內地A股呢幾年「熊」霸天下，長跌長有，令人意興欄珊，H股亦受影響，搞到散戶好無癮，成日搵我問功課。偶然間拿起張化橋嘅第二部著作《避開股市的地雷》睇睇，覺得都值得散戶睇睇。
張化橋連續四年，被《亞洲貨幣》雜誌評為「最佳中國分析師」，在首部著作《投行分析師的叛逆宣言》中，大爆股市分析行業真相，詳述股票分析師的工作，其實滿布盲點，多數的基金經理唔能夠跑贏大市，又話要準確預測大市短期上落走勢，其實係天方夜譚。更提醒散戶唔好趁熱鬧抽新股，避免中招。
睇埋張化橋另一本書《避開股市的地雷》，佢講到股市主要有三種地雷，分別由上市公司、政府和股民自己埋下。當然，中招的都係股民啦。
上市公司埋下的地雷主要包括造假賬、誇張失實，以及報喜不報憂。間中會有上市公司爆出醜聞，股民就知道上當被騙，但更多的情況係股民根本唔知乜嘢原因，只見手上股票股價不停下滑，連點解受傷都唔知。
政府(指內地政府)埋下的地雷主要係幫助或者縱容上市公司或者擬上市公司誇大盈利，以及向公司提供優惠，例如用低價向上市公司注資國有資產，或者用高價將上市國企的不良資產剝離。一次性省靚塊招牌，股民就入局。其實係長貧難顧。
最後的地雷係股民自己埋下。包括投機取巧，抱住僥倖心理，唔做功課之餘，又過度自信。張化橋話「我們每個人都以為自己比大多數人聰明，實際上，我們就是大多數人。」
睇完張化橋本書有讀後感，佢講中國股市，有啲中國特色，第一種地雷上市公司做假，就在內地嚴重啲，香港公司唔係咁敢做假，但粉飾吓帳目就少不免啦。第二種地雷政府干預係中國特色，香港就好少見，香港政府對上市公司沒有所謂補貼或注資的行為。但你買國企股、民企股，呢兩種地雷一樣炸到應。
至於第三種地雷即係股民心態，其實全世界，包括香港股市，都好普遍。至於股民唔做功課，香港以至全世界都係一樣，香港的情況可能更加嚴重，好彩就當技術，好似2007年的單邊大升市，基本上盲嘅買股都贏啦，但就會覺得自己揀股超勁。實際上，從不花功夫做功課，講股佬話買乜就買乜，唔知自己買緊乜。中正地雷，就輸到扒街。
有個我叫做盲俠的朋友成日見到我就問我有乜嘢會升100倍的股票，我諗住買本《避開股市的地雷》送俾佢。
後記:想買呢本書，可去書網www.heatbook.hk訂購，定價每本138元。
陸羽仁
** 博客文章文責自負,不代表本公司立場 **
買股票個個想贏錢，通常有兩個最想問功課的時候，一係見市旺想搵冧巴贏錢，一係見市差手上有蟹貨輸緊錢，而家係後一種情況，大市衰衰哋，但如果你買著紅色股，已經衰到貼地。
我有唔少朋友都係咁，好無奈，話買股票輸足三四年，都唔知想點。我拉開一個股價圖俾佢地睇，話你地好似原地跑咁，係咁架啦。
雅虎財經截圖
呢個係恒生H股指數基金(2828)自2011年開始的走勢圖，2011年4月見過高位137.8元，在這個高峰之後，2828就好似落咗一層樓咁，之後出現三座大山，論圖型都相當完美，在2012年2月，2013年1月和2013年12月3個高峰，都在120元上下左右，無再上過137那些高位。
反觀呢三座大山的低位，在2011年10月插得深啲，見過81.55元的低位，之後在2012年9月和2013年7月，都係插近90元就停，無穿過90元。(現價94.1元)結論係過去3年，2828都係在90元和120元左近上落，走一個大型上落市。如果你高位無沽，幾年無乜進帳，除咗一年可以收到2厘幾息之外，就好像原地跑一樣，跑到索晒氣，一啲得益都無。若果衰起上來，你在近120那種高位入市，就衰足3年，無法翻身。仲有仲有，在香港買國企已經好啲，買大陸股或大陸指數基金，唔止橫行，仲要向下。
國企股如此不濟，皆因中國自2008年大放水四萬億之後，經濟過熱，跟住在2010年開始要收水，咁打後三年股市都無好過，可見將來也大體如此。所以你唔在低位買，高位沽，就唔好玩國企啦。
你可能馬上彈出一個問題，睇圖而家似似地在山腳，買得未? 我估個市短線未似跌完，短期仲似向下，你買股要捱當頭跌，2828現價94.1元，跌到90元邊唔係好奇，再狠一點，就要下試2011年11月的低位81.55元，所以唔敢話佢已見咗底。安全一點係唔估底，係見到樂觀訊息才買，主要是阿爺出招托經濟或托股市時才入手，可能貴少少，但亦都安全少少。
陸羽仁
