港鐵根據車費可加可減機制，今年6月起加價3.6%，根據港府當年與港鐵協議，搞出呢個可加可減機制，港鐵票價增減，計算通脹率、運輸業工資指數及生產力提升三個因素來決定，今年的3.6%加幅就是按這個方程式計出來，無得郁。
市民覺得搭港鐵愈來愈逼，不止繁忙時間逼唔到上車，有時假日都逼到暈，覺得港鐵生意好好先至係，點解仲要加價? 仲有就係成日有事故，一出事上落班就大受影響，有時出事後接駁巴士又無，趕住返工怕比老細詐型，嗰種感覺港鐵高層未必知喇。市民心中本來就有不滿，再遇上港鐵加價，自然慶上加慶。
問題就出在呢個可加可減機制。以前鐵路加價年年要向政府申請，政府唔鐘意可以唔批。當地鐵和九鐵合併前，地鐵和政府講數，講出呢個加價機制，當時的運輸及環境局局長係廖秀冬，我記得在一個飯局中，講起呢個大體上跟通脹的可加可減機制，當時我已經覺得唔妥(唔係事後孔明)，我同阿冬姑講:「你地搞出一個地鐵自動波的加價機制，政府將來對佢加幅完全無話事權。愈係高通脹，市民愈抱怨百物騰貴時，即使佢賣樓賺大錢，佢就自動波可以加票價，到時實俾市民怨死你地啦。」
冬姑當時的答案係咁:「地鐵上市，要有一個穩定的票價調整機制，有咗呢個方案後，以後政府唔使年年同佢拗數。而且個機制可以減價，通縮就減價啦。」
我當時心諗，「吓，怕拗數? 咁高人工請啲局長返來，乜唔係貪佢地係重炮，用嚟對付公用事業公司咩?」我把口就咁講:「廖局長，回歸後通縮咗幾年，到而家縮到咁上下囉喎，唔再縮得好多，往後可能就年年通脹，你呢個『可加可減機制』，往後好長時間可能只係『可加機制』咋喎!」
好衰唔衰，真係俾我把衰口講中，之後真係變成「自動波可加機制」。當年高官搞出呢個錯誤的捉蟲機制，今天要我哋來受。現屆官員搞番啲修修補補，什麼以工資中位數變動為加幅封頂、利潤回撥、嚴重故障罰款，真係好似幾條毛咁，一陣風就吹走，幫唔到啲乜嘢啦。
盧永雄
中信泰富（0267）擬鯨吞佢阿媽中信集團約2800億元資產，財經界睇成為阿媽中信集團擬借殼個仔中信泰富，來香港上市; 反對派媒體看成為「港資退、中資進」的進軍香港措施，這些看法不是太窄，便是太偏，看不到阿爺的戰略部署。
中信集團的行動只是冰山一角，未來中央企業類似的行動還陸續有來，背後的動機要追溯至去年中共十八屆三中全會推出的國企改革，容許民間資本、甚至外資入股國有企業。
你可能問中信泰富買阿媽中信集團的資產，表面睇好似同國企改革無乜關係喎? 咁你就要明白阿爺點界定企業的性質啦。在阿爺的眼中，阿媽中信集團係一間中央級國有企業(簡稱央企)，但佢個仔中信泰富係一間香港上市公司，本來已經係一間有外地資本參與的企業。中信泰富反向收購阿媽中信集團後，等如兩間公司合併，合併後的新中信是一間有外資做小股東的香港上市公司，據稱還會接觸淡馬錫等外資入股，等如讓中信集團這家央企引入重要的外資股東，換言之中信集團就透過這個方式改制了。
當日榮智健的爸爸榮毅仁創立中信，搞出一家國企，兒子榮智健不甘心白做，就讓中信在香港生了一個仔中信泰富，由他自己來做大股東。不過中信泰富幾年前出現炒燶外匯事件，要阿媽中信集團注資救助，中信集團增持中信泰富股份又變成泰富大股東，如今更把兩家公司變相合併了。
中信改制只是冰山一角，以後外資入股央企，還陸續有來，最後可能大部份央企都有外資持股。另一方面，央企亦會投資外地公司。
內地官員認為，最後會出現一個「你中有我，我中有你」的局面。回想朱鎔基做總理的年代，是「國退民進」，國企市場份額減少，民營企業的份額加大，市場開始活躍。到溫家寶做總理的年代，是「國進民退」，國企重新做大，要打入世界500強，民營企業被國企擠壓，叫苦連天。但中國經濟中的國企成份再擴大後，中國經濟愈強，外國就愈抵制你。
新一波國企改革，容許外資入股央企，又讓央企外出投資，大型國企流著部份重要外資的血液，外資大公司也流著中國投資者的血液，中國就和西方的利益掛上鈎，外國也不會輕易出重招打死中國了。好似中國用貿易盈餘買入大量美債，雖然做美國債主好像很笨，但美國也不想讓中國這個大債主死掉，因為她死前會拋售你你債券，把你也拖垮。所以新一輪國企改革，除了改善效益外，還有國際上博奕的考量。
盧永雄
