香港這個煙花之地，還是有吸引力的地方。早兩日在西九ICC和好友飲下午茶，突然遇上一個久未見面的內地富豪在閒逛，走去和他寒喧兩句，才知他是參加一個寶馬車主會搞的活動，寶馬包了ICC的Ritz Carlton酒店幾層，請了百幾個內地寶馬7系車主來港，體驗生活享受。
寶馬想這些富豪車主試的都是外國富豪常玩的玩意，例如坐坐遊艇啦、坐帆船啦、騎馬啦、睇跑馬啦、打高爾夫之類，本來仲要坐坐私人飛機，臨時安排唔到，但車主們都好滿意啦。富豪在港時，寶馬對他們一切生活照顧週到，除了住Ritz Carlton靚房之外，食飯睇Show少不免，還請來台灣歌星辛曉琪唱歌助慶。
據說寶馬在內地賣得好好，賣得好過平治，車主不少係大富大貴之人，但亦偶有鬧出負面新聞，寶馬的售後服務真係週到，年年出大錢，請一班7系車主來港體驗真正富豪生活，學吓如何活出豪華生活品味。我心諗寶馬請客手筆咁大，真係肯落本錢。豪客朋友就話，寶馬咁搞除了令香港多一筆遊客生意之外，的確令客戶對品牌忠誠度加強，諗落除笨有精。
啱啱睇到寶馬車廠公布第三季盈利，只有13.3億歐元，按年微升3%，盈利升得少主要受歐洲拖累，而中國就是寶馬有兩位數字高增長的市場，當然要拉住班大陸豪客挖吓潛啦。
Ariel
** 博客文章文責自負,不代表本公司立場 **
