星光背後｜吳崇銘King簽約Sony首支個人單曲 親揭C AllStar休團內幕

現年40歲的吳崇銘(King)，於2008年參加私人國「星投大戰」歌唱比賽摘下冠軍後，被安排組成男團C AllStar，於翌年出道走紅。四子同心先後四年成為「叱咤我最喜愛組合大獎」得主，奈何組合於2017年休團，King亦因此離開樂壇五年。近日King重新於音樂出發，為簽約Sony後推出的首支個人單曲《掛念你你好嗎》接受雷霆881商業一台星光背後專訪。節目中，他親解當年C AllStar被迫休團的主因，「因為leader走咗，我哋四個好難夾一件事。」另外，King亦首度剖白在疫情期間的經歷，選擇組織家庭成為人夫及人父的經過。

吳崇銘（King）近日重新於音樂出發。

內地大學音樂系畢業的King自認屬「I型人格」不夠aggressive，談及當年歌唱比賽本應歌手合約只給冠軍，最終他卻被安排與陳健安(On)、梁釗峰及何建曦(Jase)組成C AllStar出道，他稱從沒介意，「其實比賽前我簽過公司出過一首《大雨傾城》，有歌有埋MV，心諗仲唔掂？點知上台零反應之後公司仲無埋，係被潑咗一盆冷水，所以做組合互相照應感覺好啲。」C AllStar第二年已橫掃頒獎禮，2014年更首登紅館開騷，King說：「睇返係好順利，當時一路忙唔覺，收入又OK，原來一直無雨無阻係咁幸福。」King坦承組合成軍前與三隊友互不相識，合作磨擦必定有，「我哋處理拗撬算理智，唔會嘈完散。釗峰同On仔有意見會衝出嚟講，我同Jace比較『I』少少，我會問可唔可以試吓咁？會問O唔OK？無話我一定要咁。我講完就算你話唔OK，我就由佢。」

推出首支個人單曲《掛念你你好嗎》。

C AllStar於2017年高峰突休團，King指與四子拗撬無關，「四個一齊都可以做自己嘢，我無問題，只不過因為阿簡（C AllStar經理人簡敬慈）要移民。講真阿簡好勁，我哋大家各有意見，阿簡做到leader令我哋信服有最後決定。因為leader走咗，我哋四個好難夾一件事，再加上之後我哋簽唔同公司，入行幾年亦有各自想法去做，就分開做。」談決定休團，性格被動的King語帶無奈說：「係有啲不負責任，但無計，佢移民都係為咗小朋友讀書。」King休團後轉做電子音樂成為DJ KING，近五年無推出流行曲，問他會不會羨慕隊友On仔或釗峰近日於樂壇的發展，他說：「我真心恭喜佢哋，羨慕係吃不到的葡萄，我真係無咁諗。On仔係超級努力，好有自己想法，每件事都睇得好緊，包括身材、唱歌點唱同MV點拍，每件事都一絲不苟，成功係有原因，好戥佢開心。」

King親揭C AllStar休團內幕。

C AllStar四子於2022年底曾限定重組開騷，King於演出期間突自爆已婚兼已初為人父，他指太太是疫情期間認識，「當時我做DJ成日打碟，係響私人會所識，之後疫情無嘢做，咪造人，哈！當時亦覺得自己年紀有啲大，係時候生小朋友，唔想阿仔同我年紀相差太遠有代溝。」認識太太之前，King指人生經歷了一場反思，「朋友上、工作上嘅嘢都經歷背叛，感情又會話走就走，我發覺任何人都會離開你，嗰期係好震盪，認為只有家人係可以信任，我唔想將我建立嘅所有嘢消失，就將佢畀晒我個仔，就建立自己嘅家庭。」King指兒子Analog現在三歲，快準備入學，亦指自己成為爸爸後改變很大，會爭取更多時間於家中陪伴兒子成長，但他否認為了生孩子而結婚，「阿仔係最重要，但我亦好愛我太太，佢人品散發出嚟嘅感覺好吸引我，呢個女仔係幾好，識到佢係緣份。」

