楊千嬅談過去三十年人生經歷是修煉 自爆被丁子高投訴「衰聲」

樂壇天后楊千嬅日前到新城廣播，接受程凱欣主持的《原來生活好快樂》錄音訪問，剛巧與千嬅推出的新歌《Live MY Life》概念十分脗合。千嬅在訪問中與程凱欣深情對話，她除了回顧過去三十年人生，更大談與老公丁子高的相處之道。

楊千嬅接受新城廣播《原來生活好快樂》訪問。

千嬅透露去年完成21個月的巡迴演唱會，所以在農曆新年前已開始休息。「適逢今年三十周年，歌迷成日問幾時出新歌，自己又準備好唱咩歌，所以過去兩年巡迴一路都有做音樂，新歌已經做咗3、4隻，中間又做緊翻唱黑膠碟項目，依家就開始做新歌宣傳。」

而暑假期間，千嬅與丁子高和兒子丁進諾（Torres）前往旅遊，所以連串工作亦稍有延遲，她表示：「咁啱個仔放暑假，之前佢同爸爸去咗summer camp，畀佢哋兩個相處吓，我就Join最尾嗰程，玩咗一個星期，返嚟就開始做宣傳。」有傳千嬅成功申請在紅館舉行演唱會，她大賣關子謂：「8月會有細節公布，自己都等咗好耐，有機會就做，最緊要自己準備好。」

大談過去三十年人生經歷是修煉。

千嬅不經不覺入行三十年，回顧過去經歷人生不同階段，千嬅形容是一個沉澱，她稱：「其實人一出生就係一個修煉，你會遇到唔同起伏，而呢啲起伏係會不停重複，當呢啲起伏再重複時，睇你係用咩心態，每次應該係層層遞進，每個起伏係愈來愈大，因為你有一個人生高度，歲月同呢個世界去量度嘅時候，其實一路係加數，我學緊係減數，而減數嗰樣嘢唔係你能力不逮，又或者你內心軟弱咗，而係因為你個人嘅內核，有一個成長或者強大嘅時候，你先覺得有啲事情唔需要執著，應該專注自己想做嘅事，甚至忠於自己感受，去將自己擅長嘅發揮到最好。」

千嬅指要忠於自己感受。

千嬅與丁子高是「姊弟戀」，二人結婚15年，恩愛非常；問到倆口子相處之道，千嬅直言雙方性格要合得來，她說：「婚姻並唔係你最愛或激情時候結婚，而係激情過後，對方仍然可以相處，我覺得我都搵到一個好嘅對手去相處。」千嬅跟丁子高來自兩個不同的原生家庭，她指婚姻是唯一一次選擇自己的家人，所以相處的重量比較重要，「當然我哋唔係話結婚好耐，但係有經歷嘅，首先思維同步，我比佢大啲，所以成熟快，某啲事我睇得好開，有啲事可能唔係咁，中間會有啲卡住，但要有耐性去接收大家嘅差距，又願意去等待大家嘅節奏，呢個就要經營。」

自爆被老公丁子高投訴「衰聲」。

至於兩公婆有爭執時是否會平心靜氣作出討論？千嬅直言：「我哋姊弟戀嘅好處係我比較冷靜，唔會發癲，但最慘係我把聲好男仔，冇乜語氣，佢（丁子高）依家都會投訴我講嘢衰聲，但我唔係有任何情緒。」

詳細節目內容，請重溫7月31日，上午9:00 – 10:00，新城知訊台《原來生活好快樂》，網址：https://www.metroradio.com.hk/MetroInfo/

歌手尹光到新城廣播接受李有毅與李國煒主持的《Ben同Benson「Chur」到行》訪問，分享由黃偉文（Wyman）為他度身訂造的新歌《你阿爸的無常宇宙》。現年81歲的尹光，在新歌中從出生唱到往生，說的是放下執著，接受上天的安排。然而在拍攝MV時，導演張子丰不讓尹光「死去」。

尹光接受新城《Ben同Benson「Chur」到行》訪問。

尹光談及新歌《你阿爸的無常宇宙》時難掩興奮，他表示歌曲由Wyman操刀：「自從《Dear Myself》之後，佢覺得佢想寫一首歌畀尹光唱。我聽到佢想寫畀我，嘩！開心到。我求都未必求到佢寫畀我，難得佢肯寫畀我，我開心到不得了。」

尹光介紹歌曲內容時滔滔不絕：「呢首歌係講一個人由出世到往生，以前人生幾十年，依家人生可以過百年，我都識幾個九十幾歲，現代人壽命長咗。佢講嘅往生同出生，叫人唔好太執著，每件事上天都安排好。你想健康就運動；你想開心就唔好諗太多，咁你個人就冇問題喇！」

左起：李有毅、尹光、李國煒

新歌MV由張子丰（Fred）執導，拍攝過程甚為有趣，他分享MV中的特別安排：「原本首歌係講我往生，講我死，但Fred話唔好畀尹光死住，我哋仲有排玩。」尹光續說：「MV入面我死咗經過奈何橋，佢話我冇手帶唔走得住。我問佢點解我唔走得？佢話『你未係時候，依家你鍾意去邊就去邊，鍾意做乜就做乜，玩夠再返嚟』。」

談及與兒子的關係，尹光提到自己歌曲《老豆》正正是講述父子關係，他坦承：「年輕時同個仔冇咁密切，長大之後就比較密切。」他解釋：「因為佢細個嘅時候要搵食，個個年輕時都會去拼搏去賺錢，賺錢時就好少顧個仔，多數請工人或者太太照顧，到依家想接觸個仔，佢又識諗嘢，覺得老豆以前冇照顧我咁好，依家想補救，同個仔都OK。」

新城CEO馬浚偉歡迎尹光到訪。

81歲尹光推出新歌《你阿爸的無常宇宙》。

尹光特別感謝影帝張家輝為《老豆》拍攝MV：「我喺呢到借個機會多謝張家輝，佢拍《老豆》個MV真係拍得好好。雖然三兩分鐘，佢個表情真係絕頂，頭髮雖然梳咗兩個鐘，但拍咗兩三秒，轉咗個頭，但嗰吓好有感覺，所以真係影帝。」尹光又透露與兒子的日常溝通：「我個仔冇咁多嘢講，佢同我老婆就講好多嘢，由我老婆講畀我聽。」

另外，尹光將於5月19日舉行《爆笑勁歌晒冷演唱會2026》，他笑言：「曬冷就唔敢講話曬冷，曬冷唱多啲歌畀大家聽，即係有啲歌冇唱過都曬畀你聽。」同時介紹兩位演出嘉賓：「第一個是蝦頭（楊詩敏），佢會同我唱一首好搞笑嘅歌，另一係鄭雅琪，佢喺粵曲界好出名，佢同我會唱幾首廣東小曲。」

唱盡出生到往生。

詳細節目內容，請留意4月25日，晚上11時–凌晨1時，新城知訊台《Ben同Benson「Chur」到行》，網址：https://www.metroradio.com.hk/MetroInfo/