香港市民真係慘，分明地鐵準備加價加成三個percent，全香港中下階層都受影响。記者見到個特首，都應該幫手問問佢，你唔會俾地鐵咁加法係嗎？點都要問係咪？
點知，今晚電台電視，見個特首行出泥，剩係識講「我冇搞連任辦，任期只過咗三分一，點講連任呢」。咁地鐵呢？記者冇問佢地鐵加價呀？定係問咗唔出呀？睇怕無啦，如果有，電台電視台點解唔見報道吓。
睇到好鬼嬲，啲記者咁樣水平做嘢，「特首你係咪已經搞連任辦公室？係咪想連任？」吓！梁振英想連任，係問題泥㗎？你哋啲細路記者有冇睇佢個政綱，啲政策點寫㗎？寫五年呀？乜鬼都講十年規劃，有冇睇真㗎？從佢決定參選個日，思歪都係冧住做十年啦，邊個做特首，只想做一屆㗎？你以為倒梁份子講Plan B，個CY就會舉手投降離塲呀？
所謂連任辦公室，唉！個特首辦唔係做緊咩？CY由朝到晚係嗰度，啲政策係咁派錢，駛唔駛係出面搞多個辦公室，專做連任呀？仲有，家陣佢出面冇另一個私家智襄團咩？乜你以為冇，仲要再搞一個呀？整個權威人士放風，如果馬拉松唔係係咁吹，田少放冷槍，你估梁粉駛唔駛咁吹？人哋做勢，自己粒聲唔出，等人以為CY 下一屆absent，你以為梁粉傻㗎係嘛？但咁早搞連任辦，駛唔駛計競選經費先？有競選經費呢樣嘢㗎，各位記者，用吓個腦，有啲常識得唔得。
貝貝
** 博客文章文責自負,不代表本公司立場 **
李慧玲係名咀定係記者？今晚喺立法會辯論新聞自由，保險界陳健波竟然爆响口，話有商業電台記者揾佢，一講到李慧玲，個記者就話李小姐唔係我哋新聞部，佢唔係記者呀！
陳健波咁樣公開講，咪即係擺商台記者上枱。商台炒李慧玲，記者協會同泛民議員，期期都係閙商台損害「新聞自由」，而唔係話危害「言論自由」，依家商台記者就唔認佢係新聞記者同路，咁即係點呀？
名咀係咪記者？當然唔係。咁新聞自由同言論自由係咪一樣？當然唔一樣。新聞自由係記者專用，日日用呢個免死金牌嚟採訪新聞，而名咀同市民就有言論自由，講乜閙乜都得，唔犯法就得！兩種自由有關聯，但肯定唔等同，但有人要撈埋一堆，只能由得佢啦。
除咗爆嘢，陳健波仲閙鬼李慧玲，話新聞記者要講操守。佢話郵輪嗰件事，李慧玲揾人打去問佢，佢答自己唔熟悉呢一瓣，要查吓先講，點知李慧玲就在節目閙佢唔答，仲閙埋保險界縮埋唔講嘢，但其實保險協會出咗個新聞稿解釋市民疑問，李慧玲提都唔提，講都唔講。
陳健波一向温文客氣，好少見佢咁發火，仲要係喺立法會辯論咁講，乜鬼都留記録，即係將來日後、日後再日後，都可以查到番啲紀錄嚟睇。話時話，如果李小姐仲係商台做名咀，陳先生會唔會公開講不滿？我估係「骨」一聲吞咗佢似啲喎。
