「生果佬」單案經過公開審訊之後，佢被判20年監禁。呢個裁決有人歡呼喝采，因為話佢係賣國賊；有人抌心抌肺，覺得佢係民主鬥士救世者。究竟邊個先係真正嘅「生果佬」？我零零發於是綜合各方高人對「生果老」嘅報道同花邊新聞，睇埋佢本自傳，喺各路英雄喺度吱吱啫啫之前，梳理咗佢嘅前世今生俾大家參考吓！
江湖傳聞「生果佬」出生於內地一個小康之家，但係1953 年嘅時候，佢阿爸就丟底全家走路去咗香港，阿媽後來又入咗勞教所，所以佢9歲開始，就要負責照顧細妹同埋一個輕度弱智嘅家姐，屋企無人無物，唯有去偷去搶去養活家人，試過被人捉到、被人打，佢都冇喊過喎！
佢12 歲嗰年就單挑從廣州偷渡去澳門，再輾轉到咗香港搵食。係佢離家之前，阿媽要佢跪係祖先靈前立誓，要佢答應三個條件先俾佢去香港：「一，不准搞政治；二，不准騙人；三，不准說謊」。「生果佬」話佢阿媽真係好了解佢，呢三個條件完全係針對佢嘅性格：「第一她知道我野心大，怕我去從政當官；第二因為我很懂揣摸別人心理，好容易引人上當；第三因為我經常編造故事，令人信。」知子莫若母，結果「生果佬」三樣都做齊！
有線人報料，話「生果佬」唔睇中文書，因為覺得中文書未夠班，天下佳作都係「來路嘢」咁話。吓，中華文化有幾千年歷史，係佢真係以為外國月亮特別圓啫。佢又從來唔睇歷史書：「因為我(生果佬)是一個不尊重歷史的人，我不覺得會在其中學到些什麼，我是一個永遠向前望、向前走的人，小時候在街邊生活，很多事情你不想回頭望。你這樣卑微的開始，經歷了被人『遭質』、被日子蹂躪，你是不會想回頭的。」「對一個未曾上過學的人來說，若能掌握到一些學識與學問，這給予我一份很大程度的尊嚴。當任何人坐下來跟我聊天，對方並不會覺得我『冇料到』……」噢，佢看書嘅目的，是為了尊嚴?
「生果佬」由一個係香港山寨廠雜工撈到風生水起，開連鎖服裝店，之後仲係袓家開咗好多分店賺「人仔」。係1989 年，民主派大佬「白頭李」關照佢間公司，印民運T恤發咗國難財，但最後佢要敗走袓家，仲要賣曬佢連鎖服裝店嘅股份…… 一個討厭中國文化、憎恨自己袓家嘅人，但竟然返去開舖去賺大錢，佢心入面究竟盤算緊啲咩呢？
「生果佬」嘅身世，一直俾人標榜為佢發跡、成功嘅動力，但我零零發覺得，其實係佢成魔嘅根源先啱！
至於做雜誌、報紙嘅時候，傳媒老友話佢講到明要做故仔去吸引讀者，而且報紙一定要有風月版，如果唔係，邊會有人買咁話喎！最離譜嗰單，咪就係陳x康事件囉，風月版同港聞cross over！如果你唔知我講乜，就上網睇吓，咁慘嘅悲劇我都唔想喺度再提！「生果佬」仲話回歸之後，其他報紙唔敢鬧祖家，所以佢一定要做反對派係咁鬧，咁佢份報紙就可以做獨市賣到錢。「生果佬」亦曾經係佢自傳講過，冇人性嘅人先可以做傳媒，因為傳媒係一個好難嘅行業，好多是非，而且要面對好多困難嘅決定，佢話自己本來就冇人性，好多嘢對佢嚟講係唔重要，所以佢適合做傳媒，但佢唔希望自己嘅仔女冇人性，所以……又係咁嘅思維，人哋嘅仔女點衝點撞都得，自己嘅仔女就要如珠如寶。另外，佢以前有個新聞主管，話「生果佬」問過佢，有冇辦法請個唔怕坐監嘅記者返嚟？主管覺得奇怪，問佢請呢啲人返嚟做乜？「生果佬」話：「可以叫佢去偷取機密文件，然後爆內幕，又或者可以叫佢混入打刧集團，睇吓班賊點樣策劃打刧？點樣下手？點樣分贓？咁咪有獨家新聞囉！」