今日（9月13日），下午二時至三時於雷霆881商業一台播放的《星光背後》，主持人 梁泰來邀得吳崇銘（King）任嘉賓。

KING吳崇銘數年前在演唱會上突然宣布自己成為爸爸，轉眼間成家立室、有了小朋友，人生節奏亦隨之改變。從只需要照顧自己，到學習帶領整個家庭的步伐，KING坦言「一家之主」這個角色並非想像中簡單，而是需要一步步學習與承擔。新歌《一家之主》正正記錄了他走到這個人生階段的心情，為了讓歌曲更真實地呈現自己的角度，KING不但參與演唱，更親自參與填詞、編曲與監製，與不同拍檔反覆討論和分享，希望透過這首歌，表達他守護家庭的信念與責任。

吳崇銘（KING）新歌《一家之主》總結近年感受。

記錄「愛與責任」的掙扎和學習。

伙拍Oscar填詞 當對方做樹窿
在創作歌詞期間，KING和Oscar無所不談，連在婚姻中開心的事和面對的問題都一一分享，在「搵靈感」的同時幫助自己疏理思緒。Oscar先根據KING的故事寫出初稿，KING再加入自己的角度與元素，二人來回討論和修改，才完成現在的版本。KING表示，最初完成歌詞時，只覺得順理成章地說出自己的故事，直到拍攝MV才真正感受到歌詞的力量，發現自己原來未必想得那麼闊：「呢首歌係體驗咗生老病死、甜酸苦辣，好多體驗喺入面。而我都好想自己更真實咁體驗呢份詞，所以我決定自己去演。」

演MV和「囝囝」一拍即合 見「老婆」卻不知所措
這次MV由KING擔仼爸爸，並邀來Kiki和小演員Heyson組成一家三口。KING 笑言自己與Heyson很快就培養出默契：「哇，真係有feel！果然真係做過爸爸，同小朋友嘅溝通完全有效。會明佢諗咩同點解要咁做，當你同佢同步就會知佢想點。」KING更表示原來小朋友都很相似，所以和Heyson一遇上已經一撻即着，感覺自然流露。而在鏡頭背後，二人依然玩過不停，KING不捨地說：「最後我同佢講一定會再見，好似真係多咗個仔咁。」

切身體會歌詞。

親身上陣 MV演技大爆發！

相反，面對Kiki飾演MV中的太太，KING 卻透露第一個心情很尷尬：「死喇，我真係有個老婆㗎喎，依家多咗個老婆，點算呢？」幸好Kiki十分專業，除了配合演出，他亦很快令 KING 重拾信心，放開去演，尤如現實中妻子默默支持丈夫的感覺。KING分享其中最深刻是拍攝孩子出生的一幕，Kiki抱起嬰兒後泣不成聲，嚇得KING連忙安慰她。Kiki表示：「BB望住我嘅眼神好純粹，我個心係一秒溶化咗！」KING補充：「嗰一刻真係好感動，令我諗返起老婆生小朋友嘅時候。」他續說，整個拍攝過程彷彿一次時空交錯，讓他重新回望自己的人生片段。

反思自己 重新理解「一家之主」的真正意思
MV故事由結婚、生兒育女，到為家庭打拼，甚至經歷失去伴侶、父子關係漸漸疏離的階段，KING認為其中最難演的一幕就是「喪妻」。他直言：「真係大吉利是，呸！」但這次拍攝卻讓他提前「體驗」一次，如果家庭只剩下爸爸，會是怎樣的情況。他反思：「我原本以為自己可以做到，但拍嘅時候先發現，其實我無法代替媽媽嘅角色。」KING坦言，失去媽媽的家庭確實會缺少很多，因此亦令他更加理解母親的偉大與不可取代。他續說：「我以前覺得『一家之主』通常指男人，但拍完MV之後先發現，其實一家之主唔係爸爸或者媽媽其中一個，而係兩個人一齊，先可以承擔一個家庭。」

KING反思：「一家之主其實係兩個人一齊承擔。」

《一家之主》不只是KING的個人故事，更是一段關於家庭和責任的記錄。歌曲與MV已經正式推出，想感受KING吳崇銘最真摯的心聲，不妨到各大音樂平台收聽《一家之主》，細味這首充滿人生體會的作品。

相關影片可以按以下畫面觀看：

影片連結：https://www.youtube.com/watch?v=9WXa1DnxtJg