林超榮三名女兒寫信送別亡父 陳淑蘭喊住讀信：超人爸爸嘅傳奇人生煞青咗

蘭子強忍眼淚讀出林超榮三個女兒撰寫的親筆信，原來超人的遺願是做區議員。

身兼編劇、導演、節目主持多職、人稱「超人」的創作人林超榮12月12日病逝，終年61歲。林超榮生前為港台主持電台節目《開心日報》，12月13日播出的《開心日報》製作了《懷念林超榮特輯》，一眾主持輪流分享與林超榮相處的點滴時，一度泣不成聲。

人稱「超人」的資深傳媒人林超榮12月12日逝世，享年61歲。

林超榮於2007年起加入港台第一台《開心日報》擔任主持，他以風趣幽默風格見稱，愛扮鬼扮馬，他於11月8日最後一次主持節目。

與林超榮私交甚篤的陳淑蘭（蘭子），在節目尾聲強忍眼淚讀出一封由林超榮三名女兒寫給爸爸的最後一封信，當中除了提到林超榮與她們相處的點滴，女兒亦透露原來林超榮的遺願是做區議員。

一起主持港台節目《開心日報》的好友陳淑蘭（蘭子）亦有到醫院送他最後一程。

林超榮女兒親筆信全文：

「超人爸爸嘅傳奇人生昨日煞青咗，我好鍾意亦好唔捨得呢個唔梳頭、得返四隻牙、拎住個穿窿紙袋，入面袋住三本書，仲係過期未交罰款，同埋將粗口發揮得淋漓盡致嘅爸爸。爸爸，個個嚟探你嘅朋友都話你真係好好，又搞笑，又遴鬼迍，但係乜人都幫。講到幫人，爸爸都有「有志不得伸」嘅時候。

講個秘密畀大家聽，爸爸其實一直都想做區議員，除咗可以幫人之外，仲有個天大契機，就係可以喺嗰區周街免費泊車。喺《開心日報》報道主持離世咁傷心嘅消息， 成件事好有爸爸嘅作風，你乜都睇得咁樂觀。爸爸冇嘢做唔成，唯獨係做唔到嚿電芯，爸爸只有正極，冇心機，正能量爆滿，爸爸係所有人心中嘅開心果。好掛住嗰個10:30電台開工，10點先電話響，再聽多一句「哎呀！」然後牙都唔刷就衝去返工嘅爸爸，我問你，個口咁臭畀人聞到㗎喎，你話是但啦，啲聽眾都聞唔到嘅。冇錯，爸爸真係好污糟，不過幫佢澄清返，爸爸一日沖兩三次涼，一日洗廿幾套衫，只不過都係得一條底褲。爸爸，你咁鍾意講嘢，喺另一個世界記得開返場棟篤笑任你噏，到時開再間書店同文具店，到時大把筆俾你偷，冇人再話你用鋼漏墨漏到隻手變黑色喇。爸爸生前真係好鍾意筆，見筆就攞，前日已經得到朋友馬小強證實，爸爸確實有『戀筆癖』，爸爸對筆嘅喜愛程度，大至動作全伊利沙伯醫療團隊為已經住院嘅爸爸喺舊病房找尋失物鉛筆一支，當中具有誇大成份，請自行斟酌。

爸爸，你喺滂沱大雨中都不忘拯救一竇BB貓，唔知係咪因為佢哋喺你書店大，成日𥄫你做緊啲乜嘢，而家又俾我哋叫做肥仔，又係隻污糟貓。一切嚟得太急啦，最後一句聽爸爸你講嘅竟然係『嘩！梅菜剁豬肉，正呀！』邊有人做化療都咁有胃口㗎？爸爸，你真係好努力、好叻、好犀利，我哋永遠愛你，你永遠都喺我哋身邊。雖然WhatsApp group嘅訊息以後唔會再全員已讀All seen，但係你你對我哋嘅好，對我哋嘅付出，你一生人做過嘅好事，我哋所有人Well received，收到晒，再見啦爸爸。」

陳淑蘭喊住讀出林超榮三名女兒親筆信。

林超榮老婆屈穎妍是專欄作家、建制派KOL，兩人育有三名女兒。

林超榮過往曾在訪問中指出，自己前半生努力搵銀，除了供書教學之外，更已留下物業與三名女兒，經已「盡晒責任」。

「超人」林超榮不敵血癌逝世

創作兼節目主持、綽號「超人」的林超榮12月12日病逝，享年61歲。他的好朋友沈西城在社交平台公告其死訊。

創作兼節目主持、綽號「超人」的林超榮病逝(圖片來源:星島日報)

香港電台仝人對林超榮的離去表達高度懷念。（港台社交網頁截圖）

好朋友沈西城在社交平台公告其死訊。

香港電影編劇家協會發文悼念：「我們尊敬的前會長林超榮先生(1961-2023)於2023年12月12日病逝，享年61歲。

林超榮先生於1961年在香港出生。1982年加入成龍的威禾公司參與創作《A計 劃》(1982) 劇本。1983年入讀浸會學院中文系，並開始在報章雜誌以筆名林起瑩 撰寫影評。1986年浸會 學院畢業後加入電視廣播有限公司任職綜藝組編劇，其間 受到新藝城公司邀請為其兼職編劇參與度《長短腳之戀》(1988)劇本。

1989年轉職亞洲電視任職編審，作品包括笑話節目《笑joke 1800秒》、《開心主 流派》及劇 集《難兄難弟1991》。1991年離開電視業全身投入電影編劇，曾參 與編寫《中環英雄》 (1991)、《明月照尖東》(1992)、《非洲超人》(1994)、 《豪情蓋天》(1997)、 《嚦咕嚦咕對對碰》(2007)、《刺陵》(2009)、《低俗喜 劇》(2012)等影片的劇本， 以擅寫喜劇知名，亦經常客串幕前演出。

電影編劇之外，他亦任專欄作家、電視節目監製及主持、電臺節目主持等不同工

作，其在香港電台電視部製作的時事諷刺節目《頭條新聞》中主持的環節，令觀眾留下深刻印象。

個人著作有《繼續玩謝董建華》、《笑裡情懷總是黐》、《獅子山下人情話》、 《笑爆鳥》 等書籍。1994年參與創辦香港電影評論學會。2008年策劃了由十位 導演短片集合而成的《十 分鍾情》。

2013至2017年任香港電影編劇家協會會長。2016年執導了首部作品《江湖悲 劇》。創作和 演出之外，亦多年從事電影教育工作。除了長期為香港編劇家協會 的電影編劇課程任教外， 亦為香港浸會大學電影學院客席講師，培養新編劇。

本會仝人對林超榮先生的逝世表示沉痛哀悼，並向他的家屬致以最深切的慰問。

林超榮先生在影視業界的貢獻和風采，將永遠留在我們的心中。」

香港電影編劇家協會發文悼念