93年17歲參選港姐入行，曾是一代性感女神的麥家琪，於06年下嫁大律師王國豪後淡出娛圈。育有兩子一女的麥家琪，為事隔17年復出客串的港劇《我愛九龍城》接受雷霆881商業一台《星光背後》專訪。節目中，率直的麥家琪無所不談，談半百保養得宜，她直認靠醫美，「好似修一修咁，箍牙都係一樣！」談及多年沒拍劇，她坦言：「只係無人搵，啲人以為我嫁咗唔憂。」以為她會避談當年選美決賽被爆裸照大熱倒灶，她說，「啲相我仲keep喺度，全部都俾晒仔女睇！」原來，她希望以過來人身份，教育三子女別行錯自己的舊路，學懂如何保護自己。
麥家琪上《星光背後》接受主持人梁泰來訪問
麥家琪當年是新法書院校花，她坦承年輕任性，談及她中學未畢業便選港姐，她說：「真係focus唔到讀書，唔想考試，無諗名利，只想快啲離開呢個學校束縛。」93年參選期間，麥家琪一直是熱門之一，最終決賽五強不入，翌日就有周刊爆她15歲時被前男友誘騙拍下的裸照。對於當年事件轟動全城，她認同落選與事件有關，並說：「呢個經歷到而家都影響我，所以我好保護我啲小朋友，我同佢哋講晒成件事，啲相我仲keep喺度，全部都畀晒仔女睇！等佢哋知有可能發生呢啲事，就係因為我曾經任性。所以你哋點玩都得，但有啲嘢我試過，會對日後有影響，你哋要學識保護自己。」
當時還未到18歲，麥家琪稱不懂如何面對，幸得父母體諒保護，亦獲TVB給予機會簽約安排演出處境劇洗底捱過低谷。憶及當時背負新聞入行，她指沒想過逃避：「我必需面對，因為係自己犯嘅錯！其實我都係畀人搵笨，但無影響其他人，只係我年幼無知畀人呃。點解繼續留低？我咁想離開讀書呢個束縛，我可以去邊？係我自己放棄學業，唔通我要求出國讀書？屋企唔富裕，有三兄弟姊妹，哥哥啱啱去咗加拿大讀書，如果我再要求，爸爸媽媽會好辛苦。」
麥家琪一入行便影視兩忙，原來她至參選翌年才獲TVB簽下為期兩年的包薪經理人約，至於為何96年便決心離巢，她說：「96年後要我簽返普通藝員約，人工少咗三分之二，我就話唔簽。我就係唔忍得，如果我忍到六、七千蚊一個月，我可能忍到而家都留喺TVB，做埋甘草演員。」之後隻身勇闖影圈，麥家琪指已故的李兆基是其恩人，給與她不少電影機會，當中包括話題作，麥家琪剃光頭主演的《龍虎砵蘭街》。問為何多年來不找經理人合作，麥家琪大爆鮮為人知的際遇，「有offer，但全部都要我脫，譬如要我拍三部脫戲就簽你，話會打成你好似邊個邊個咁，但我唔係想要呢啲，我唔想麥家琪打敗麥家琪！我咁辛苦入電視台幾年，就係想大家知，當時嘅新聞唔係我策劃，我真係畀人陷害，事隔三年仲要我食住條水去拍嗰啲戲，我咪變咗大家諗嗰啲人？做人要有價值，剃光頭有發揮就有價值。96年我仲算新人，嚿錢有幾多？壓得就壓啦！仲畀我93年出嚟撩我拍三級片仲少一半。」原來早於93年選完港姐後，已有片商高價利誘麥家琪拍三級片，但她不為所動，「當年已經有人叫我唔好簽TVB出嚟拍戲，嗰時風月片咁hit，係畀成過百萬，我係不為所動，因為件事唔係我想咁發生！」至於從未全裸或 露點拍戲就被外間標籤成三級片女星，她淡淡的說：「唔無奈！邊個叫我細個任性呢？」
