移民英國，是否真係如想像中咁美好？近日，一名移英港女喺網上發文大吐苦水，感嘆移民後面對當地物價飛漲，生活壓力大增。佢更分享身邊朋友為咗慳錢，諗出各種匪夷所思嘅「慳錢絕招」，由沖廁習慣到飲食消費，樣樣「慳到盡」，帖文一出隨即引來網民熱議，有人直呼「移民移到咁辛苦，為乜??」。
示意圖。AI生成圖片
慳錢絕招逐個數 慳水慳電慳到盡
該名港女以「移英呢幾年，生活迫人，百物騰貴」開場，直言水費、電費、油價同 council tax（市政税）樣樣加，逼到人要諗盡辦法慳錢。佢笑言朋友嘅行為「幾好笑又onX」，並列出多達11項「慳錢絕招」。
喺生活支出方面，最惹人爭議嘅一招，莫過於「為慳水，一家人輪流痾完先儲起，一次過flush（沖廁）」。其他生活慳錢術包括：自己動手整車，撞凹車門就上eBay買二手門，再跟YouTube自學更換；黐住有Costco會籍嘅朋友一齊去購物，慳返會費；喺屋企花園自己種菜，實行自給自足；家中裝修、油牆、鋪花園地磚全部DIY；冬天為慳電，著住羽絨冚暖氈都唔開暖氣。
示意圖。AI生成圖片
外出消費慳到極 自己煮飯自己剪髮
至於外出消費，慳錢招數同樣「絕」。好多人為慳錢，會上YouTube學剪髮染髮，由老婆學識後幫老公同阿仔剪，原因係「信唔過出面髮型師」。出街寧願返屋企自己沖飲品，都唔幫襯Costa或Starbucks，仲話佢哋「難飲仲要勁加價」。飲食方面堅持餐餐自己煮，而且盡量去西人超市，減少去較貴嘅中超。出街食飯只會食日韓菜式，或者係自己整唔到嘅菜。最後一招係逼自己上網買餸，設定預算，減少即興購物「洗突錢」嘅機會。
示意圖。AI生成圖片
網民熱議：移民為咗過苦日子？
帖文引來大量網民留言，有同路人深表認同，留言話：「住過喺英國幾年就明白，冇誇張! 費用不斷升，有幾多身家都唔夠俾咁」，並分享自己嘅慳錢心得。
示意圖。AI生成圖片
不過，更多網民就對呢種生活方式表示不解同反感。對於「儲起沖廁」一招，網民直斥「等全家痾完儲起先沖厠勁嘔心」。有人認為：「唔浪費當然係好啦！但係移民係長期喺度生活，做得太盡會好容易產生負面情緒，對身心冇益嘅」。亦有網民質疑移民嘅意義：「如果移英要過這種低質（素）生活，寧願留返在香港，起碼HK好多平靚正好嘢吃，交通便利，現在又可淘寶拼多多，日日在買買買，閒時返上深圳玩，生活很好過喎」。更有網民建議與其諗點慳，不如「諗方法點揾多啲」。
