舒壓矽膠玩具（poppit）同可擠壓玩具（squeeze toy）近年大行其道，俾小朋友「搓圓撳扁」發洩精力。但消委會測試揭發，呢啲玩具嘅安全問題極度嚴重！

消委會早前測試市面上29款塑膠玩具，發現：

22款樣本（佔逾7成半）喺機械及物理性測試中，未能符合歐盟玩具安全標準要求
15款樣本有結構安全問題，喺模擬兒童反覆按壓拉扯嘅測試下，出現破裂而產生小部件或漏出液體，一旦誤吞或誤飲，可能造成窒息或健康風險
逾8成半樣本嘅物料檢出潛在致癌物多環芳香烴
最離譜嘅一款樣本，萘檢出量超出德國安全上限近4倍，同時檢出可致癌塑化劑含量超出香港法例要求上限嘅250倍！
呢個數字真係嚇親人！小朋友日日揸住玩嘅玩具，竟然含有咁高濃度嘅致癌物，長時間接觸或放入口咬，對身體嘅影響可想而知。

媽媽選購貼士：
避免太細嘅部件：對於3歲或以下兒童，要避免體積過小嘅玩具，減低誤吞風險。
留意玩具有冇破損：如果玩緊嘅時候玩具破裂成小部件或有液體漏出，要立即清理及掉棄，並徹底清洗雙手。
收好包裝膠袋：玩具嘅包裝膠袋要小心收好，如果小朋友將膠袋套喺頭上，遮蓋口鼻，會有窒息風險。
家長陪同玩耍：最好陪小朋友一齊玩，既可以增進感情，又可以減低誤用玩具嘅情況。
消委會提醒，家長應細閱產品包裝上指示，按兒童年齡、肌肉發展狀況等選擇合適嘅類別，千祈唔好貪得意買太「成熟」嘅玩具俾BB。




Mama Log

** 博客文章文責自負,不代表本公司立場 **