周柏豪音樂會笑聲歡呼聲爆滿啟德體藝館 與素顏鄭融即興合唱《一事無成》掀集體回憶

闊別香港舞台七年，周柏豪終於兌現了與歌迷的約定，昨晚（3月14日）白色情人節，一眾粉絲期盼已久的《周柏豪 THE BLOOMING CHAPTER》音樂見面會於全新的啟德體藝館盛大舉行。這場被柏豪形容為「由香港出發，返屋企嘅第一站」的演出，全場座無虛席，歌聲笑聲歡呼聲為七年之約揭開完美序幕。柏豪老婆仔女撐場外，好友連詩雅、陳家樂、193（郭嘉駿）、鄭融、布志綸、歐鎮灝、吳啟洋（Phoebus）、馮曦妤Fiona Fong等均有到場支持，共同見證呢個「綻放」的重要時刻。

《周柏豪 THE BLOOMING CHAPTER》音樂見面會於3月14日白色情人節在啟德體藝館盛大舉行。

柏豪昨晚把體藝館化身成一個充滿玩味的巨型遊樂場，施展渾身解數，獻唱近三十首歌曲，從經典作品到最新歌曲，首首都觸動歌迷無限回憶，由頭帶到尾歌迷都不停合唱，兼企起身跳舞，場面墟冚。唱歌之外，柏豪仲同歌迷大玩「估歌仔」同「唱K」等遊戲，互動氣氛溫馨又熱鬧，歡笑聲不絕於耳。

周柏豪

周柏豪

全晚其中一個最高潮，是好友鄭融驚喜現身！鄭融本來只是來看騷支持，低調坐於觀眾席，素顏兼且冇化妝，但被柏豪一眼認出並邀合唱時，鄭融二話不說除低口罩企起身，以最真摯嘅素顏樣貌面對觀眾，更搞笑自爆：「我箍緊牙㗎！」柏豪：「箍牙你都唱贏好多人啦！你絕對係同我一齊成長嘅朋友，同一個經理人公司，由《一事無成》開始，我哋去過好多商場、做過好多event，真係好多回憶....」鄭融聽到後亦非常感觸，回憶起當年青澀歲月：「你記唔記得，我哋兩個坐喺TVB錄影廠等埋位，然後你攞咗個MP3出嚟，嗰陣仲係MP3年代……真係好想攬下你！好啦，我哋一齊見證呢個歷史時刻啦，唱啦！」隨即兩人即興合唱經典合唱歌《一事無成》，引發全場「回憶殺」，真摯嘅友誼加上埋集體回憶好歌，讓全全場歌迷不停歡呼，開心到飛起！

鄭融驚喜現身。

二人合唱《一事無成》。

昨晚唱到歌曲《同行》時，柏豪幾度深呼吸強忍感動眼淚，哽咽地向全場觀眾表白：「好多同事估我今晚幾時喊，我真係好多謝大家咁支持我。我話咗唔喊，今晚點都要忍住！」呢份對舞台嘅珍視同對歌迷嘅感激，令全場動容。

周柏豪

Show後，柏豪亦特別感謝家人無私支持。他透露開騷前兩星期，屋企面臨一場「小風暴」：「仔女病、老婆病，老婆當機立斷趕我出家門，叫我即刻租酒店搬走，免得我染病影響演出。」他坦言當時搬離屋企心情好唔捨得同難過：「作為爸爸，要因為工作丟低家人，真係好唔好受。每日同老婆同仔女視像電話問候。」幸好最終順利完成演出，冇辜負屋企人嘅犧牲。

周柏豪

講起一對寶貝仔女，柏豪即時父愛泛濫，透露囡囡對自己嘅愛簡直係「一千分」。佢搞笑話：「排練嗰陣仔女都有嚟睇，玩緊唱K環節冇人舉手，我個女竟然舉手話佢可以唱，於是我哋就俾佢咪，同我合唱咗幾句《一事無成》！」佢又笑指囡囡對佢嘅痴纏程度，搞到老婆有時都覺得過份。

周柏豪

問到囡囡鍾意BLACKPINK定係鍾意爸爸多啲？柏豪自信滿滿咁話：「梗係鍾意我多啲啦！佢對我嘅愛係一千分㗎！所以我有時會諗，第日大個咗佢唔再咁愛我，我唔知接唔接受到。我依家可以講定，第日佢男朋友要聽住：『我個女係公主，佢真係要對佢公主咁先得㗎，哈哈！』」公然向未來女婿宣示主權，引得全場大笑。

周柏豪

Encore環節，柏豪唱出新歌《純粹想哭》時，螢光幕出現實力派演員黃文標的身影，原來他有份參與MV演出。Show後問到柏豪，佢坦承知道標哥最近身體麻麻，初步評估患有柏金遜症。柏豪話：「拍攝時對方非常專業，雖然察覺到佢身體有啲唔舒服，但完全冇影響工作。我非常感謝標哥參予MV演出，知道好多朋友都因為佢嘅演出特別去睇我呢個MV。」

實力派演員黃文標有份參與MV演出。

是次雖然名為見面會，但無論係歌曲編排、同樂隊大玩Rock嘅狂野，定係自彈自唱嘅深情，都展現出超越一般演唱會嘅水準,整個製作非常認真，柏豪全晚換咗五個造型，當佢以背心造型登場，大騷結實嘅麒麟臂時，即時引來全場女歌迷嘩嘩大叫，紛紛高呼「除衫！」柏豪即抵死笑言：「嘩！台下面突然見到好多個女同學、家長朋友，平日佢哋見我唔係咁㗎，係咪覺得我變咗第二個人？哈哈。我平日係七人車司機，成日車埋同學仔放學，好正經㗎！今日佢哋可能覺得：『點解個司機哥哥變咗咁古怪？』都係唔好除啦......」

周柏豪

周柏豪

周柏豪

周柏豪

香港站之後，柏豪表示會開始新一輪巡迴，問到他何時再舉行真正的個人演唱會，他表示自己當然希望可以再返紅館，明年是他入行二十週年，但是否能得到檔期，世界會不會有其他變化，並不是他可以預計，他只會每日努力朝著這個目標進發，希望可以明年可於香港跟歌迷一起慶祝廿十週年這個願望。

全場大合照

年度國際馬壇春季盛事「富衛保險冠軍賽馬日」將於4月26日在沙田馬場隆重舉行，大會今年邀得韓流實力歌手華莎及本地著名歌手周柏豪擔任表演嘉賓，為盛事注入澎湃音樂能量。

「富衛保險冠軍賽馬日」

「富衛保險冠軍賽馬日」

韓國女團MAMAMOO成員華莎將於馬匹亮相圈打頭陣，以勁歌熱舞揭開序幕。她表示：「很榮幸能夠出席『富衛保險冠軍賽馬日』 並在馬匹亮相圈表演，能在這個充滿特色的香港舞舞台與觀眾近距離互動，我感到十分期待。」曾來港開騷的華莎對香港文化情有獨鍾，今次首踏沙田馬場，直言期待親身感受地道賽馬文化。

華莎

香港著名歌手周柏豪則首度在馬匹亮相圈獻唱多首金曲，他坦言：「好榮幸今次能夠參與這次演出!其實我經常在不同媒介 看到很多本地和國際歌手在馬匹亮相圈表演，那個舞台非常有氣氛和有 代表性;今年馬年有機會合作，能夠在迎接明年自己出道二十周年之前 解鎖這個成就，對我來說特別有意義！」他正積極排舞練歌，務求以最佳狀態與歌迷互動，為觀眾帶來視聽雙重享受。

周柏豪