馮穎琪（Vicky Fung）一手包辦曲詞兼主唱的新作《來回》重磅登場！醞釀五年，以全新形象回歸，並記錄內在的成長與進化之作，她不再是鎂光燈下的藝術家、音樂監製、經理人與創作人，而是更輕盈與自在的馮穎琪！
英國錄音照
多年來，Vicky 以獨特的個人風格，推動着本地音樂與藝術文化，在大眾眼中的她專業且有個性，其實她與所有人一樣，也是別人的女兒、母親，一個女人的身份。《彳亍》是眾多作品中馮穎琪最喜愛的代表作，她一直問自己：「彳亍之後，然後怎樣？」期間仍然寫歌、仍然創作的她，驀然發現自己背負着很多角色，卻甚少回到自己。
宜蘭錄音照
馮穎琪打造全新形象為年度企劃揭幕：「原來只要放下一啲執着...都可以生成一啲比原來更多、更好嘅可能性。」直到兩、三年前，Vicky重新走進校園修讀碩士學位，再到英國深造，更獲得Coaching（導引學）資格成為人生導師：「喺學習入面，我重新了解自問鍾意啲乜、我想做咩人、我想做嘅藝術係咩，亦都發現咗自己有好多恐懼，驚人哋唔明白、唔理解。我明白到，原來只要放下一啲執着，坦誠去讓人了解我嘅想法，唔執着於點樣嘅結果，容許所有嘢發生，都可以生成一啲比原來更多、更好嘅可能性。所以無論喺形象、音樂而至我所有創作出嚟嘅嘢，都係用緊呢個基礎，所以Coaching喺呢件事上面，扮演咗好重要嘅角色。」
馮穎琪（Vicky Fung）
Coaching帶給Vicky的，遠遠不止一個專業資格，更重要是學會聆聽別人：「嗰時我先意識到，一直以來，我哋以為自己聽咗，其實未必真係聆聽對方，好多時只係將自己覺得點，我嘅意見、想法，好似為咗對方好，好快衝出嚟畀建議，但係Coaching係必須要好好聆聽再提問，一個適合嘅問題，可以幫對方打開更多嘅門。」
打造全新形象為年度企劃揭幕
為了與樂迷分享這個發掘自己的過程，Vicky 卸下以往「斯文正經」的形象，剪了帶點清爽又有個性的短髮、穿上寬鬆自在的飄逸長裙，拍下全新的造型照。音樂方面，新作《來回》不再沿用既有的方式呈現，而是一條視覺化片段（Visualizer）：「佢唔似一個平常有故事性嘅MV，我想大家享受呢首歌嘅同時，面前有一個可以讓佢哋進入思考嘅一個空間，回憶人生走咗邊段路，呢個旅程又有咩值得去回味，亦都可以提醒自己，原來已經成長咗。」
《來來回回聽來回》活動照片
Vicky 日前於西九文化區戲曲中心舉辦『非線性對話』之「來來回回聽來回」活動，更邀請同樣已獲得Coaching資格的謝茜嘉當嘉賓，親身引導樂迷：「呢次係用Coaching嘅引導方式，同大家分享《來回》嘅同時，感受吓自己，好開心睇到大家嘅分享，每個人都好投入。」
《來來回回聽來回》活動照片
赴宜蘭製作新歌後遇失聲令錄音推遲 將推出籌備五年黑膠碟專輯《覺色》及西九音樂會
新歌《來回》是她今年整個計劃中的開端，Vicky說：「我會造一隻黑膠碟專輯《覺色》，當中會收錄我呢五年創作嘅音樂，嗰時有啲錄咗但未出街嘅。」Vicky整個企劃也是「非線性」發展，去年5月已經開始籌備，已經在英國灌錄了幾首歌，也已經在阿姆斯特丹拍攝唱片封套照片，到了9月終於落實在宜蘭錄《來回》。「我仲邀請咗一位巴黎藝術家朋友專程為畫黑膠封套封面，連album cover都係來來回回傾咗起碼9個月，成個Album有好多細節位。」她透露去年年底失聲兩個月，延遲了錄音的部分：「而家已經完成晒，預計專輯三、四月會正式預售，啱啱仲推出咗《覺色大盒》早鳥Package畀大家，當中最正嘅應該係...我可以為大家寫歌嘅package，呢個package得一個名額㗎咋，仲有我一對一Coaching嘅選項！當然唔少得有《覺色》音樂會門票、黑膠碟，亦都有專輯封面限量藝術書籤套裝、《來回》襪，同埋由我develop嘅『覺骰』self-care 對話遊戲等。」
《來來回回聽來回》活動照片
Vicky 預告今年5月3日將舉行個人音樂會，脫胎換骨，與樂迷共享一場深刻的音樂之旅。
馮穎琪（Vicky）的年度音樂企劃《覺色 MYCOREALITY》，一直構思舉辦不同形式的音樂導賞活動，繼5月的音樂會後，同名黑膠專輯已於早前推出，為更具體化呈現當中的世界觀，Vicky選址以故事和療癒為主題、位於西營盤的藝文空間 ztoryhome ，於11月2日至8日舉辦一連七日的「MYCOREALITY Living Room：馮穎琪的《覺色》靈感探索室」展覽，廣邀樂迷實地感受用音樂作為橋樑的自我探索之旅。
馮穎琪（Vicky）年度音樂企劃《覺色 MYCOREALITY》將於11月2至8日假西營盤ztoryhome舉辦「MYCOREALITY Living Room：馮穎琪的《覺色》靈感探索室」，免費入場。
從「放不低」到「覺知本色」：音樂跨越界限 以菇菌看透多重實相