咁嘅手段，你可以話係有頭腦嘅生意人，又可以話係一個為求達目的，可以不擇手段、無底線，唯利是圖嘅人囉⋯⋯心
理學家話童年和原生家庭對構建一個人嘅性格同行為有好大嘅關係。我零零發喺度諗，好似係「生果佬」阿爸拋妻棄子走咗佬，先搞到佢同家姐細妹有咁悲慘嘅童年；不過「生果佬」就將佢嘅不幸，自動轉賬晒俾當時嘅政府……如果當年佢阿爸帶埋佢哋走佬，個故事係咪會改寫呢？
「生果佬」一直覺得係袓家欠咗佢，而佢又自嘲係一個「唔識字、冇讀過書」嘅偷渡者，由「廠佬」做到所謂嘅「傳媒大亨」。一個集金錢、野心、手段、能力、自信同自卑於一身，既痛恨袓家，又追崇美西方價值觀，佢本身已經有千年難得一遇嘅「賣國基因」。 所以美角佬又點會放過呢隻全方位、長用長有嘅棋子吖，於是咪幫佢度身re-set 個人設，將佢捧成有香港特色嘅叛國代言人囉！
不喜勿插!!!
鍾情局●零零發
鍾情局
** 博客文章文責自負,不代表本公司立場 **
最近「生果佬」終於要為佢多年來嘅惡行「埋單」，俾官老爺重判20年監禁！有人問：「佢衰啲咩要坐咁耐？」不如睇吓喺單案嘅審訊爆咗啲咩出嚟？
鼓吹制裁 摧毀香港
「生果佬」表面上係「生果報」老闆，實質係打住「新聞自由」嘅旗號，長期通過情報系統出身嘅助手Mark Simon穿針引線，游說美國不同政客及官員制裁中港兩地官員。
2019年，「生果佬」親赴美國與時任副總統Pence及國務卿 Pompeo會面，卑躬屈膝乞求對香港及中央實施「制裁」。「生果佬」仲透過 Mark Simon促成美國前副參謀長Jack Keane、美國前國防部副部長Paul Wolfowitz，為台灣蔡英文提供顧問服務。除此之外，為咗討好美國，「生果佬」甚至草擬特區官員嘅制裁名單，全面配合「侵侵」政府打壓香港。試問一個正常搞報紙嘅人，點解無端端同美國權力核心咁「friend」先?
係審訊入面，其中一個控方證人喺庭上指出，「生果報」嘅社論曾呼籲美國及其盟友根據《馬格尼茨基人權法案Magnitsky Act》制裁中國同香港官員。唔單止咁，「生果佬」曾經喺「生果報」自己嘅專欄度發表文章，公開倡議對中國實施科技制裁；而佢更直接指示時任「生果報」高層，協助袁弓夷喺「生果報」平台公開發布制裁中港嘅影片，呢個袁弓夷喺片中敦促時任「侵侵」同國務卿Pompeo駐軍保護香港青少年，呼籲外國投資者從香港撤資，又呼籲英國收回香港主權……
制裁唔係大家想像咁簡單，而係現代經濟戰嘅「核彈」。為咗達成政治目的，美國之前就曾經用「制裁」呢一招去打擊非洲中東多個國家，令到嗰啲國家經濟一蹶不振，破產收場。而「生果佬」仲陰險，策劃所謂「三條戰線」，聯合「街頭、議會、國際」， 搞煽動、推動街頭抗爭、推翻政權，乞求制裁，企圖癱瘓經濟；佢背後又操控反華組織「重光團隊」，出錢出力，日日向外國唱衰香港，誓要拖中國同香港市民去萬劫不復嘅深淵。
