藏拙。Tyson又笑言看到「大佬軒」揈Bra足證自己成功「污染樂壇」，但強調不會以「除褲」來加強污染程度，堅守底線。講到今次「破處」彈結他，Tyson笑言學出興趣來，更即席跟結他師傅Teddy Fan拜師，希望下次可以彈《1994》結他Solo，勇氣可喜！除了結他大計，Tyson的人生計同樣正在進行中，事關以往開騷時收到觀眾掟BB衫上台，所以已跟太太Christy進行了生育檢查，目前正努力造人，希望「盡力」衝擊馬B。

望出另類兒歌照顧小朋友Fans
此外，對於有13歲以下的小 Fans無法入場睇騷，Tyson已盡力安排大家到後台合照，更揚言為了一班小朋友Fans想推出另類兒歌，而自己跟太太Christy亦有造人大計，希望「盡力」衝擊馬B。Tyson亦首度開腔回應「響喉L」事件，他強調原先出片只為自嘲，豈料網友反應不如自己預期，令雙方及身邊人均備受攻擊，於是主動聯絡 Hera拍片化解網上的戻氣，自己亦會經一事長一智，開玩笑前三思而行，以免被放大。Tyson又澄清與Hera拍片並非為了宣傳新歌，反而是希望表達「和而不同」的理念，就算想法不一致，也不一定要互相抨擊。

首度回應網上風波。