中信泰富（0267）擬鯨吞佢阿媽中信集團約2800億元資產，財經界睇成為阿媽中信集團擬借殼個仔中信泰富，來香港上市; 反對派媒體看成為「港資退、中資進」的進軍香港措施，這些看法不是太窄，便是太偏，看不到阿爺的戰略部署。
中信集團的行動只是冰山一角，未來中央企業類似的行動還陸續有來，背後的動機要追溯至去年中共十八屆三中全會推出的國企改革，容許民間資本、甚至外資入股國有企業。
你可能問中信泰富買阿媽中信集團的資產，表面睇好似同國企改革無乜關係喎? 咁你就要明白阿爺點界定企業的性質啦。在阿爺的眼中，阿媽中信集團係一間中央級國有企業(簡稱央企)，但佢個仔中信泰富係一間香港上市公司，本來已經係一間有外地資本參與的企業。中信泰富反向收購阿媽中信集團後，等如兩間公司合併，合併後的新中信是一間有外資做小股東的香港上市公司，據稱還會接觸淡馬錫等外資入股，等如讓中信集團這家央企引入重要的外資股東，換言之中信集團就透過這個方式改制了。
當日榮智健的爸爸榮毅仁創立中信，搞出一家國企，兒子榮智健不甘心白做，就讓中信在香港生了一個仔中信泰富，由他自己來做大股東。不過中信泰富幾年前出現炒燶外匯事件，要阿媽中信集團注資救助，中信集團增持中信泰富股份又變成泰富大股東，如今更把兩家公司變相合併了。
中信改制只是冰山一角，以後外資入股央企，還陸續有來，最後可能大部份央企都有外資持股。另一方面，央企亦會投資外地公司。
內地官員認為，最後會出現一個「你中有我，我中有你」的局面。回想朱鎔基做總理的年代，是「國退民進」，國企市場份額減少，民營企業的份額加大，市場開始活躍。到溫家寶做總理的年代，是「國進民退」，國企重新做大，要打入世界500強，民營企業被國企擠壓，叫苦連天。但中國經濟中的國企成份再擴大後，中國經濟愈強，外國就愈抵制你。
新一波國企改革，容許外資入股央企，又讓央企外出投資，大型國企流著部份重要外資的血液，外資大公司也流著中國投資者的血液，中國就和西方的利益掛上鈎，外國也不會輕易出重招打死中國了。好似中國用貿易盈餘買入大量美債，雖然做美國債主好像很笨，但美國也不想讓中國這個大債主死掉，因為她死前會拋售你你債券，把你也拖垮。所以新一輪國企改革，除了改善效益外，還有國際上博奕的考量。
盧永雄
新一代最大不滿之一是樓價太貴，想買樓才結婚等極都未買到，所以馬鞍山白石地皮昨日以低價中標，比一年多前同區土地平咗18%，但千祈唔好話這種投地結果唔正常喎。
本月初有另一幅大埔白石角住宅地招標，當日政府以發展商出價未達設底價而宣佈流標。政府消息人士當時指，政府內部定的每呎樓面底價約5,000元，已是保守訂價，只是發展商出價過低，最高也只有約4,000元水平，距離政府底價甚遠，所以政府要收回。流標翌日發展局局長陳茂波解畫，指底價已經隨着市場變化而調整，政府要守護公眾資產，不可能賤賣土地云云。
但言猶在耳，政府昨日就以更低價錢批出同樣臨海的馬鞍山白石地皮，由新地以每方呎樓面地價約4,200多元奪得，是市場預期下限，相比長實在2012年11月投得的同區地皮，當時每呎樓面地價5,160元，地價1年多跌了18%。
雖然係兩幅地，但馬鞍山地更近市區，按理唔應該平過大埔白石角地皮，但結果政府4200元呎價就批出，若然月初唔到5000元一呎都唔賣，如今政策已經變咗。有批評政府政策朝令夕改，當日話唔會賤賣土地，如今又低價賣地。
我睇法偏偏相反，覺得如今先至叫做合理。大家應該記得，在預算案之後，發展局波哥出來發炮，話港鐵天水圍天榮站地皮兩度流標，影響土地供應。但跟住話咁快大埔白石角地皮就一樣流標，出現一個典型「有口話人，無口話自己的局面」。港鐵批唔出地因為發展商入標價過低，同樣白石角地皮批唔出都係政府心中有個底價，唔到價唔賣，既然政府都係咁，仲鬧乜鬼港鐵啫?
政府知道市民買唔到樓民怨高，想樓價跌番啲，但而家起樓建築費要4000蚊一呎，即係地價為0，發展商唔賺都要賣4000元以上佢至唔使輸(持土地幾年有利息成本)，咁都唔係平啦。政府仲話去到馬鞍山白石角都係靚地要5000元一呎地價，發展商唔賺只計成本都要9000幾元，咁又叫市民點買樓呢? 而家即使4200元地價批出，起完都要8000幾元成本，仲係一啲都唔易負擔喎，政府仲邊度有得嫌地價唔夠高呀。
政府出辣招控制樓價，想樓價跌，地價唔跌唔得，唔可以話我睇住政府盤數唔想賤賣土地。理論上土地愈賤，供應愈多，樓價才會較易回落，才會去番較合理的水平。至於政府怕收入減少財政唔掂，就係另一回事，政府要另外諗掂佢啦。
盧永雄
