草蜢《老的辣》MV如時裝騷腹肌放題轉到頭暈蔡一傑化身「DJ Remus」重出江湖

娛圈事

草蜢《老的辣》MV如時裝騷腹肌放題轉到頭暈蔡一傑化身「DJ Remus」重出江湖

2025年12月18日 16:30 最後更新：16:48

草蜢成軍40周年紀念企劃由新歌《老的辣》揭開序幕，精心炮製的「特濃草蜢式」MV昨晚上架，除了招牌勁歌熱舞，還有海量靚衫和腹肌放題，而且蔡一傑發放隱藏大招，「DJ Remus」重出江湖首次亮相MV打碟，驚喜滿滿。

點擊看圖輯

草蜢推出新歌《老的辣》。

MV圖片

蔡一傑首次在MV以「DJ Remus」身份表演打碟。

MV圖片

草蜢這次與年紀輕輕的新導演及團隊合作。

MV圖片

觀看相關影片按連結：https://youtu.be/WKTq07rRZZg

新歌《老的辣》由蔡一傑作曲、黃偉文填詞、何秉舜編曲，並與蔡一傑聯合監製。相隔7年再拍新歌MV，草蜢加操練歌和健身，帶幾個行李箱的服飾上陣。蔡一傑說：「好耐冇拍MV，平時買買埋埋咁多靚衫，今次要傾巢而出。」蘇志威笑指導演吩咐每人準備3套衫拍攝，結果他們每人帶了13套衫到場。珠片、皮革、綑綁、窩釘、低腰、長褸等，MV仿如時裝騷，令人目不暇給。

期間草蜢站在自轉舞台上唱歌跳舞，來來回回轉了半小時後表示暈陀陀。蔡一智說：「看似簡單嘅鏡頭其實好難，要有好好嘅core muscles（核心肌群）先至可以做到動作。」蔡一傑補充：「因為周圍漆黑一片咁樣旋轉，視線冇焦點，仲要跳舞，真係好難。所以做人最緊要『有焦點』！」還風騷表示是日焦點就在腰間他們的腹肌上。

蔡一傑的焦點除了弗爆身材，還有他首次在MV以「DJ Remus」身份表演打碟，配合燈光，帶動全場氣氛，台前幕後都起哄吶喊。蔡一智說：「其實好多人都唔知道蔡一傑其實係一名DJ，咁多年來我哋都冇褒獎過佢。（傑：係呀！）所以喺今次MV我哋就特別畀個焦點佢，蔡一傑以DJ身份上台表演，讓觀眾見到佢嘅另一個Talent。」蘇志威表示這是他與蔡一智主動向導演要求加入，蔡一傑聞言驚喜並甜笑。

蔡一傑說：「其實好多年前我已經開始打碟，好多人都唔知我係專業嘅DJ，今次MV 我重出江湖，將來演唱會after party，我都可以打碟，大家一齊玩！」身旁蔡一智乘機賣廣告拉生意，笑說：「生日、結婚、開party都可以叫蔡一傑嚟打碟，打畀我就會安排佢到會。嗱，我哋依家一條龍服務，打呢個電話搵我。」全場大笑。

這次草蜢與年紀輕輕的新導演及團隊合作，蔡一傑爆與導演搞笑對話：「今朝導演問我嚟過嘉龍片場拍嘢未？我同佢講，我哋30年前已經嚟拍嘢，但佢30年前未出世，哈哈！其實今次真係好開心同新導演、攝影師合作，成個團隊都好年輕，好有活力。」蘇志威認同：「新導演和攝影師有好多諗法，年輕嘅步伐，令到MV出嚟效果好突破。」

現場拍攝氣氛很好，充滿活力，蔡一智透露：「導演和攝影師都好錫我，拍完每個鏡頭，跳完每一段舞都有掌聲，好大鼓舞，好感動！」蔡一傑更表示與導演好合拍，「導演話我哋一埋位就知佢想要乜，交足貨，唔使佢講解太多，好順利。」

拍攝期間發生小意外，「行兇者」蔡一智現身說法：「有一場我揸住咪線係咁揈，好有型架，點知揈揈吓飛咗支咪出去，幾乎擲到人。」蘇志威笑指：「咪同你當年台上飛鞋底一樣？！」蔡一智翻眼：「唔好講遠古嘅嘢啦！我頭先真係好驚，好彩支咪乖乖落地！」他笑言fans萬勿錯過揈咪鏡頭。