1985年15歲參加《歡樂今宵》模仿葉蒨文大賽入行的陳松伶(松松)，91年憑《天涯歌女》一劇飾演金嗓子周璇爆紅全港，唱片更大賣六白金。惟松松的半生儼如周璇般坎坷，因堅持學業與家人爆出誤會，導致不相往來20年。之後又與長期工作夥伴反目，最終身無分文離港。慶幸松松於05年在上海拍劇認識比她少9歲的內地演員張鐸，令這位天涯歌女定居北京不再漂泊。陳松伶為40周年企劃推出新歌《松伶》，並接受雷霆881商業一台《星光背後》專訪。節目中，松松憶述半生受盡打擊，曾跌入情緒低谷，慶幸認識老公重整人生，明白人生的苦難都是花開有時。
陳松伶憑《天涯歌女》爆紅，卻因學業與家人誤會決裂，更曾與工作夥伴反目，一度身無分文離港。
松松直認由陳少琪填詞的《松伶》如同她的自傳，當中一句「人未長高，已看懂人生」就像當年在家貧的情況下要邊讀書邊拍劇以幫補家計。松松與家人之間產生誤會多年，有指與她當年拒絕放棄學業有關，問她年輕時為何如此堅持讀書，她說：「唱歌拍戲都係被人安排，唔係由我控制。但讀書我可以主導，努力讀就考得好。」與家人誤會多年後，松松再與合作多年的工作夥伴反目，爆出是非，促使她心淡離港。「二零零幾年出咗啲事，我係心灰意冷，成個人失去重心，總之我想離開呢個是非地，當時好混亂，覺得自己嘅無能，但我都要生活，就去上海拍劇，亦喺上海認識我先生。」未認識老公及未與家人和好如初前，松松感謝今天的經理人陳淑芬於05年最黑暗期間向她伸出援手，給予她工作機會。「爸爸同外公先後在05、06年去世，嗰時我最崩潰。好彩《雪狼湖》喺國內巡演，陳太叫我幫手，期間我無返過香港，唔需要接觸傳媒可以休息。陳太的確係扶起我嘅人，佢其實知道我發生咗咩事，但從未問過，我亦一句都無講。總之發生了一啲事，佢一直俾咗一個空間我，令我仲可以有收入支撐自己，我唔會喺佢面前講，但佢呢40年來一直係我嘅恩人，我哋心知肚明。」
陳松伶將於2月28日在伊利沙伯體育館舉行演唱會。
陳松伶婚前檢查發現無法生育，曾主動退讓，老公卻堅定選擇共度餘生，令她感動稱幸遇良伴。
當年松松跟不少還未爆紅的男神，包括黎明、鄭伊健、古天樂、張智霖等合作，之後他們個個彈起，問她為何不曾仰慕過對手，她回答：「當時佢哋個個都有女朋友嘛。」至於06年能在上海與老公張鐸合作內地劇《血未冷》修成正果，松松說：「最重要係佢單身。擦出火花係套劇快拍完時，我一直以為佢年紀比我大，當我知佢細我九年，基本上我就話算啦，唔好啦，反正又未真正有深感情，但佢鍥而不捨地跟我話：『未試過，點知？』當我哋相處幾年後，係OK，佢用行動證明佢所講，佢比我更冷靜，可以梳理我情緒，講出我嘅問題。我亦唔係要對方完全聽我話嗰種人，而佢亦需要我呢種女朋友。」
松松指二人於07年開始拍拖，她用了4年時間觀察及磨合這段文化差異很大的關係是否適合更進一步結婚。「佢極北方，我係印尼華僑極南，譬如佢成日講『胡說』我都以為佢鬧我，但只不過係口頭禪。」至於夫妻二人曾否計劃生下一代，她說：「有呀！梗係想啦！但當我哋準備結婚做婚前檢查，就發現我係唔可以生小朋友。」松松直認這亦是她作為人妻的一個遺憾，「會係一個遺憾，當時一知結果，我已經同佢講，你仲有好多選擇。係！我又第二次落閘，因為都要為佢著想，但佢話：『我就係要我哋結婚。』之後甚至話：『我都可以唔鍾意小朋友！』哈！其實佢都鍾意小朋友，我真係覺得我識到一個好好嘅伴侶。」
陳松伶接受《星光背後》節目主持梁泰來訪問。
