幾年前，香港一班黑暴「手足」高呼「光時」口號，個個話自己生於亂世，以為自己就係「時代英雄」，用暴力同汽油彈去革命。幾年過去，當年大大聲話與黑暴「手足」同行嘅台灣同美西方國家，係黑暴風潮黯然落幕之後，都陸續同班「手足」割席，於是，「手足」變咗「棄卒」！
台灣
台灣曾經係「手足」嘅「避風港」，當年推出所謂「援助港人赴台計劃」，哄騙黑暴份子，抗爭無後顧之憂，隨時可著草到台灣「避難」。
其實移居台灣政策非常苛刻，所以到而家仲有好多流亡到台灣嘅「手足」，連申請定居嘅資格都未有！ 呢班「棄卒」係台灣面臨一大串難題，定居門檻高、要做非法黑工、被拖欠工資、同工不同酬，甚至遭到性騷擾，更是投訴無門，連二等公民都不如，更加冇佢哋朝思暮想嘅「自由」喇。
好似黑暴時扮牧師嗰個「姜X偉」，著草到台灣之後，諗住參選國安通緝犯袁弓夷發起嘅「香港議會」選舉，妙想天開以為借呢啲政治光環可以留喺台灣搵銀。點知台灣最近就突然話唔歡迎呢班「香港議會」參選人，勒令佢哋要一星期內離境。想當年，「手足」喺台灣被捧上天，話係「抗爭先鋒」，如今變咗過街老鼠，仲俾人踢走。呢件事明顯就係「手足」變「棄卒」嘅例證，反映台灣口口聲聲撐「手足」，但實則根本無意接收佢哋，當日只係利用呢個藉口去氹班「手足」，去對抗內地和香港政府！
英國
英國「保守黨」當年推出BNO「5+1」移民計劃，好多「手足」以為自己拎住本過氣護照，就可以喺英倫展開人生新一頁。點知「工黨」新政府上台之後，在野「保守黨」竟然發起要將「5+1」計劃改成「10+5」計劃，即係話，英倫變咗「沉輪」，「手足」隨時要喺英國捱多9年，先有望攞到公民身份。6年變15年，一個double都唔止！
「保守黨」呢個倡議一出，即刻令到班移英「手足」人心惶惶。雖然「保守黨」只係在野黨，之後出嚟解釋話唔係針對BNO，但係已經令班「手足」活係「今日唔知聽日事」嘅個惶恐之中！ 而呢個「拖字訣」真係高招，因為「手足」係呢段等嘅期間，唔單止享受唔到啲國民福利，而歸化入英籍嘅申請費用又大幅增加，仲唔知會唔會繼續加，同埋仲有咩嘢會加……「加監」又「加費」，就算唔係開始「落閘」收緊移民門檻，都好明顯係掠水增加國庫收入喇；加上又有源源不絕嘅廉價勞工供應，何樂而不為呢！
其實移英「手足」都心知肚明，英國經濟而家係咩環境，通脹高企，失業率上升，仲要日日同當地人爭飯碗；治安就更加精彩，街頭日日刀光劍影，仲要俾人話「Hong Konger，Go Home」！而家BNO變咗「Back No Option」就真！
加拿大
加拿大2021年推出為港人而設嘅「救生艇計劃」，當時俾「手足」透過讀書或工作，獲得加國永久居民身份。當「手足」以為會喺楓葉閣過住慢活人生嘅時候，加拿大移民部上年11月表示，大量積壓嘅移民申請，最少要4年先至可以完成審批，而審批永居名額又將會逐年削減，加上「手足」嘅申請唔會係優先處理……我零零發加加埋埋計過，「手足」要獲批永居資格，基本上要等8年，所以到個「救生艇計劃」係2026年8月結束前，都唔會完成所有審批。而就算人已經係加拿大，但未完成所有申請定居手續，都一樣無得留低！ 而「救生艇計劃」當中嘅開放式工作簽證，係今年2月7日又正式截止申請。所以講白啲，所謂「救生艇計劃」嘅「救生艇」已經變成咗「潛水艇」，呢個黑色幽默真係笑中有淚啊！
即使定居咗落嚟，加拿大通貨膨脹，樓價高到買唔到、租唔到，高失業率，冬天仲要日日同零下20度搏鬥；係香港住好、食好開嘅「手足」，點頂得順喎。而家加拿大又隨時被成為美國「第51個州」，佢自己都未搞掂，仲邊得閒放隻救生艇救你吖，「手足」！
美國
