Twins 25周年見面會 Fans重現當年應援口號 阿Sa阿嬌感觸爆喊

「TWINS 25週年1314新春限定粉絲見面會」昨日（2月14日）舉行第二場，繼續由農夫擔任MC。Twins跟fans玩足整個下午，氣氛勁 high！兩人於台上又喊又笑，encore時更清唱十二首歌，fans嗌到拆天，絕對是新年最正福利。

見面會上，Twins提到以往fans聚會多數是BBQ或於酒店舉行，阿Sa話：「比較係細啲嘅場地搞，有production真係第一次。」農夫即問：「平時係咁多人一齊BBQ㗎？」阿Sa回應是很多人，點知阿嬌搞笑「大唱反調」兼放笑蛋，「都好多人唔應約㗎！冇嚟嘅舉手！」全場即時爆笑。

之後農夫問到一對組合如何可以維持二十五年？台下fans即刻搶答：「因為有我哋！」搞到阿Sa忍不住笑，「咁我哋都要靠自己嘅，雖然都係有你哋。」阿嬌和議，「事半功倍啦，雙贏。」講到相處之道，阿Sa指她們十分幸運，因為二人都是「溫和派」，「我哋真係未試過有好大嘅衝突要嗌交。」阿嬌則承認有時會為工作有意見分歧，阿Sa直言，「可能因為我哋都好Hea。」阿嬌默契十足抵死話：「鬧交好攰㗎知唔知呀？」阿Sa即和應：「係呀，不如留返啖氣去玩啦。」

去到讀留言牆環節，有位fans寫到，「你哋唔好咁早退休呀。」Sa即刻斬釘截鐵回應：「冇咁嘅打算！」全場fans即時安心晒。不過最感人是播放25周年影片後，台下fans即場重現當年頒獎禮既應援口號加埋嚓嚓打節奏，全場整齊高聲大嗌二人名字，隨住《相愛25年》音樂響起，阿Sa、阿嬌忍不住爆喊，「以前每次出席頒獎禮，你哋都嗌到我哋聽唔到自己唱乜嘢歌，全場最大聲就係你哋！所有回憶返晒嚟。」場面勁催淚。Encore部份Twins又大派福利，清唱十二首歌，fans又跟着一齊大合唱，全場fans都謂這個新年願望成真。

活動由中午十二時到差不多傍晚六時才完結，全場粉絲都可以和Twins合照和Hi touch作結，加上十四樣小禮物作粉絲福利，滿載而歸。

「英皇娛樂25+ HAPPY BIRTHDAY慶典」第二批藝人宣傳照日前釋出，當中阿Sa蔡卓妍、阿嬌鍾欣潼的馬甲線引起網民熱烈討論，網民大讚相片「勁靚」、「Twins好瘦呀」，但亦都有網民質疑是AI P圖。

阿Sa和阿嬌的馬甲線引起網民熱烈討論。

昨日（3月9日）釋出的官方拍攝花絮短片中，阿Sa蔡卓妍一如以往身形fit爆、狀態十足，至於身形經常成為討論焦點的阿嬌亦狀態大勇，明顯見到她的腹肌線條分明，腰間馬甲線清晰可見，絕對是真材實料。對於網民質疑官方P上馬甲線，又留言指：「係咪AI吖」、「p到阿嬌咁fit」，阿嬌就話：「絕對唔係AI啦，我都真係好努力㗎，有片有真相。」至於阿Sa則謂：「日日都同Kenny一齊加操！」另外，不少網民留言想「龍虎豹」合體表演，經理人霍汶希（Mani）回應：「今次英皇家族25+演唱會會有好多藝人crossover，密切留意我哋官方公佈。」

影片截圖

影片截圖

影片截圖

影片截圖

影片截圖

今年除了是英皇娛樂25周年，同時亦是Twins出道25周年。早前舉行的「TWINS 25週年1314新春限定粉絲見面會」叫好叫座，兩場show都跟fans玩到癲，合照、hi bye、送禮物等，福利好到滿瀉。見面會結束後，世界各地的fans都敲碗要求加開巡迴場，不過由於一早說明fm是「新春限定」，只此兩場，絕不加場，加上二人工作檔期亦排得滿滿，一眾走寶fans唯有得個恨字。

影片截圖

不過，錯過了的fans亦不用灰心，目前阿Sa阿嬌密鑼緊鼓為「英皇娛樂25+演唱會」 做表演準備，想親眼見證阿嬌完美馬甲線、Twins合體演出的歌迷要把握機會撲飛。