熊貓6寶齊上陣送今日份療愈 盈媽變身曲奇味「富士山」家姐繼續「惡鬥木馬」

身為打工仔的你如果今日過得麻麻哋，強烈建議你睇一睇我哋熊貓6寶。

IG圖片

海洋公園小編攜熊貓6寶為大家送上今日份療愈 ，園方9日在社交網站分享熊貓大家族的最新相片，一人一張鬼馬得意相，只為博港人一笑，「笑吓啦！佢哋6個好畀心機氹大家開心㗎」

所謂「笑一笑世界更美妙」，大熊貓「盈盈」首先穩如「富士山」登場，小編解釋，今次盈盈扮緊曲奇味朱古力，至於牠的另一半樂樂，就一改平日威風俊朗的形象，抱住自己的「安撫被」亮相，小編笑言「每個人生命中都有一張小被被」。鏡頭一轉，「安安」試圖將自己龐大的身軀隱藏於一根細小的管道之後，以為眾人「睇我唔到，你睇我唔到」，而「可可」就藏匿於樹窿中開餐，引得小編亦忍不住問「係“貓”都鍾意捐窿？」

IG圖片

IG圖片

IG圖片

至於一對港產大熊貓孖寶就依然渾身是笑料，「細佬」一臉期待要玩「捉伊因」，號召奶爸奶媽「快啲嚟搵我啦」，而連續幾日同木馬「惡鬥」的「家姐」就依然未能成功上到木馬，最後撒嬌狀向鏡頭求助「可唔可以搵人幫我上隻木馬呀」，最後小編不忘送上彩蛋，只見「家姐」都係放棄求助，「求人不如求自己，算啦，我都係靠自己」，留俾大家一個倔強的黑白糯米糍背影，繼續同木馬糾纏。

IG圖片

IG圖片

IG圖片

小編亦不忘搞笑留言，笑問家姐究竟「幾時先上到隻木馬玩呢？」一眾契爺契媽亦瘋狂留言：「好正！本來返工返到懷疑人生, E+開心返哂」、「“麻麻地”都抹走哂喇。多謝可愛的6寶」、「盈媽想大家知佢湊兩個小朋友都一樣淡定，穩如「富士山」」、「我懷疑盈盈果張係植入式廣告」、「上木馬小幫手表示：我duck我duck啊」、「盈盈背脊似雪山朱古力」

萬千寵愛的大熊貓龍鳳胎「加加」、「得得」好食好住好玩，最新消息兩姐弟體重已經超過35公斤！而且，告別BB餐，開始食窩窩頭了，讓契爸契媽既感欣慰，又捨不得兩個寶貝大得太快。

家姐細佬體重超過35公斤啦！香港大熊貓官方專頁ig截圖

家姐「加加」同細佬「得得」已經15個月大，由老鼠仔一樣的BB，長大到現在肥嘟嘟，識得「費媽」，識得打架，又識得撒嬌。

家姐細佬接受護理訓練。香港大熊貓官方專頁ig截圖

海洋公園的香港大熊貓官方專頁最新帖文帶來好消息，家姐細佬有不少成就解鎖，例如接受護理訓練，奶媽吹著哨子，加上手指指示，細佬就懂得朝奶媽方向走去，準備飲盆盆奶；又例如奶媽叫「加加」，家姐聽懂自己被點名，就馬上「應機」，聽明白指示自己走去正確的地方。

家姐細佬接受護理訓練。香港大熊貓官方專頁ig截圖

大熊貓家姐細佬開始食窩窩頭了。香港大熊貓官方專頁ig截圖

家姐細佬每日都探索和學習新事物，在奶爸奶媽、契爸契媽眼中，是越來越聰明和勇敢了。「睇到好感動，但ee唔想你地大得咁快」，「係盈盈媽媽，奶爸奶媽教導有方又有愛心細心，所以兩個寶貝無論身型同學習都進步好多」，「升中學了啦，接受正式訓練了！家姐叻叻！細佬開始食窩窩頭呀，唔怪之得有35kg重呢！兩姊弟加油！各位奶爸奶媽辛苦了」，「身形就嚟追得到盈盈啦」，「奶爸奶媽們準備要抱不動兩姐弟了」。

大熊貓家姐「加加」同細佬「得得」已經15個月大。香港大熊貓官方專頁ig截圖

另外，海洋公園宣布多項門票優惠方案。即日起至12月17日，香港居民可購買「一票雙遊」門票，以成人票價538元、小童票價269元，一個價錢可自由選擇兩個日子入園。由即日起至明年1月4日，推出「二人同行」成人優惠套票，兩位成人票價為915元。今年12月1日至明年1月4日期間，購買兩個或以上「全年會籍」，不論成人、學生或小童會籍，均有85折優惠，即成人年票為1173元，學生或小童年票為833元。