散播假新聞 挑動仇恨
除咗搞制裁，「生果佬」仲不斷利用「生果報」搞假新聞，例如：2008用偏頗嘅報道去反高鐵，煽動群眾包圍立法會同衝擊警方，到2019年黑暴已經徹底失控，又不斷散播「爆眼女」、「太子站事件」等假新聞，甚至誣衊警察性侵示威者，煽仇煽暴，將香港推入撕裂與仇恨嘅漩渦。
「生果佬」恃住「新聞第四權」，拎「生果報」嘅謊言當子彈，日日瞄準班後生仔，教佢哋「違法達義」、搞「港獨」，哄騙佢哋以為上街就係改變世界，鋪天蓋地散播謊言同煽動性報道，結果大批後生仔信咗佢啲鬼話，連群結隊上街暴力違法，以為攬炒就係出路。最後呢？唔係坐監就係流亡，搞到自己前途盡毀，無數家庭破碎，社會陷入混亂之中。
睇返2021年7月1號嗰晚，有個叫梁X輝嘅男人喺銅鑼灣百貨公司外，用刀襲警後自殺單case，警方其後喺佢屋企搜到大量「生果報」舊報紙。心理專家喺死因庭上分析話，佢長期俾「生果報」餵「心靈毒湯」，深受極端攬炒思想影響，最終策劃「孤狼式襲擊」，成為「生果報」洗腦工程下嘅犧牲品。
美西盲撐 勾結外國最佳證據
成個公開聆訊歷時156日，有超過2000項證物、8萬頁文件，證據堆到成座山咁高，但外國勢力竟然仲擘大眼亂噏！判刑一出，美西方一眾政客同反華媒體無視鐵證如山，即刻跳出嚟，再次上演雙標醜劇，大肆抹黑特區政府，開口埋口就係港府打壓「新聞自由」，又歪理連篇要求「釋放生果佬」。佢哋呢種顛倒黑白嘅行徑，不僅公然違反國際關係基本準則，更徹底暴露出「生果佬」其實同佢哋係坐埋同一條船，狼狽為奸。
喺審訊期間，西方從未停止過造謠抹黑，又話「生果佬」喺獄中受虐、無醫療，又話佢連宗教權利都冇，甚至話佢身體差到指甲脫落，但事實呢？法庭宣判當日，「生果佬」步履穩健、自行入席，精神狀態良好，完全打咗呢啲謊言嘅臉。就連佢嘅律師都親口承認，「生果佬」喺獄中一直獲完善醫療，亦無任何投訴。呢啲造謠手段，只不過係西方抹黑香港嘅慣用伎倆。
其實每日唔同國家嘅領事、外國媒體都有去聽審，有晒即時傳譯個喎，係咪佢哋聽唔明，抑或係瞌緊眼瞓睇唔到，報錯料俾老闆知啊？
自食其果
除此之外，仲有啲西方組織，例如「無國界記者」，跳出嚟強烈譴責判決，話「生果佬」被判20年監禁，對七十幾歲嘅佢嚟講「幾乎係死刑」，認為判得太重。判得重？咁不如睇下西方嘅國安法判刑情況: 美國國會山騷亂案，「驕傲男孩」主犯重囚22年；英國6個襲警暴徒判124年。自己啲國安法就辣到出汁，但一提香港就鬧到飛起！咁係唔係虛偽雙標？
「生果佬」觸犯國安法，經公正審訊被判刑，係法治體現；相反，美國非法綁架委內瑞拉總統馬杜羅返美受審，先係踐踏國際法。西方政客死撐「生果佬」，卻對馬杜羅隻字不提，呢個係咩邏輯？
上面講「生果佬」嘅惡行只係冰山一角，佢啲所作所為喺官老爺嘅855頁判詞入面詳列得清清楚楚，受審判刑係因為佢罔顧法律，禍害香港，法庭只係根據法律同證據作出裁決。判詞講得好清楚，「生果佬」有持任何政治觀點嘅自由，但問題係，佢選擇去違反《國安法》，繼續鼓吹外國干預同制裁，無視法律底線！
鍾情局•零零發
