為咗引BB乖乖沖涼，好多媽媽都會買沐浴球，貪佢哋遇水會融化，仲會彈出小禮物，令沖涼時間變得有趣。但消委會早前測試揭示，呢啲「驚喜」分分鐘係「驚嚇」！
消委會測試咗市面上17款沐浴球樣本，發現8款附有小禮物，當中有5款完全冇標示安全警告字句，包括冇標明「不適合3歲以下兒童使用」或「窒息危險」等警告。
問題係，呢啲小禮物全部含有細小部件，溶解後先會浮現。如果家長唔為意，俾年幼子女隨便把玩，一旦放入口誤吞，足以造成窒息致命！
仲有，消委會喺9款沐浴球中檢出香料致敏物質，其中兩款檢出嘅苯甲酸苄酯濃度分別達0.024%和0.36%，但產品包裝上完全冇標示。雖然沐浴球嘅香料濃度會被洗澡水稀釋，但小朋友可能會喺浴缸玩一段較長時間，身體大面積接觸沐浴球溶液，增加致敏風險。
媽媽選購貼士：
留意警告字句：購買時一定要睇清楚包裝有冇標明適用年齡同安全警告，揀有中英雙語標示嘅產品較穩陣。
避免3歲以下使用：如果BB仲細，最好完全避免用呢類附有細小組件嘅沐浴球。
家長全程陪同：就算用，都一定要陪住小朋友沖涼，留意小禮物有冇被放入口。
留意稀釋指示：揀有說明「應於多少升水中稀釋」嘅產品，可以減低香料濃度。
沖涼本應係開心時刻，唔好因為一時方便，令BB暴露於風險之中。
Mama Log
** 博客文章文責自負,不代表本公司立場 **