全新黑膠專輯《覺色 MYCOREALITY》結合 Vicky 過去30年的生活歷程，從 1996年寫下鄭秀文（Sammi) 的《放不低》開始，漸漸學會放下執着，以不同的角色前行。她說：「覺色聽落同『角色』好似，當中嘅『覺』意指覺知靈魂本色，我希望透過音樂發展成唔同嘅活動，讓大家重新感受、了解自己靈魂嘅多重色彩同光芒。」她指 MYCOREALITY包含「我的多重實相」的意思， 其實也是結合「Mycology」（真菌學）和「Reality」組成的新字，揭露專輯的軸心概念：「在過去幾年的學習，我受到菇菌生物結構同生長形態啟發，對自我有全新嘅理解同認知，咁啱呢兩個字組合起嚟，又有多一層意義 。所以今次嘅展覽，特別設有菇菌種植區，畀大家見證佢嘅自然生長同蔓延。」
展覽結合音樂與藝術，呈現她由1996年創作鄭秀文《放不低》至今30年歷程，並以菇菌生態啟發自我認知。
Vicky透露近年愛上種植菇菌，從中領悟萬物生長與自我多重面向。
Vicky表示不希望單純推出新專輯，而是以此作為延伸的起點，讓樂迷不單純有音樂體驗，更是整個靈魂與自我的觸動：「今次展覽，大家可以試聽我嘅黑膠之外，仲可以近距離欣賞藝術家吳民樂同我一齊創作超過9個月嘅 Cover Art 原畫，仲有成張專輯同埋歌曲背後嘅靈感來源。」《覺色 MYCOREALITY》的音樂製作跨越5個城市、橫跨超過6年，從香港到倫敦、阿姆斯特丹、巴黎、台北至宜蘭，收錄多首 她重新演繹、為其他歌手創作的音樂以及近年新作，當中有不少來自書本、相片、音樂歌單到各種日常物與菇菌，Vicky笑謂：「大家可以喺展覽了解當中嘅脈絡同細節，會睇到我好多唔同嘅面向同想法，感覺都幾赤裸。大家都可以喺 Reflection Corner 嘅引導下同自己對話、聆聽內心的聲音，放低最私密嘅自己。」
《覺色 MYCOREALITY》黑膠專輯封面
期間限定！Vicky 駐場交流與深度「Deep Listening」工作坊
Vicky亦會於11月4、5兩日親自駐場，與樂迷聊天、閱讀及拼圖，互相交流。身為生命導師（Life Coach）的她，當然不少得與樂迷來一場集體引導，感受引導學（Coaching）的意義：「我會舉辦一場『《覺色》讓我明白「角色」：Deep Listening & Coaching Experience』嘅活動，讓參與者喺專輯入面嘅音樂反映自己角色有關嘅內容，深入聆聽同剖析，跳出平日嘅限制，重新探索自己嘅內心。」
《覺色 MYCOREALITY》黑膠設計
五大亮點包括Lokz Phoenix原畫真跡、高音質黑膠試聽、靈感來源私房展出、菇菌種植區及Reflection Corner自我對話。
展覽五大亮點：獨家原畫、黑膠試聽與現場菇菌蔓延
「Living Room」作為 Vicky 創作藝術的延伸，現場將展示豐富的靈感脈絡與細節，精采內容包括：
- Lokz Phoenix Cover Art 原畫真跡：居法香港藝術家吳民樂（Lokz Phoenix）將菇菌與森林意象結合，繪出土壤下肉眼不可見的菌絲系統，象徵每個人隱藏的多重面向。此完整作品真跡僅限現場展出。
- 高音質黑膠沉浸式試聽：由英京贊助黑膠唱盤及音響，讓觀眾以極致音質還原享受《覺色 MYCOREALITY》黑膠專輯。
- 靈感來源私房展出：現場展示啟發 Vicky 創作的書本、相片、音樂歌單、日常物件以至菇菌樣本，脈絡一目了然。
- 生命力現場見證：展覽特別設置菇菌種植區，觀眾可親眼見證菇菌隨時間自然生長與蔓延的生命痕跡。
- Reflection Corner 自我對話：提供專屬空間與引導，讓參觀者在音樂與藝術的陪伴下聆聽內心聲音。
Vicky將於11月4及5日駐場交流，11月7日舉行Deep Listening & Coaching Experience工作坊，收費$333，需事先登記。
《MYCOREALITY Living Room：馮穎琪的《覺色》靈感探索室》
音樂 x 藝術展覽
日期：11月2-8日
時間：11月2日（下午1至6時）；11月3至8日（上午9時至下午6時）
地點：ztoryhome
地址：西環西營盤皇后大道西118號1樓
費用全免
*Vicky 特別駐場日（免費入場）
日期：11 月 4 日（二）及 11 月 5 日（三）
時間：下午 3 時至 6 時
內容：Vicky 將親自駐場，邀請參觀者一同翻書、砌拼圖、輕鬆聊天，讓思緒自由流淌。
《覺色》讓我明白「角色」：Deep Listening & Coaching Experience
日期：11月7日
時間：下午3至5時
收費：$333（需事先登記）
登記：https://forms.gle/adWvemcyXNSHtSZ19
