為演唱會推新團歌 COLLAR地獄式排練增感情預告開騷爆喊

COLLAR本度首支團歌兼演唱會主題曲《Back In The Game》，顧名思義是指「返去舞台懷抱」，而作為演唱會主題曲，節奏及舞步同樣極具「炸場」感覺！

成軍兩周年的樂壇女子組合COLLAR即將於本月22至24日，在九龍灣國際展貿中心舉行《COLLAR CRUSH LIVE 2024》，演唱會進入倒數階段，7位成員Marf邱彥筒、Gao沈貞巧、Day許軼、Candy王家晴、Winka陳泳伽、Ivy蘇雅琳及Sumling李芯駖，除了連月來積極排練，近日亦推出年本度首支團歌兼演唱會主題曲《Back In The Game》，新歌顧名思義是指「返去舞台懷抱」，而作為演唱會主題曲，無論節奏及舞步都極具「炸場」感覺，震撼眼球。

COLLAR推出年本度首支團歌兼演唱會主題曲《Back In The Game》。

觀看相關影片按連結：https://youtu.be/AXhYHcdtyhk?si=BU5_TTL0mypQUAcZ

日前，COLLAR到大埔拍攝新歌MV，重返出道首支團歌《Call My Name!》MV拍攝舊地，7人異口同聲表示勾起出道時不少回憶，Sumling透露：「勾起咗好多回憶，出道雖然係冇耐嘅事，但好似做咗好多嘢咁。」Marf最大感受是各成員狀態、樣子都不同了，她說：「睇番《Call My Name!》嘅片，我哋個樣唔同咗好多，瘦咗、firm咗，好有趣。」Day就指拍攝場地令她感覺格外親切。

新歌繼續勁歌熱舞，舞步更是有史以來最複雜，Candy透露今次MV只有兩日排舞時間：「今次MV最難忘係得兩日時間排舞，前後大概10小時，但今次嘅舞蹈係有史以來最難、最複雜同最有power，所以喺咁短時間排到，覺得我哋好勁。」Gao就指《Back In The Game》特別之處，是跟演唱會海報般有車的元素，她表示：「新歌前奏有啲汽車聲，而演唱會Poster亦有汽車感覺，覺得好得意，一個好巧合地方。」

提到演唱會已進入倒數階段，COLLAR表示非常期待，當中Ivy指：「一直以來都無間斷咁做訓練，每日都同大家一齊，感覺好似一家人，好開心，未試過連續日日都見到大家。」Sumling透露近日band rehearsal時，各人感動到眼濕：「唔知係咪好耐未試過圍埋咁唱歌，特別感動。」7人預告演唱會當晚可能忍不住喊，笑言會袋定紙巾。此外，提到演唱會門票反應熱烈「一票難求」，對此COLLAR多謝大家支持，當中Winka表示：「我都好難畀飛親朋戚友，但係開心嘅煩惱嚟。」

Winka自爆錄影「Chill Club」前緊張到失眠。

樂隊Nowhere Boys（NWB）最近與人氣女團COLLAR成員陳泳伽（Winka）推出合唱歌《異人之野望》，MV中打機過關的動漫情節深受樂迷喜愛，大讚有型兼熱血。他們日前為ViuTV音樂節目「Chill Club」錄影，首次以Live Band形式表演新歌。雖然琴鍵兼小提琴手漁佬因外遊未有現身，不過依然無阻四子與Winka Rock爆錄影廠。Winka自爆緊張到失眠，感激NWB的「軍醫」結他手Ken於MV拍攝當晚出手相救。

樂隊Nowhere Boys與COLLAR成員Winka以Live Band形式表演新歌《異人之野望》。

NWB與Winka「黑Rock」型爆Look現身錄影廠，一埋位綵排火速進入狀態，喚醒心中的搖滾魂，順利完成拍攝後更互相擊掌大叫好玩。首次以Live Band形式合唱《異人之野望》，Winka錄影前一晚緊張到失眠。她說：「因為我太耐無夾Band，同埋好耐無唱過Band嘅歌。​​噚晚有少少緊張，但去到現場戴晒耳機感受到你哋嘅氣場。頭先綵排咗兩次，我就開始進入狀態，呢首歌唱完有叉返電嘅感覺。」主音Van提議要多些現場演繹新歌，Winka同意並提議說：「不如以後你哋出任何騷都帶埋我去。」NWB一眾成員立即豎起手指公表示贊成，Van表示歡迎，「嘩，咁我哋就會有更多觀眾睇啦！」

NWB與Winka「黑Rock」型爆Look現身錄影廠。

回想《異人之野望》創作過程，Van表示歌曲在Demo時名字是《Coins》，講一個關於「推銀機」遊戲的故事。他說：「當不停入錢，通常都係會輸。但一中Jackpot時，啲金幣不停冧落嚟，就係想寫嗰一吓快感，所以漁佬彈琴方法都係好似有嘢冧落嚟嘅感覺。呢首歌想講每個人都有機會爆發，成為一個英雄。」他們將新歌故事告訴填詞人Oscar，繼而寫出一首充滿日本動漫感覺的歌曲，MV導演亦拍了有關忍者的故事。

Van

首次與NWB合作，Winka已經與各人打成一片，她形容Van就如「大佬」一樣照顧所有人，更感激「軍醫」Ken於MV拍攝當晚出手相救。Van解釋說：「平時邊個Bandmate冧咗，都會有軍醫，佢就係阿Ken，因為佢有祖傳穴位按摩。」他隨後分享拍MV的趣事，更大讚Winka非常專業。Van說：「Winka拍MV前一晚只係瞓咗一個鐘就要嚟拍打戲，大家睇MV就知佢同Nate打得幾狠。打咗成日，拍埋Band Shot已經拍咗14、15個鐘，見佢面青口唇白，就問佢介唔介意俾阿Ken按摩。」

爽快回應說：「唔介意！按完之後醒咗，啲血即刻通咗，衝咗上個腦度。」

Winka感激「軍醫」Ken於MV拍攝當晚出手相救。

今次的合作開心又順利，將來會再有音樂上的合作嗎？他們異口同聲表示「好想」。Van提議將Winka的個人單曲改成搖滾版，而Winka則表示已經有諗法，更叫樂迷敬請期待，還一臉滿足表示《異人之野望》完整了心中的版圖，「之前未有歌表達我嘅熱血同中二病，呢首歌完整咗呢個位置。」Van笑說：「最鍾意同中二病人合作，你睇下我哋之前合作過嘅人。」Winka興奮說：「成日幻想自己係女殺手，睇完啲特務戲，我又會幻想自己係。（Van：咁你要拍多啲戲。）不如搵我做多啲女殺手，我好願意。」

Winka與NWB都異口同聲表示「好想」再合作。