《夜王》2.17大年初一公映子華信心滿滿誓要「開大」 Sammi大爆第一次見子華「赤身露體」

萬眾矚目的馬年賀歲片霸《夜王》，2月5日晚假座「澳門銀河」綜合度假城東翼大堂舉行世界首映禮。安樂影片有限公司總裁兼《夜王》監製江志強、銀河娛樂集團主席呂耀東，聯同導演吳煒倫以及主角黃子華、鄭秀文、王丹妮、廖子妤、謝君豪、盧鎮業出席典禮，並與在場觀眾分享拍攝趣事，陣容鼎盛，星光熠熠。

馬年賀歲片霸《夜王》

馬年賀歲片霸《夜王》

安樂影片公司總裁兼《夜王》監製江志強，感謝銀河娛樂集團主席呂耀東的鼎力支持，並正式公布喜訊：「《夜王》將會喺2月 17號大年初一，喺香港、澳門正式上映 ，相信電影能夠帶俾大家好開心嘅兩個多小時，亦希望未來有機會返嚟澳門拍戲！」吳煒倫導演（Jack）最滿意子華與Sammi在酒店房間的一幕對手戲，同樣熱烈期望能再到澳門拍戲，導演說：「今日返嚟，我直頭想喺度開多部戲，至於係咪《夜王》續集？就要睇下大家對《夜王》有幾支持喇！」

《夜王》將會於2月 17號大年初一在香港、澳門正式上映

《夜王》將會於2月 17號大年初一在香港、澳門正式上映

導演所言，子華甚有同感：「啱啱阿Jack講嗰一場真係好深刻，我記得當日拍攝間房有好多人喺裏面，而我喺嗰個沖涼缸坐得好舒服、好嘆吓！」戲中子華與Sammi另有一幕精彩賭場戲，今晚重臨舊地，子華大呼奇妙：「我哋而家喺呢度做《夜王》世界首映，感覺好似我行咗埋去百家樂枱，後面有成百幾人圍住，我而家搣緊嗰隻牌，大家一齊幫我嗌『開大』！對呢套戲，我而家充滿信心！」

馬年賀歲片霸《夜王》

馬年賀歲片霸《夜王》

據Sammi所知，這間酒店房剛裝修完成，立即借出讓劇組取景，令她深感榮幸：「成間房唔單止舒服，顏色配搭同用料都相當華麗，好期待睇到呢個畫面！」Sammi更忍不住大爆：「最深刻係第一次見到子華赤身露體，個body都好ok！」子華搞笑回應：「 我可能係『銀河』最唔道德嗰個人，我喺條走廊冇著衫行咗好耐，第二啲人係唔可以嘅！」

馬年賀歲片霸《夜王》

馬年賀歲片霸《夜王》

《夜王》另外兩對人氣CP——王丹妮與（Louise）盧鎮業（小野）、謝君豪與廖子妤（Fish）皆盛裝出席首映禮，Louise分享拍攝時的難得體驗：「其實我都係人生第一次可以入到貴賓廳賭錢，仲要太子峰（小野）俾我一鋪成千萬咁樣『對』出去，好開心！」小野表示，賭場實景拍攝絕對有助投入角色：「因為嗰個空間，會令我覺得角色真係一個幾有背景嘅人士，好容易就代入到！」首次出席《夜王》宣傳活動的謝君豪，表現相當雀躍，豪哥說：「現場氣氛令我感覺好開心、好 high，希望大家鍾意呢部電影！」Fish置身現場，則有氣派十足之感：「今日落車嘅時候，見到《夜王》海報同埋預告喺呢度播放，同呢度金碧輝煌嘅裝修非常之夾！」

電影公司正式發放《夜王》最新海報及終極預告，講述華麗璀璨的東日夜總會表面紙醉金迷，暗地裡卻正面臨前所未有的存亡危機，正如歡哥黃子華在終極預告中勉勵下屬所言：「世界艱難，但係我哋冇驚過……東日仲可以玩幾耐，冇人知，但係如果真係要熄燈，我哋一定飲到最後！」更以一句「絕不投降！」為東日眾人打下強心針。

