美國民主黨總統候選人希拉莉喺911紀念日活動發表演說時狂咳，被迫提早離場。有傳媒仲影到佢等專車時成個人軟奶奶，行上車嗰兩步路都無力，差啲仆低。事後競選團隊話佢有肺炎，要休息幾日。國內隨即有大批民眾要求兩位總統候選人公開詳細健康報告，大家都唔想將來位總統身體有事無法領導大家。
唔知大家會唔會覺得，候選人健康問題喺今屆美國總統選戰中好似特別受關注？有美國傳媒提出兩大原因，首先希拉莉同埋共和黨總統候選人特朗普分別已經68同埋70歲，一把年紀仲要咁頻撲，雙方支持者梗係擔心；另一點更重要嘅係兩位之前提供嘅健康資料好可疑，如果之後揭發佢哋有隱瞞，咁就證明個人誠信有問題。
點擊看圖輯
希拉莉（AP圖片）
特朗普（AP圖片）
克里夫蘭（網上圖片）
威爾遜喺老婆協助下處理文件（網上圖片）
1945年雅爾達會議盟軍「三巨頭」會面，左起依次為邱吉爾、羅斯福同埋史達林（網上圖片）
甘迺迪（網上圖片）
希拉莉（AP圖片）
希拉莉去年公開兩頁健康報告，說明佢有甲狀腺機能低下症，試過短暫腦震盪以及有幾處血栓，每日都會服用抗血栓藥物，平時非常注重飲食。不過佢今年七月受訪時突然狂眨眼，頭部前後搖晃疑似抽搐；加上呢次肺炎，好多人都認為佢份報告不盡不實。特朗普提供嗰份只有四段長嘅簡報就衰在前後矛盾，醫生喺頭段話佢當選的話，「可能係有史以嚟最健康嘅總統」，尾段又話佢血壓同埋體重超標，即係健康定唔健康啫？
特朗普（AP圖片）
不過咁，鄧小平有句名言：「不管白猫黑猫，能抓到老鼠就是好貓。」我認為只要有方法管得掂個國家，病貓或者一樣掂，甚至個人品行有時都可以擺埋一邊。唐太宗李世民夠殺死自己阿哥啦，仲逼老竇退位添，後世咪一樣讚佢係中國史上最偉大君主之一。美國過去都有多位總統隱瞞自己病情，呢班病貓一樣管得個國家好好睇睇。
克里夫蘭（網上圖片）
1893年時任美國總統格羅弗．克里夫蘭發現自己口中生咗個瘤，之後確診係上皮瘤。為免引起國內混亂，佢同埋一隊醫療團隊登上一艘遊艇，聲稱出海渡假四日，實情就係做手術，切除五隻牙同埋部分顎骨。為免其他人發現，佢仲叫人整咗一份假骨。呢場手術喺克里夫蘭死後多年先公諸於世。諷刺嘅係，克里夫蘭在世時一直以「誠實、正直」形象深受民眾支持。
威爾遜喺老婆協助下處理文件（網上圖片）
伍德羅．威爾遜咗改變美國外交同埋國防政策。美國1914年起至今積極參與世界事件，就係多得佢提出嘅「國際主義」，亦稱「威爾遜主義」。威爾遜除咗帶領美國參加第一次世界大戰，另外一件事就要數佢中風啦。佢當選之前幾年已經試過幾次中風，但係一直無公開；1919年在任時又中多一次，當時公關團隊話佢患上「急性病」，左邊半身不遂。佢第二任太太伊蒂絲從此開始幫佢處理公務，成為美國版武則天。伊蒂絲喺回憶錄中勁大口氣寫道：「幫老公做嘢之嘛！有咩問題？我做代總統一啲問題都無囉！」
1945年雅爾達會議盟軍「三巨頭」會面，左起依次為邱吉爾、羅斯福同埋史達林（網上圖片）
另一位不得不提嘅大病貓總統係富蘭克林．羅斯福，因為脊髓灰質炎，腰部以下完全癱瘓。意外嘅係佢雖然殘疾，但就成為至今唯一一位連續四次勝出美國總統選戰嘅人，帶領國民走出經濟大蕭條，並喺第二次世界大戰前期頂住各方壓力對抗軸心國。佢自1940年開始健康開始轉差，先後確診高血壓、肺氣腫、動脈粥狀硬化、心絞痛同埋心臟病等，終於喺1944年在任期間離世。
甘迺迪（網上圖片）
最後要講嘅係約翰．甘迺迪。佢無疑係位好總統，改善國民居住環境、發展教育、改革稅制、加強農業發展、保護天然資源、為老人提供良好醫療保健、反種族歧視等，美國人都對佢遇刺身亡感到可惜。不過喺正面形象之下，甘迺迪一直隱瞞自己醫療紀錄。直到佢遇刺後多年，世人先知佢一直依賴類固醇抑制愛迪生氏病，還有攝取大量鎮靜劑、止痛藥、睾丸素、抗生素同埋安眠藥等，對抗其他併發症。
神州快訊
** 博客文章文責自負,不代表本公司立場 **
