香港掛起八號風球，但Sebastian就無有怕，皆因飛咗去海口，參加第四屆觀瀾湖高爾夫球明星賽。海口呢度早幾日天氣都麻麻，都係陰陰天咁，不過到尋日開幕式就好好天，真係天公造美囉！
講返今次高爾夫球明星賽，真係名副其實跨界別盛事，因為不同界別的巨星和名人都齊集海口，認真巴閉，令海口市變得星光熠熠！
話晒都係高爾夫球明星賽，當然有唔少高爾夫球名宿參加，不過唔單止係咁，仲有其他體育明星嚟到，好似有NBA的艾佛遜，佢唔單止受到當地人歡迎，就連一眾藝人明星都爭全同佢合照自拍，好似好鐘意打籃球的周柏豪，就有機會同艾佛遜同車去會場，仲有機會同偶像selfie，真係羨慕死人啦！
網上圖片
碧加和史高斯
講開觀瀾湖高爾夫球明星賽強調跨界別、跨文化、跨領域合作，所以邀請咗好多體壇巨星，好似英超明星史高斯、約基同科拿，以及德國網球名宿碧加。
Sebastian昨日參加酒會，自然要滿場飛，睇吓有無撞到偶像，結果有機會同偶像科拿同史高斯傾偈同影相，佢哋好nice，但就比較少講嘢，Sebastian問史高斯係咪第一次嚟海口，佢話係而且對呢個城市感覺幾好，至於落場有無信心，佢好老實話係志在參與！
除咗體育界，觀瀾湖高爾夫球明星賽亦邀請荷里活明星，好似有米高德格拉斯同謝路美維納。米高德格拉斯認真寶刀未老，外型keep得好好，仲好壓場，一舉手一投足都展現出明星風範，佢喺酒會出現，無論行到邊個角落，都即刻成為全場焦點。
至於謝路美維納係當紮巨星，表現亦都好親民，到處向嘉賓同fans送上抱抱，連小朋友都唔放過添！只要有嘉賓同工作人員上前想同佢selfie，謝路美維納都會非常配合，來者不拒，更主動同一位小朋友擊掌！搞到Sebastian都想同佢合照添！
呢項盛事點少得華人世界的名人參加呢！好似喺流行樂壇非常受歡迎的周杰倫同小巨人姚明，就擔任今次賽事的推廣大使！另外唔少得香港知名藝人，好似楊千嬅、佘詩曼都有行紅地氈，同樣吸引大批粉絲和傳媒注意呀！
Sebastian
** 博客文章文責自負,不代表本公司立場 **