《夜王》以夜總會為舞台，邀得子華與Sammi兩位重量級演員首度合作主演電影，既要為觀眾送上笑聲與娛樂，同時亦希望透過這個走向沒落的行業，刻畫東日夜總會這個小社群，在世代轉變與經濟逆風之下如何自處。這個題材與現今全球經濟放緩、各行各業面對結業潮的處境不謀而合。導演期望藉這個逐漸消失的行業、透過歡哥的口，向觀眾送上鼓勵︰面對起起跌跌，只要繼續「照行」，終有一天可以笑到最後。

《夜王》將於農曆新年大年初一（17號）正式公映，一馬當先、華麗賀歲！

為慶祝香港樂壇搖籃「華星唱片」成立55周年，大型音樂企劃「星塵55」正式啟動。透過Remaster（重新製作）經典作品推出黑膠唱片及深情專訪，讓樂迷重新認識「華星」的音樂歷史與文化遺產。深情專訪頭炮，由16歲參加「第七屆新秀歌唱大賽」，贏得銅獎的天后鄭秀文（Sammi）揭開序幕。

Sammi接受「星塵55」專訪。

今年7月10-12日，Sammi將於啟德主場館舉行一連三場「You & Mi 鄭秀文演唱會2026亞洲巡迴終點站」，在這特別的好日子，「華星」推出「Sammi 初」黑膠唱片，當中Side A的《不來的季節》及Side B的《Chotto等等》都是Remastered，提升音色質素，讓這些珍貴的音樂以最好的狀態重現，非常值得珍藏。

鄭秀文Sammi

Sammi說：「對於我個人同埋『華星』呢個label，都係一件好有意義嘅事。參加『新秀』係我人生好重要嘅一步，好細個嘅時候，大約10歲11歲左右，我已經決定當夠年紀16歲就要去參加新秀，其實我好細個內心已有呢個plan。踏出呢個里程碑，參加呢個比賽入咗行，係我音樂旅程一個非常重要嘅起點。」

鄭秀文Sammi

當時年紀輕輕的Sammi表現淡定，她笑笑說：「我而家睇返都覺得自己當時幾淡定，屋企人俾我好大嘅支持到，我爸爸嘅參與度好高，佢幫我揀歌，佢比我好大嘅自由度，喺我背後支持我。」勝出後，Sammi一口答應與「華星」簽8年合約：「當時我計數，8年後都係20幾歲啫！有啲同學為咗未來諗緊點算嘅時候，但我冇壓力，考完會考即刻有份工，前面有條路等我去行，而且係我自己去揀。」

鄭秀文Sammi

「華星」黑膠碟收錄了Sammi人生第一首派台歌《思念》、第一次三台冠軍《不來的季節》，還有經典作品《娃娃看天下》。她說：「《娃娃看天下》當時唔係大Hit作品，但對我嚟講係一個timeless 作品。我以前唱呢首歌真係『娃娃』，依家用大人嘅視覺去睇呢個世界嘅成功、失望、挫折。」長大後越來越難感到興奮？Sammi否定：「唔會。有時諗到啲點子或者接到一啲好有趣嘅job，我就會好興奮。源於呢個Passion，嚟到而家呢個年紀仲可以繼續run。」

鄭秀文Sammi

永不言休？Sammi坦言有幻想過退休，但不會設立時間點：「如果天父要我停就停，做就做。我自己內心知道，好多嘢令我會澎湃，尤其是舞台上嘅創作，一諗到啲好玩嘅嘢就會好興奮。喺演唱會上，我會傾向藝術成份較高，例如《裸體早餐》嘗試結合藝術元素放喺演唱會。又例如去年『拉闊音樂』《浮雕》嗰part藝術成份好高，我覺得啲觀眾好接受。我好鍾意呢啲嘢，好想介紹畀觀眾，嚟緊傾向藝術性高啲嘅表演方式。」

觀看相關影片按連結：https://youtu.be/751vdCXUKjw