海兒自爆童年「陰影 」被笑係男人 靠「大聲」逆襲成女高音

女高音歌唱家海兒（Hedy）近日接受方健儀的YouTube頻道《女人方言》訪問，大談童年陰影、英國留學趣事，更有被網民重點關注身材感受。原來Hedy小時候把的聲音曾被嫌棄，連爸爸都笑她「唔講嘢就安全啲」，十分爆笑。

海兒接受方健儀的YouTube頻道《女人方言》訪問。

Hedy指小時候對自己的聲音很自卑，更被親戚暗寸：「你唔講嘢就真係好斯文啦！」連爸爸都唔執輸，搞笑道：「你記住，唔講嘢就安全啲，一講嘢啲人就知你低能！」不過家姐天生靚聲，更被老師點名於合唱團中獨唱，令Hedy羨慕又妒忌，不過Hedy「不甘心」，媽咪讓家姐學聲樂，她一於死跟，結果發現自己唯一「天賦」就是夠大聲！「細個比賽唱classical，大聲係好着數，好似特別勁，之後開始攞啲獎。嗰份獎勵好有成功感、成就感。」

觀看相關影片按連結：https://youtu.be/p6tGAYXX2YU

至於學琴，則是媽咪的「精心佈局」，Hedy直言：「學琴係迫返嚟嘅！」Hedy三歲學琴，但經常喊住練琴想放棄，「媽咪就話：『可以呀，咁我哋就揼咗部琴啦。』但係我又對部琴好有感情，好啦就練埋佢啦。學到演奏級、去埋比賽，最後就有一個鋼琴大賽，嗰陣時媽咪就話：『好啦，如果你贏咗呢個比賽，你就可以唔彈琴啦。』我嗰陣時就好努力、好努力去彈呢個比賽，然後贏咗呢個比賽之後，我就真係冇彈過琴啦。」

影片截圖

Hedy又分享於英國皇家音樂學院時的有趣經歷，Hedy謂試過練歌練到隔離地盤工人主動搭訕，原以為投訴，「因為我練歌唔係練成首，我哋練歌只係不停重複嗰一句練一個鐘，或者一粒音，甚至唱半個鐘都只係同一粒音，係好煩。所以佢哋問係咪我唱歌嘅時候我都有啲驚，但佢哋話好開心，『我哋呢個星期都喺度做工程，真係好幸福。』我覺得好鼓舞，因為老師讚我、屋企人讚我，我成日都唔信，因為佢哋好錫我吖嘛。」

影片截圖

不過，Hedy之後搬到一個比較鄉村地方時，就被隔離老師姨姨敲門：「佢話：『其實呢，我都好享受聽你唱歌嘅，但係呢，其實我一個星期放兩日假，因為我係老師嚟嘅，唔知道會唔會可以喺呢兩日唔好唱啦，因為堵牆比較薄⋯⋯』佢話：『我只係想睇電視啫。』哈哈。最終我梗係有配合啦！」

影片截圖

轉戰流行樂壇及擔任《中年好聲音》評判後，Hedy成為網民焦點，雖然有人質疑實力，更多人討論她的身材，Hedy都大方回應：「我覺得每個人都有佢哋發言嘅空間。開始係有少少唔開心，但而家基本上都冇。而家我都會睇，因為有啲comment係有用，有反思嘅空間、進步空間。譬如啲人對我容貌上嘅一啲負面抨擊，好多人都覺得我靚咗好多，咁我贊成嘅，哈哈。講真我細個嘅時候見到啲明星我都有講過呢啲說話，哈哈，報應嚟嘅，哈哈。同埋我自己好清楚㗎嘛，譬如我箍牙箍咗三次，減肥我真係真心減肥，我真係減出嚟，呢件事係好刻意嘅，我唔係天生食唔肥，我食好多嘢，我以前可以食兩個公仔麵！」

影片截圖

講到理想對象，Hedy直言自己「慕強」，最緊要對方善良、有智慧：「我鍾意喺身邊人身上學嘢。」至於外貌？佢笑稱以前男友類型各異，但出現了都會就嘗試一下，相當隨緣。

昔日一眾「新聞女神」罕有世紀合體，瞬間勾起大批網民集體回憶！前TVB主播張文采日前在社交平台分享一張7人大合照，與方健儀、林小珍、麥詩敏、丘靜雯、黃潔慧及余琦琪同框，豪華陣容曝光！

前TVB主播張文采日前在社交平台分享拍攝花絮

7主播大合照，包括張文采、方健儀、林小珍、麥詩敏、丘靜雯、黃潔慧及余琦琪

相片曝光後，不少人都好奇這班來自不同電視台、不同年代的前主播，究竟因何聚首。就連方健儀都忍不住留言笑說：「可以Form一個新聞部！」而林小珍則賣關子留言：「係咩令到我哋走埋一齊？」成功吊起大家胃口。

答案很快揭曉，原來這次聚首並非私人飯局，而是為HOY TV全新真人騷《我要做主播》拍攝。節目由資深藝人陳啟泰夥拍方健儀擔任主持，而張文采則會以導師身份參與，協助培育新一代主播。

張文采分享的照片中，更可見她已現身錄影廠景，提詞機畫面隱約顯示「開電視」字樣，亦間接證實眾人正在為節目進行拍攝及宣傳。

她們為HOY TV全新真人騷《我要做主播》拍攝

事實上，多位昔日新聞主播近年早已各自發展新事業。方健儀經營個人網上節目《女人方言》；林小珍活躍於財經及時事節目；有「最靚主播」之稱的丘靜雯則同時擔任瑜伽導師；余琦琪亦身兼大學講師，大家雖然離開新聞崗位，但仍活躍於不同領域。

林小珍為前無綫新聞財經組首席記者兼主播

丘靜雯曾任Now TV新聞主播

麥詩敏曾是無綫新聞台高級新聞主播

今次7位新聞主播難得同框，不少網民都直言畫面極具份量，更笑稱：「三台主播都齊晒，可以直接開新聞聯播！」新節目尚未播出已經成功炒熱話題，亦令不少觀眾期待這班資深主播會如何培育新一代新聞人才。