當年「登登」用「延遲強制離境」計劃(DED），酌情俾「手足」留低，但呢個唔係正式居留權，佢落台前雖然將DED延長兩年，但「侵侵」一上台，就話要趕走無證移民，包括「手足」！ 大家都知，只要「侵侵」睇中，就會百發百中，咩事都可以推倒重來，佢只要簽一份行政命令，就可以廢咗個DED ！ 澤連斯基都做咗棄子喇，有咩係唔得喎?！ 所以而家成班「手足」由「黑暴英雄」變咗做「啫喱人」-震騰騰！
見到移居「手足」面對住咁多「不穩定」嘅困局，真係令人唏噓。台灣叫你走，英國拖多你9年，加拿大連隻艇都要收返，美國仲要趕走啲無證移民；呢啲所謂嘅「民主天堂」，如今變咗「棄卒集散地」。不過，「手足」被如此冷酷無情、好行夾唔送嘅對待，我零零發一的都唔意外。其實台灣、美西方國家，一直都係各出其謀吸引「手足」們「移居」異鄉，再不斷諗計，點樣揸乾揸淨佢地嘅「政治光環」、「積蓄」、「勞動力」……然後就送你一程！
所以而家唔少喺海外嘅「手足」私底下傾緊，不如返香港找咗條數，最多坐幾年監，起碼有得食、有得住，好過喺外面，成日要擔心呢樣、擔心嗰樣。
講真，「手足」變「棄卒」，都唔係咩新鮮事，而係好多人眼中，佢地甚至連「卒」都未必夠資格做，可能只稱得上「棄Joke」。最後，有好多人叫我零零發同班「棄卒」講：「香港唔歡迎你，千祈唔好返嚟呀！ 」
鍾情局．零零發
鍾情局
** 博客文章文責自負,不代表本公司立場 **
一次「佔中」、一場「黑暴」，令好多人露出咗黃尾巴。
愚樂圈都唔例外，出咗好多「黃色偽人」。佢哋呢班人全部都係一啲半紅不黑，或者冇乜市場價值、事業開始走下坡嘅「偽人」。所以佢哋喺「佔中」、「黑暴」期間，恃住個斗零名氣，就係度亂噏生事，希望搏一鋪，收番一班黃粉絲。結果，有人被警察拉咗坐監，有人着草離開香港，有人繼續搵黃手足笨、掠水（好似早排講嗰件奀星），有啲就低調咗，耐唔中搞啲小動作去擦存在感。佢哋咁做有幾多黃粉followers我唔知，不過肯定就係，個個賠上自己嘅演藝事業同前途，想返身都好難。
今次我零零發就同大家娛樂大搜索，揀幾個「黃偽人」出嚟八吓！
第一個就係喺公仔箱做咗幾十年嘅千年老三，國安通緝犯鄭X基。佢今次真係跑贏晒所有嘅愚樂圈中人，做咗男一，衝出國際，成為暫時圈中第一個，或者係唯一一個嘅國安案通緝犯！鄭X基，62歲，八十年代經歌唱比賽入行，拍過吓劇，出過一兩隻唱片就冇晒聲氣。冇癮之下，係2000年代初就移民楓葉閣，係個邊兜兜轉轉做過DJ同媒體相關工作。
佢2013年回流香港，係三色台拍下嘢搵兩餐。係2019年「黑暴」，可能見自己都一把年紀，就把心一橫，突然黃上腦，「全副武裝」參加「光復元朗」遊行，又係社交平台上轉發自己掩眼照片，聲援受傷暴徒咁話，希望喺黃圈爆紅。 三色台見勢色唔對，就即刻炒咗佢。冇嘢撈，佢唯有再避走楓葉閣。一返到「家鄉」，佢就急不及待擺街站高叫光時口號、抹黑國安法，又剪爛三色台員工証擺上網，諗住盡地一鋪喺黃圈做歌神影帝。佢咁癲喪，當地媒體邊有人夠膽請佢?！於是佢就自己開個網台叫「HongKonger Station香港台」，招攬同佢一樣嘅逃犯「許至瘋」同埋其他黃人，開咪接受訪問。佢更利用呢個頻道，發佈多段煽動分裂國家嘅影片，亦多次透過其他不同嘅平台和形式，乞求外國對中央和特區官員進行制裁， 對中國、香港採取敵對行動……所以佢係 2024年12月被國安處通緝。
我零零發其實都好好奇呢個網台用咩錢嚟運作?原來又係靠黃人訂閱同眾籌！而家被通緝，香港呢邊嘅財路就斷咗，我睇吓佢食乜?！不過點都好，鄭X基捱咗咁多年，終於都「紅」咗啦！不過係(被)懸「紅」嗰個「紅」呀！
下一個輪到一鋪清袋嘅王X堯，46歲，出生於小康之家，中學去咗英國讀書，大學讀完經濟統計返香港，但又冇乜作為，於是輾轉去咗台灣做「偽人」，渾渾噩噩6年之後，2008年返香港拍咗一兩部戲，叫做有少少知名度。
