星光背後｜陳樂頤@Beanies親揭家變心結 新歌紀錄療傷路

身兼女團Beanies成員及獨立歌手身份的陳樂頤(阿左)，為今年首支個人單曲《今夜無人入睡》接受雷霆881商業一台《星光背後》專訪。阿左2023年因Beanies出道，誰料五女橫掃新人獎後，今年6月兩成員潘釗彤(Chiutung)及黃健怡(Winky)突然解約離隊，令阿左兩年來，先後經歷妹妹自殺及隊友情不再的打擊。節目中，阿左坦承今年情緒爆煲曾受失眠困擾，她親自作曲的《今夜無人入睡》，正記錄她由情緒低谷到求助治療師重新振作的經歷。阿左希望此曲鼓勵受情緒困擾的同路人外，亦希望與未走出妹妹自殺陰霾的母親溝通，原來經歷家庭巨變後，阿左因誤會與家人曾鬧大交，至今與母親仍未能冰釋前嫌，她哽咽說：「媽咪心結未解開，我係等緊佢……」

女團Beanies成員陳樂頤（阿左）哽咽分享今年推出個人單曲《今夜無人入睡》的背後深意，歌曲不只記錄她因情緒困擾失眠、求助治療師的歷程，更是她欲與母親溝通的橋樑。

阿左去年經歷同母異父妹妹自殺的家變，其後受訪披露事件卻引發家庭衝突。她坦言與母親關係至今未復，「媽咪心結未解開，我係等緊佢。」

Beanies初代五成員均來自「陳輝陽X女聲合唱」團體，現年27歲的阿左，出道前更因參加《全民造星3》殺入30強而為人認識。阿左坦言Beanies出道前與Winky感情最好，「因為我同Winky都係唱女高音，會一齊錄音。對我，Beanies最開心階段唔係攞獎，係頭嗰年五個人好熱血去宣傳，係好齊心！」阿左指退團事件爆出前，她已察覺異樣並與成員們私下溝通，「我話聞唔到味就呃你，佢哋對合約同經理人團隊有意見，但因為合約好個人，我哋三個就最難介入。係好可惜，因為Beanies係五個人嘅事，五個人唱歌同三個人唱，味道都好唔同。」兩姊妹退團後，阿左沒想過仍能與張天穎(Jaime)及李凱翹(Kay)繼續做三人Beanies，現在她與Jaime及Kay溝通多了，反而兩前隊友就變得生疏，「係生疏咗，但我會Say Hi無尷尬，不過之前叱咤記者會真係唔好意思，因為我無戴眼鏡，睇唔到佢哋Say Hi，下次再見，我一定Say Hi。」至於會否感覺少了兩個朋友，她說：「唔係少咗，係On Hold，人生流流長，會換過方式再見。」

節目中，她亦談及隊友離團後與張天穎、李凱翹的三人新階段，並向前隊友隔空喊話：「人生流流長，會換過方式再見。」

現身兼演唱會和音的阿左，唱功與彈琴同樣了得，她坦言自細受任職音樂教師的母親栽培，她形容母親性格與自己同樣剛烈，母親於18歲時誕下她，多年後嫁給現任丈夫亦育有一對子女。雖然阿左與外公外婆同住，但亦與後父一家感情要好，故去年初比她年輕十二的歲的同母異父妹妹突然墮樓身亡，她也是最近靠治療師才慢慢走出陰霾。不過，自去年10月她接受傳媒專訪披露家庭巨變後，亦令她與母親產生磨擦，至今仍未冰釋前嫌，阿左說：「我每次講我嘅經歷，同樣會撩起佢哋嘅痛，上星期爸爸先打電話畀我，亦擔心我係咪賣慘博同情，我係好多謝爸爸而家可以好冷靜好理性同我分析。最初我做咗第一個訪問，全家都好大反應，鬧咗場大交，佢哋直情用失望嚟形容我，而家爸爸狀態好咗，會聽我講，但媽咪心結未解開，我係等緊佢(哽咽)……我想喊添…..而家我已經過度咗，治療師問我有無嬲，有乜好嬲？但我會尷尬，知道媽咪對我好多不滿，希望時間過去會明白我多啲。」

阿左明白由細到大媽咪對她的痛錫，但礙於中國人保守，一聲「多謝」或「我愛你」都未曾宣之於口，她說：「好想同媽咪溝通，經歷呢件事，我先知死亡係我哋處理唔到嘅問題，其他問題都唔係問題。我好感謝媽咪，我今日有嘅音樂修為全因為佢，佢18歲生我嗰時，真係好努力返工，供我讀書同學音樂，畀我都做唔到。」作為情緒問題康復過來人，阿左明白時間同尋求協助的必需，她正等待時機，與至親坦承溝通，助母親走出陰霾。