稍後，草蜢將於聖誕節期間在馬來西亞、明年一月在廣州舉行「RE：GRASSHOPPER」世界巡迴演唱會壓軸兩站，之後立即投入40周年企劃專輯，以及明年4月香港紅館舉行全新草蜢演唱會。蔡一智預告新專輯將有別過往，會有很多驚喜，令人期待。

往下看更多文章

草蜢40周年世巡首站特選新加坡紀念恩師梅艷芳預告大馬站有驚喜申請中

草蜢「GRASSHOPPER THREE IN LOVE CONCERT草蜢演唱會2026」新加坡站，上周末（6月20日）於新加坡室內體育館順利完成，全場爆滿，座無虛席。草蜢表示特別將40周年世界巡迴演唱會海外首站選在新加坡，因為恩師梅艷芳第一次帶他們出埠演唱就是新加坡，意義重大。更驚喜是台下有Fans當年有入場睇梅姐演唱會，見證草蜢1986年處男登台！

阿智台上說：「我哋草蜢世界巡迴嘅第一站要揀新加坡，因為呢度對我哋三個好有淵源，我哋第一次跟梅姐出埠，就係嚟新加坡！」全場歡呼。傑仔問：「邊個1986年有嚟睇梅艷芳演唱會？」台下有Fans舉手，草蜢好驚喜。阿智說：「沒有梅艷芳就沒有草蜢，所以我哋想將呢個舞台獻俾我哋嘅師傅梅艷芳，多謝佢當年帶我哋嚟到新加坡認識大家，我哋要搵返我哋嘅初心，多謝你哋支持草蜢40年！」

蘇志威說：「好多謝你哋一知道我哋要嚟開演唱會，第一時間買飛，好早就賣爆晒，多謝你哋嘅支持，為我哋世界巡迴打咗第一支強心針！」觀眾反應非常熱情，完場後樂隊已退場、觀眾席開了燈，仍不肯離開，大嗌encore。草蜢一邊戴耳機一邊行返上舞台，阿智說：「你哋仲唔走？啲歌真係唱晒啦！」傑少說：「Band都走晒喎！」阿智說：「我哋下一站去馬來西亞，你哋掛住我哋就嚟啦！」然後他們演唱《暫停．開始過》，並向所有Fans揮手道別。

演出後草蜢接受訪問，阿智說：「真係非常、非常、非常多謝新加坡嘅Fans，好熱情！40年前梅姐帶我哋第一次到海外登台就係新加坡，20歲仔人生第一次搭飛機，所以我哋對新加坡有情意結，私心要揀返呢度做40周年演唱會嘅巡唱第一站。剛才有Fans舉手話86年有睇梅艷芳演唱會，睇過我哋表演，真係毛管戙啊！」

雖說新加坡觀眾比較內斂，但草蜢的Fans特別熱情，阿智說：「好少會開晒大燈都唔走，呢啲『真encore』，盛情難卻，其實我哋三個都唔捨得走！現場澎湃嘅歡呼聲，好似喺球場睇『世界盃』比賽咁勁！」

傑少表示開心見到來自世界各地Fans專程飛到新加坡捧場，「好多Fans睇過香港站演唱會話正，話要再睇，特登飛嚟睇！」阿智說：「佢哋就醒目啦，香港紅館四面台，嚟到新加坡三面台係有另一種感覺，感受到製作團隊嘅心思，不一樣嘅震撼！」蘇志威說：「好多朋友話睇完今晚新加坡站想繼續睇，咁就要撲馬來西亞站嘅門票。」

除了草蜢演唱會「傳統」與觀眾玩人浪，今次新加坡站加設觀眾傳波波遊戲，全場玩得勁開心，氣氛超好。阿智笑說：「知道好多Fans平時讀書、返工，冇時間做運動，所以加咗『碰碰波』遊戲，掂到個波嘅Fans都得到草蜢嘅愛。至於馬來西亞站都有新花臣，依家申請緊，希望成功，大家到時感受一下我哋為大家準備嘅心意！」而香港演唱會的「情歌盲盒」環節亦帶到巡唱，每晚不同驚喜，今次新加坡站演唱《我們都是這樣失戀的》和《永遠愛着你》。

傑少透露前一晚綵排後去食宵夜，遇到一位廿四孝媽咪，她見到草蜢後即通知兩個囝囝飛車趕到大排檔見偶像，他們表示因為撲飛失敗，無緣入場感可惜，好彩場外偶遇，更得到草蜢在他們的tee上簽名留念，非常開心。阿智揚言在新加坡食到超好味海南雞飯，期待馬來西亞食肉骨茶和榴槤。

你或有興趣的文章

草蜢《老的辣》MV如時裝騷 腹肌放題轉到頭暈 蔡一傑化身「DJ Remus」重出江湖