政府昨日建議延長公務員退休，將新入職公務員退休年齡，由60歲延至65歲。而現職公務人員的退休年齡，可自行申請，有酌情放寛之意。
環顧世界，延長公務員退休年齡，已經係大勢所趨，除了講得好好聽的人的壽命延長因素外，主要目的係慳錢。法國政府去年就公布延後公務員退休時間兩年，好多國家甚至係食終生的「全包宴」。但政府改例讓公務員遲幾年退休，政府就可以少請幾年的新人代替，年中慳番唔少。睇全球大數，由1989年至2009年的20年間，有65個國家提高了退休年齡；男性平均退休年齡由1989年的60.01歲提升至2009年的61.01歲，提高了１歲；女性由57.87歲提升至59.38歲，提高了1.51歲。
不過香港政府好似怕俾公務員鬧係「守財奴」，所以沒有來個一刀切逼所有公務員延長退休年齡，只係新入職公務員劃一推後退休，現職公務員則按個別情況，彈性處理。這種做法，想早早咬糧的公僕仍可咬糧，政府慳錢效果唔會好大。對於現職公務員，只是多了一個可以做耐啲嘅選擇，何樂而不為呢。部份公務員工會指延長退休要每年再批的做法，可能鼓勵「馬房文化」，但反彈聲音唔大，可見大體上公務員都會歡迎政府這個建議。
新政策慳錢效果不彰，但政府仍然提出，除了為長遠將來打算外，背後別有深意。第一個係用錢買人材。近期聽到唔少聲音，話唔少部門話領導人材青黃不接，好多高級公務員一早選咗舊制，到55歲就退休，走得人多就無人可用。此新政策可延長有才能公務員的留任時間，可以話政府係用錢買人材。
第二個作用主要係針對退休高官轉職私人企業的問題。現今世代，人比以前長壽好多，50幾、60歲仍然精力充沛，好多政府高官退休後，仍想繼續工作搵真銀。過去媒體爆出唔少高官過咗「冷河」，就去私人企業當高管，被公眾質疑這些高官有接受延後利益之嫌，政府被批為監管不嚴。
政府今次的做法，可以延長政府高官的服務時間，有心有力又想再搵幾年錢的高官，可申請留任，做多幾年至走，咁按道理到真退休時都唔使再搵咁多喇啩。照常理推斷，政府順利行新制後，下一步可收緊離職高官轉職私人企業，減少俾人鬧「官商勾結」，咁都唔係壞事。
盧永雄
馬航失踪事件仍未解決，跟手又爆一單上海女遊客高華贇在馬來西亞沙巴被擄的事件，懷疑是菲律賓伊斯蘭遊擊隊阿布沙耶夫集團所為。雖然本港旅行社話事情主要發生在沙巴外島，但我就覺得沙巴旅遊的安全性極度成疑，即使不是住在外島，但玩浮潛等活動都要去較遠的島嶼，同樣唔安全，沙巴真係唔好搵我去啦。
阿布沙耶夫是菲律賓的反政府遊擊隊，大家都知菲律賓政府有幾強，佢哋同我哋祖國爭南海主權就係威係勢，但面對本國反對勢力就一籌莫展，阿布沙耶夫遊擊隊在菲律賓南部橫行，經常綁架外國遊客勒索續金，作為組織經費。由於他們的根據地亦貼近馬來西亞沙巴，故亦偶爾對沙巴遊客發動襲擊。
去年11月15日，台灣女子張安薇在沙巴遊旅時，阿布沙耶夫武裝份子殺到，當場槍殺張安薇的丈夫，並把她帶到阿布沙耶夫在菲律賓南部叢林裡大本營，兩個月後人質家屬付續金，張安薇才獲釋。
今次發生上海女子綁架案之後，馬來西亞首相納吉認為，劫持事件絕對可以避免發生，估計有人嘗試離間中馬關係，在這情況中從中獲取好處。他相信，儘管發生事故，馬來西亞與中國的關係仍然堅實不移云云。
我覺得納吉呢番話真係唔講好過講啦。馬來亞西去年11月發生綁架事後，據說加強了沙巴東岸一帶的保安，每間酒店都有軍隊進駐，如今懷疑阿布沙耶夫遊擊隊是在軍隊換防時出事。不過出事就係出事，馬國保安不力害了遊客，納吉講的「有人離間」唔知係想講阿布沙耶夫還是菲律賓政府，不過都係推卸責任之言，講到好似同自己無能無關一樣，只不過係人地靠害啫。唉，如果阿布沙耶夫聽到納吉的話，偏要玩你，就害死個上海女遊客啦。
我睇過本書，係一個被阿布沙耶夫組織綁架的外國女遊客所寫，佢被綁咗成年，結論係阿布沙布夫只係想要錢。台灣女子張安薇曾被阿布沙耶夫綁架，佢大哥張大公曾和阿布沙耶夫談判，張大公同樣話「阿布沙耶夫要錢不會傷人」，叫中國唔好強力外交介入，先救番人質要緊。
盧永雄