今日(12月13日)，下午二時至三時於雷霆881商業一台播放的《星光背後》，主持人梁泰來邀得陳樂頤 (阿左) @Beanies任嘉賓。

曾打造謝霆鋒、容祖兒等無數經典，兼一手捧紅Twins成當紅女團的音樂人伍樂城，今年再戰本地樂壇，從其音樂學校選出六位年齡介乎13至16歲的女生，組成全新女團Honey Punch，先後派上兩首作品《蝶式》及《滑到入心》瞄準今年樂壇新人獎。入行30年的伍樂城接受雷霆881商業一台《星光背後》專訪，憶述由學習古典音樂走進流行樂壇變身金牌監製的辛酸外，亦披露當年與初入行的阿Sa、阿嬌合作點滴，伍樂城指：「Twins嘅schedule係痴線！」

伍樂城

於牛頭角下邨一家五口成長的伍樂城，九歲開始學鋼琴，他1990年遠赴美國著名學府伯克利（Berklee College of Music）修讀音樂製作及電影配樂，他坦承五年才完成大學，跟經濟負擔有莫大關連，「因為每一個課程都係錢，譬如一個學期可以讀六科，但我唔夠錢只可以讀兩、三科，就好慢。」為了交學費，伍樂城求學期間兼職過不少工作，「五年我都無返過香港，Waiter、唐人街卡拉OK打碟都做過，最影響我係做Berklee音樂廳嘅帶位，因為所有有名嘅Musician嚟Boston開騷，都會嚟我哋學校，呢份工無得坐係好攰嘅，但乜嘢騷都會睇，譬如音樂劇、Heavy Metal、Jazz，甚至最勁嘅Celine Dion，係令我領略何謂先入為主，好多嘢我以為無乜特別，但表演期間原來玩得好正！」

謝霆鋒唱《無聲彷有聲》表達對愛不後悔。

伍樂城95年回港加入許願星工廠先做《山水有相逢》電影配樂，因而遇上人生兩大伯樂黃偉年及趙增熹，亦因趙增熹96年監製梁漢文的專輯，讓伍樂城寫了首支大熱作《衣櫃裡的男人》，繼而再獲英皇賞識，先後為謝霆鋒監製《無聲彷有聲》、《愛後餘生》、《非走不可》等經典。談及霆鋒給人少說話及火爆的印像，伍樂城說：「我同佢合作無嘢喎，同佢溝通係最簡單直接！最記得《非走不可》，因為佢一邊錄我一邊諗到歌名，最初公司覺得唔吉利唔想用，係霆鋒撐呢個歌名。」亦因霆鋒的成功，英皇亦將未出道的Twins交到伍樂城手上，一批伍氏校園情懷作，順利幫Twins走上當紅偶像階梯，伍樂城說：「好多謝佢哋公司畀我哋好大自由度，無乜理我同填詞人點設計。」由Twins未出道到成名後多張專輯，伍樂城見證二人的辛苦，「佢哋好早已經忙到死，一年等於人哋五、六年，未出道仲好啲，佢哋嘅Schedule係痴線嘅，突然間就話要出，唔係一首歌喎，係一隻碟，好彩係兩個，嚟到一個瞓一陣先，一個叫嘢食錄歌先，所以連我根本都無得瞓，但亦訓練到我無乜問題解決唔到。」

見證Twins痴線時間表。

伍樂城跟四大天王也先後合作過，他承認其中一次夢幻經驗，是監製及灌錄劉德華及梁朝偉合唱的《無間道》，令他登上金像獎頒獎台，摘下2003年金像獎最佳電影原創歌曲。談及獲得為這經典電影創作主題曲的機會，伍樂城自揭要擊敗眾多競爭對手，「我哋寫歌都係靠投稿，我要再次好多謝陳德建先生，當時佢處理晒劉德華先生嘅電影，好記得當時我食緊飯，求其問佢要唔要歌，佢話有套電影，故事係：『兵就係賊，賊就係兵！』就係咁多，我就即刻諗到Intro，仲即時喺餐廳攞張紙巾寫喺上面，其實我寫好多歌都係同人食緊飯，《風箏與風》都係咁寫出嚟。最後好好笑，陳德建話恭喜我，佢哋最後揀咗兩首，其中一首係我，咁仲慘，我嗰陣幾日都瞓唔著，End Up中咗，係好開心。」

今日(12月6日)，下午二時至三時於雷霆881商業一台播放的《星光背後》，主持人梁泰來邀得伍樂城任嘉賓。