新一屆立法會議員選出，不少官員有習慣送封信去賀一賀， 不過教育局局長吳克儉一發信就出事， 在發信給泛民超級區議會議員梁耀忠時，竟然誤稱他為「 教育界功能界別」議員，祝賀他「成功連任」， 而且邀約他相談教育事務。
梁耀忠見此笑話自然不放過，立即放到facebook上「 感謝祝賀」，仲話自己雖然關心教育但不是教育界議員。忠哥話自己是經區議會(二)功能界別當選新一屆立法會議員，而非教育界，更笑稱「無意取代葉建源議員」， 還指除了被認錯是譚耀宗外，第一次被認錯是教育界議員。
街工梁耀忠在網上發文，附上一張由吳克儉局長署名的信件， 祝賀他連任當選，但看多眼就有點怪，因為局長賀他「 教育界功能界別成功連任」，而且邀約他相談教育事務。
吳局長信中講咗成段對方點關心教育事務，相信封信本來應該寄去俾教育界的葉建源。到底是否兩封信掉亂咗， 葉建源被認作超級區議員，但葉議員就隨即放自己收到的信件上網，結果是，沒有錯誤。
成件事估計是工作人員「用錯湯底」，用致葉建源的信做底，應該改成為致梁耀忠的內容，結果無改，就鬧出大笑話。 最慘就係見到吳局長簽下個大名，想唔認有睇個封信都唔得。
有公務員話，無論公眾人士獲得勲章也好、議員當選也好，高官發出的恭賀信都好濫，總之箭無虛發，人人有份。估計今次吳局長發咗70封信，你話佢得唔得閒睇晒70封信的內容 ？只有合埋眼就照簽啦。
有網民話會唔會係個秘書有心整古個局長？政壇八卦友分析，秘書也好、教育局代筆的小官也好，應該無咁狼啩 ？雖然公務員唔使炒，但都好可能被人寫花個「快勞」， 犯不著有心搞這種事。
政壇八卦友話，可以話吳局長粗心大意，也可以話人黑真係無得救， 教育局局長係下屆換人的熱門部門，搞埋呢單笑話， 恐怕都衰多二錢。佢順便講，呢啲恭賀信發得咁濫， 以後唔發好過啦。想恭賀，打個電話有誠意啲。
Ariel
** 博客文章文責自負,不代表本公司立場 **
