香港民主兩個元老李馬丁和陳四萬到美國華府，見了副總統拜登，雖然拜登只是以「路過」方式見他們20分鐘，但呢種「路過」會晤不是真正的路過，是一早安排好的，只是用「路過」方式顯示這是非正式會晤。
正式外交會晤有對等的考慮，即使香港特首，只是一個地區首長，連國家元首都不是，自然見不到美國正、副總統，更何況李馬丁和陳四萬一個是退休香港政黨主席、一個是退休特區高官，即使仍在位時正式訪問也遠未夠級數去正式見美國正副總統，何況退休之後? 所以即使會晤，也只能用「路過」這種非正式方式。
不過縱使係非正式，兩個香港泛民的元老(陳太應該當她是泛民啩)得到美國副總統咁高規格接見，唔可以話美國唔重視啦。不過美國重視係是否好事又另作別論啦。
兩個泛民元老要見美國副總統，當然不是上星期一打個電話，話「我地得閒週末去美國遊一遊，唔該搵個副總統見吓我地」咁隨意。無論是兩老主催生會晤，抑或美方主動，都要一頭半個月去安排，咁就睇出一點事情的脈胳。
上月中國開人大，中央港澳工作協調小組組長張德江強硬發言，事後泛民無乜大反應，好靜。過咗一陣，阿爺仲話叫全體立法會議員去上海對話。接著傳出李馬丁和陳日君樞機「唔係好順」，同民主黨等泛民議員講，話「你地對阿爺太聽話啦，上海唔應該去，應該上街絕食爭普選，要搞激啲至得」。接下來泛民急急腳搞咗個絕食出來。
絕食單嘢事前醞釀不夠，有少少交差味道，社會反應一般。但原來與此同時，泛民兩老已搞緊去美國見拜登。咁樣「唔好去上海、要上街絕食、去美國見拜登」，咪可以一條線串起來? 泛民兩老見到拜登時，可以墟墟冚冚，講好多嘢囉。
不過有個政界中人問起，泛民議員去不去上海，要黨內外傾這麼多次，要向各方交待。但泛民兩老去美國見副總統，事先有無問過其他泛民政黨同唔同意佢地去? 他們是否代表香港人講嘢? 嘩，這些問題好深，要搵當事人答好啲。
盧永雄
政府昨日建議延長公務員退休，將新入職公務員退休年齡，由60歲延至65歲。而現職公務人員的退休年齡，可自行申請，有酌情放寛之意。
環顧世界，延長公務員退休年齡，已經係大勢所趨，除了講得好好聽的人的壽命延長因素外，主要目的係慳錢。法國政府去年就公布延後公務員退休時間兩年，好多國家甚至係食終生的「全包宴」。但政府改例讓公務員遲幾年退休，政府就可以少請幾年的新人代替，年中慳番唔少。睇全球大數，由1989年至2009年的20年間，有65個國家提高了退休年齡；男性平均退休年齡由1989年的60.01歲提升至2009年的61.01歲，提高了１歲；女性由57.87歲提升至59.38歲，提高了1.51歲。
不過香港政府好似怕俾公務員鬧係「守財奴」，所以沒有來個一刀切逼所有公務員延長退休年齡，只係新入職公務員劃一推後退休，現職公務員則按個別情況，彈性處理。這種做法，想早早咬糧的公僕仍可咬糧，政府慳錢效果唔會好大。對於現職公務員，只是多了一個可以做耐啲嘅選擇，何樂而不為呢。部份公務員工會指延長退休要每年再批的做法，可能鼓勵「馬房文化」，但反彈聲音唔大，可見大體上公務員都會歡迎政府這個建議。
新政策慳錢效果不彰，但政府仍然提出，除了為長遠將來打算外，背後別有深意。第一個係用錢買人材。近期聽到唔少聲音，話唔少部門話領導人材青黃不接，好多高級公務員一早選咗舊制，到55歲就退休，走得人多就無人可用。此新政策可延長有才能公務員的留任時間，可以話政府係用錢買人材。
第二個作用主要係針對退休高官轉職私人企業的問題。現今世代，人比以前長壽好多，50幾、60歲仍然精力充沛，好多政府高官退休後，仍想繼續工作搵真銀。過去媒體爆出唔少高官過咗「冷河」，就去私人企業當高管，被公眾質疑這些高官有接受延後利益之嫌，政府被批為監管不嚴。
政府今次的做法，可以延長政府高官的服務時間，有心有力又想再搵幾年錢的高官，可申請留任，做多幾年至走，咁按道理到真退休時都唔使再搵咁多喇啩。照常理推斷，政府順利行新制後，下一步可收緊離職高官轉職私人企業，減少俾人鬧「官商勾結」，咁都唔係壞事。
盧永雄
