政府昨日提出了兩個供電方案，諮詢公眾。簡單啲講，一個係幫內地兩網買多些電，另一個係大幅增加天然氣發電比例。
兩個方案的目的，都係要減低本地燃煤發電廠的高排放，減低空氣污染。市民要環保，政府就做嘢，思路就係咁簡單。但凡事有利亦有弊，好處係令本地空氣清新些，但壞處呢？政府無多講。環境局局長黃錦星只係話，兩個方案的價錢分別唔大。事實上，無論係幫內地買電，或轉用天然氣，成本都比本地燒煤發電高好多。當然發電成本只係整體電價的一部份，但電費將大幅加價，勢所難免。環保有價也。
最近遇上電力公司高層，總係口出怨言，覺得壓力好大，報紙上充斥不實傳言，話華潤電力將買起全港所有電力公司、入侵香港等等。我鑑貌辨色，電力公司高層最近壓力好大，日子不好過。不過唔怕講多句，佢地在未來日子，將會更不好過。
事實上，電廠的投資者，已經睇通咗呢個局。中電同港燈都出現了投資者退場或減持的情況。去年11月中，美國埃克森美孚公司將擁有本地最大發電廠--青山發電廠的青山發電有限公司的六成股權，全數賣俾中電（由原本持股四成增加到七成）及南方電網（佔三成）。反映美國人對香港電廠生意前景唔係咁樂觀，所以離場唔玩，大陸公司要外出投資，就嚟香港接波。至於電能實業，亦將港燈分拆上市套現。如果本地電力市場未來一片繁榮，聰明的電力公司老闆又點會減持？
電力公司唔睇好前景，主要係本地環保意識日趨提高，低成本、高排放的燃煤發電方式好難玩落去。改用環保的發電方式，加電費在所難免，問題係加價勢必引起市民不滿。
現時錦星哥做緊的兩個供電方案諮詢，就好似入到餐廳，話新推出A餐B餐，都好好味，問大家揀邊個？但佢無講兩個餐都加咗價，無問若然兩個餐都加幾多幾多，若然有問加價制唔制，可能唔少人會拍枱離開。如果係無得離開要梗食，當中的不滿，就隨時演變成政治炸彈。
更麻煩的是唔止加電費會令市民不滿，日漸激化的中港矛盾情緒也會介入。內地南方電網已持有香港電廠股權，謠傳的內地公司要買起全港所有電廠，都會挑起港人抗拒大陸的情緒，若然話增加買內地電力，結果可想而知。萬一到時有人高叫「中資入場，電費狂加」，（雖然兩者沒有必然關係），錦星哥呢枱炸彈就更難拆啦。
盧永雄
去年6月下旬，海峽兩岸在上海簽署了《海峽兩岸服務貿易協議》，台灣的國民黨政府可能怕協議過唔到，就快刀斬亂麻，立法院召集人張慶忠本周一(17日)二話不說，宣布協議已經通過審議，送院會存查，即時引起民眾不滿，翌日就有超過1000名來自民間團體及學生組織民眾圍堵立法院抗議。晚上集會期間，更有200多名學生突破封鎖線，成功闖入並佔領了立法院。
從方方面面跡象顯示，這次佔領立法院的行動，並唔係反對黨民進黨好有組織咁策動，只係由學生及民間團體自發性組織，估唔到成功搞大，仲成為國際新聞。到事發之後，民進黨主席蘇貞昌急急下達動員令，要求全國黨公職人員火速到台北，加入包圍立法院行動，睇嚟民進黨無份發動，只能「抽抽水」補飛。國民黨的馬英九總統就更加被動啦，被一班學生借佔據議會狙擊不停。
另一個值得注意的現象係，當晚唔少抗爭者將整個佔領立法院情形，利用互聯網即場傳至美國有線電視新聞「CNN iReport」專頁，令事件好快就成為國際媒體的頭條。過去只有有錢的電視台，出動衛星新聞直播（SNG）車，才能做現場直播。現在任何人只要有部手提電腦或者手機，利用互聯網，已經可以做網上直播者。
隨住網絡愈來愈發達，政治運動愈變得「即興」，愈無組織。—些民間團體，甚至個人，透過互聯網這個工具，意念一轉，在網上發動一吓，可能無人啋，咁就算數散場，但也可能迴嚮好大，唔覺意就造出一個影響深遠的公民運動，唔係咁容易受到控制。我將呢種有異於傳統由反對黨派主導抗爭運動的現象，稱為「民主碎片化」。
經濟學人封面(網上圖片)
《經濟學人》最近提到西方民主正經歷艱難時世，獨裁者縱使被趕下台，但反對派大多無法建立行之有效的民主政府。《經濟學人》的解釋首先係歐美經濟失利，民主制度常常與債台高築、運作失靈等字眼聯繫在一起，令人失去信心，其次係中國的掘起，中國過去30年間每10年生活水平翻一番，叫人覺得共產黨的專制制度，反而比民主效率更高，更能避免僵局。
《經濟學人》講到中共專制政體對民主制有咁大挑戰，在香港唔係幾啱聽。我倒認為《經濟學人》忽略了另外一大因素，隨著移動互聯網急促發展，跳過傳統的政治組織，將原來零散、無組織的群眾隨時發動起來，在各國形成一次又一次的群眾運動，甚至革命，成功推翻政府。但這種「碎片化」的民主運動，推翻現有政權容易，革命後要建設新世界就好難。因為策動者沒有組織、沒有領導，難聽一點講，其實係「烏合之眾」而已。無論如何，各地政府面對這種不受控制的新勢力挑戰，一不留神，就會被趕落台。
可以前往此網址看全文的翻譯：
http://mp.weixin.qq.com/mp/appmsg/show?__biz=MjM5MjA4MjA4MA==&appmsgid=200122771&itemidx=1&sign=979b123ee00e19724e3febab531ea29d&scene=1&from=singlemessage&isappinstalled=0#wechat_redirect
盧永雄
