獨沽一味反CY 唔夠票入局

立法會選舉陸續公布，有些結果都幾出人意表。好像自由黨田北俊幫李梓敬「抬轎」，以李梓敬排第一的名單出戰新界東，但暫時只得1萬6000幾票，22張名單中排13，注定落選。

另外在港島區出選的王維基，選前被視為大熱，結果得票3萬3000幾票，大熱倒灶落選，陳淑莊多他唔夠2000票入局。

睇返兩人政鋼政見，不約而同都是主打「反CY」。鐘意玩FB的田少成日在FB上揶揄CY，好像話「梁粉，啃都啃唔落，又點會投票投得落手？！」，又話要使出「降狼十八掌」，揚言要「令議會多一分反對689嘅力量 」。王維基更獨沽一味主打「反CY」，講到明要拉特首梁振英下馬。

以田北俊喺政壇的影響力，以及王維基的名氣嚟睇，換來今次結果可說是慘敗。呢個結果似乎反映單一主攻「反CY」唔夠號召力，即使兩人本錢幾厚，都唔夠票送到他們入立法會。

政壇中人話，呢啲風頭人物平日反CY，好似甚得好評，但到選舉時，反CY的選民好多，但每人只得一票，會唔會以王維基或自由黨做首選，抑或會投更反CY的泛民或本土派呢？這個道理，都值得政界人士反思，選舉應該用乜野作為單一賣點，若然泛民講你又講，都唔係咁易突圍。

Ariel

** 博客文章文責自負,不代表本公司立場 **

新界西有9席，據初步點票結果，土地正義聯盟朱凱廸成該區票王，得84000多票，其他當選人有田北辰、鄭松泰、梁志祥、陳恒鑌、麥美娟、郭家麒、尹兆堅，料尾席由何君堯奪得，他得票35000多票。

排第10的李卓人只有30000票多一點，差5000票飲恨。朱凱廸比較純正的形像成主要賣點，沒有人狙擊他也有著數，Ariel聽到幾個新西選民話其他人投唔落手，又唔太喜歡政黨，結果投了朱凱廸。

另外選民想投新人，高樓價是很多人心中之痛，只是「土地正義聯盟」這個招牌，也吸引了不少反對高樓價的人投朱凱廸這個新鮮人。

不過朱凱廸得票超高，比最低當選票多了53000票，從泛民陣營的角度，這些票等如浪費了，客觀上扯走了其他泛民的選票，造就了親建制的何君堯只以5000票之差打敗李卓人。當然朱凱廸並無義務去分票給李卓人。

何君堯早上形容自己這次參選形勢「險過剃頭」，指泛民票源分散，加上朱凱廸名單吸票多，是他勝出的原因之一。