2014年「王某」多次高調現身「佔中」現場，係12月啲學生包圍政府總部嘅時候，佢就戴晒眼罩頭盔喺現場，用社交媒體呼籲市民去龍和道撐學生！跟住佢俾「生果報」訪問時，又大讚啲學生嘅非法行為……之後每年七一佢都走去遊行，搏出鏡。充滿黃人DNA嘅「王某」，每當接受媒體訪問時，就會不斷咁反政府，總之政府樣樣計劃都係燒銀紙、又話要一人一票選特首……
到咗2019年7月「黑暴」，「王某」同埋其他暴徒衝咗入立法會，大肆破壞，兩個月之後被警察拉咗，擔保期間更變本加厲，大發謬論去吸睛，又幫黃店撐場，做義務店長，總之就與黃同行啦！「王某」以為警察奈佢唔何，點知最後暴動罪罪成！法官話作為有知名度嘅「偽人」，會有鼓動暴徒嘅作用，所以2024年將佢判監74個月。「王某」，你知道立法會嘅維修費要成3600萬嗎？暴徒對整個香港做成嘅破壞，你估納稅人要俾幾多錢去埋單? 究竟邊個先係喺度燒緊錢？我零零發最近睇水晶球，見到「王某」嘅演藝事業好似已經俾人埋咗單，但係俾人追收維修費嗰張，好似仲未找數喎！
最近歌女「河粉詩」又係社交媒體活躍番，舊年仲喺間黃書店攪網上音樂會，刷存在感！「歌女」初出道時，成日話樂壇大姐大係佢偶像，成日都喺度扮「芳姐」；咁「芳姐」不嬲都鍾意提攜後輩，咪收咗佢做徒弟囉！。不過師傅係2003返咗天國之後，「歌女」就不斷用「芳姐」嘅名氣同人脈關係，攪紀念演唱會、唱片專輯同舞台劇等等，攪到以為自己真係「芳姐」junior！由於「歌女」係冇料之人，所以係用盡師傅嘅甜頭之後，佢嘅事業就開始變得呆呆滯滯。為咗要突圍，「歌女」唯有玩gimmick，係2012年，佢同班黃人參加一個同志遊行活動之後，就公開自己「出柜」，更同一班老黃人「黃妖明」、「慢fit」同「生銹蘭」組織「帶愛同盟」，去吸納黃道同志。
係2014年12月「佔中」期間，「歌女」係金鐘佔領區被拘捕，佢好彩冇charge到。雖然逃過一劫，但2019年「黑暴」期間，佢又孖黃痴瘋等人去美角國會，亂吹香港人權同民主狀況，又做埋「碌柚葉」基金信託人同「臘腸新聞」董事，佢之後再被警方以「串謀勾結外國勢力」及「發布煽動性文章」等罪名拘捕，而家仲係保釋緊㗎！唉，「歌女」你雖然喺愚樂圈撈唔掂啫，但都唔好學人哋，人衝，你又去衝吖！靠呢樣嘢，都係出唔到位㗎，儍女！
講愚樂圈「黃偽人」，又點可以唔講「旺喜」呢！佢真名姓鄺，57歲。中學畢業之後做過警察同DJ，係1995年加入三色台，靠傍住當權嘅「至暈」，拍過唔少入到屋嘅劇集，嗰時佢嘅事業都叫順風順水。不過「至暈」2010年被廉署拘捕之後，「阿旺」就離開咗三色台，跟住知名度就即刻插水。
係「佔中」同「黑暴」期間，佢除咗係社交媒體支持「鳩嗚」團之外，又不停指責警察使用暴力，叫警察去自首等謬論。係2020年政府台節目「藤條新聞」中，佢更加著住類似警察制服，係垃圾桶跳出嚟，暗諷警察防疫不力，又指警方隱瞞「黑暴」期間多宗墮樓同遇溺身亡事件嘅真相，藉此去散播仇恨言論！係當時嘅社會氛圍下，佢的確呃到唔少黃人嘅喝釆聲！無錯，佢係黃圈真係彈起咗，不過係愚樂圈就不但紅唔起，而且仲黑到痹，搵唔到食，最後唯有係2021年敗走台灣島。
雖然愚樂圈興埋堆，不過黐埋黃人度就一定冇運行。唔睇唔知，剿剿下先知，原來愚樂圈有咁多「黃偽人」！ 除咗我頭先講嗰幾個，仲有「傻強」兩公婆敗走台灣島，「濕尾」就繼續潛伏喺公仔箱，嗰個前三色台小姐「大口環」，而家又無得賣魚蛋，啲餐廳又執晒笠，唔知點呢？至於嗰個「黃抽身」，就唔知去咗邊喇？！
今次講住咁多先，高人話其實係愚樂圈、偽術界，台前幕後都仲有好多深黃不露嘅人！我零零發遲啲先再逐個捉……
鍾情局．零零發
