阿爺搞了一個上海鴻門宴，請泛民入局，泛民反應一如所料，長毛玩激，在海關唔使入境，玩完就走得，同樣走激進路線工黨一樣走人，亦在意料之中，稍出意料的是公民黨梁家傑也支持長毛而不去了，但湯家鏵等上了的也照去，變成公民黨一個黨幾種態度，認真奇怪。
我早前講過，阿爺係軟硬天師。阿爺先擺硬，早前開兩會時，中央港澳協調小組組長張德江立場相當張硬；阿爺亦可以軟，在上海擺局，叫泛民北上溝通也可以。阿爺先在中聯辦設宴回請立法議員，泛民話場地不合不去；阿爺派人參加政府搞的早餐會和泛民溝通，泛民又話派來的中聯辦官員低級兼讀稿唔識答問題；阿爺再搞上海之會，泛民堅持要單獨會晤，結果亦一一安排。總之令泛民無藉口唔去傾，結果今次都有十幾個泛民議員北上，雖然他們和阿爺的分歧沒有收窄，但總算對上了話。中聯辦主任張曉明還說，未來兩個月還願意再和泛民議員逐個見面溝通。
阿爺在施硬功後連發軟功，可能兩種不同的動機。第一，阿爺在政制問題上已諗住一硬到底，而家擺軟功，只不過係一種政治姿態，將來政制談判拉倒了，阿爺可以講：「無普選唔好賴我呀！我盡咗了力架啦！」第二，阿爺其實好想在政制問題上達成決議，讓香港有普選，但泛民個姿態擺到咁高，要按足他們提出的方案去普選，阿爺唔想食，就擺軟功，挾泛民埋枱談判。兩種態度的動機相反，暫時未知阿爺想點，究竟係強硬派抑或溫和派主導，結果亦好唔同。
阿爺高官今日的講話當然有好多係原則性好強的說話，例如「話公民提名符合基本法係裝糊塗」、「泛民的三軌方案違反基本法」、「提名委員會可以降低民粹風險」等等。但有其中一點惹起我的注意，就是張曉明在講話中指出，中央從來沒有「一竿子打沉一船人」，他沒有講過凡屬泛民陣營的人士都不符合愛國愛港的標準。他提到不愛國愛港的人，說什麼人不遵守基本法、什麼人喜歡與外國勢力勾勾搭搭，有時不難判斷。按張曉明的說法推論，阿爺無講死參選特首的只能是建制派人士，泛民中人只要是愛國愛港都可以參選。
有熟悉內地政情人士話，阿爺在這個關鍵部位的確留了小小空間。其實全國人大法律委員會主任喬曉陽去年三月的講話也隱含了這種意思，喬曉陽當時說反對派哪一天他們放棄與中央頑固對抗的立場，回到愛國愛港的立場上，就可以參選。如今看來，阿爺的方程式係對抗中央的/不愛國愛港的人，一定不能參選，但泛民中人如果他們本來就是愛國愛港的/曾經對抗中央但已放棄此立場，就可以參選。
我睇到泛民和阿爺雖然各自企硬，但既然阿爺留下不需排斥所有泛民人士參選特首的空間，那麼泛民政黨有無食住上，和阿爺談判，食盡呢個空間呢？泛民或者想寸步不讓，追求他們認為最純潔的普選方案，但他們又知不知很多香港人想雙方盡量傾出妥協方案，讓我們在2017年有機會去投一票普選特首呢？
盧永雄
今天開始班立法會議員就去上海，參加阿爺擺下的鴻門宴，阿爺請得泛民去開餐，雖然唔會殺頭，但當然必有所圖，泛民又如何回應呢?
令我想起28年前的一幕。那時阿爺搞基本法起草委員會，內裏有兩個民主派草委，一個是李柱銘，一個是司徒華，李馬丁行事大開大合，似鬼佬作風，華叔較為深謀，有中國人的智慧。
當時傾到政制方案的關鍵部位，有親北京委員提出保守方案，街外有人建議佢地辭職唔玩。我那時是記者，去到廣州白天鵝酒店華叔往的房間，問佢點睇。華叔開門迎客，等我入房後先把電視聲開到大一大，嘈到我要貼近佢咀邊先至聽到佢講乜。華叔話：「小心有偷聽呀! 呢個係最原始的方法防止偷聽。」
華叔話除非去到必要時候，否則佢唔會辭草委之職，「一日有得同共產黨爭取，都要盡力爭。辭職好易，反枱好易，反咗枱又點呀?」佢的理念好簡單，一方面堅持民主原則，一方面爭得幾多得幾多，盡爭。(後來華叔在八九年六四事件後辭去草委一職，這又是後話了)你睇華叔咁驚偷聽，就知佢幾唔信共產黨，但佢亦無話唔傾唔講，大有「怕乜同你傾」之勢。
如今泛民在政改問題有兩種態度，民主黨這類溫和民主派都有少少想有協調方案，但激進民主派就認為同阿爺傾都無謂馬上上街啦，溫和派比較弱勢，所以阿爺叫佢地去上海，佢地係遲遲唔想去咁款，結果民主黨派咗單仲楷和黃碧雲去上海，唔係最大粒的陣容，攞出一個「叫做出席吓」的態度。唉，未去都預咗無乜好傾，又係唔係一個合理態度?
有人話最近的區議會海怡西選區補選，更嚇怕了民主黨，因為人民力量的袁彌明有1083票，得票仲多過民主黨的單仲楷，係激進民主派打贏溫和民主派咁話，經此一役，民主黨更唔想同阿爺傾，以免未來失票更多。喂，大佬，唔該大家睇睇，單仲楷一個白髮中坑，袁彌明一個後生靚女，大家都無乜在地區做嘢，人地梗係選靚女唔選中坑啦，同激唔激進關係有限啦，選民覺得區議員都無乜用，選個靚女得閒落區同我匯報吓工作都好呀。若民主黨被海怡區選結果嚇怕，頭腦又係唔係簡單咗啲?
講番政改，阿爺擺明硬，但又係唔係寸步不可以讓呢? 同佢傾，向佢爭取，又係唔係一定無結果呢? 傾都唔敢傾，或者預咗只係做騷唔預有結果，又係唔係辜負咗市民的期望? 好多人都希望泛民和阿爺傾出一個妥協方案，等2017年有普選，唔係未傾就想住反枱。如果華叔還在，佢唔會怕同阿爺傾，當然，傾的時候，也不會丟失立場啦。
盧永雄
