求生101｜周嘉洛「處男」配動畫表現出色 分享獨門打工仔必勝法：享受自己嘅職業

之前TVB Plus於深宵時段推出的《OT無限Loop》大獲好評，「貓貓阿星」和「阿花」上演Non-stop捱更抵夜職場血淚史引爆共鳴。

阿星嘅「無間道」日子都係「三年又三年」架。

阿星表情好豐富，仲要有時好麻甩，勁Cute。

不過一切只是前奏，無綫翡翠台將由5月18日（下周一）起、逢周一至周五晚八點半於翡翠台推出每集時長僅2.5-3分鐘的首部AI微動畫《保誠精選「寵愛寶」呈獻：社畜求生101》，並邀得近日憑綜藝節目《試真D》及《正義女神》人氣急升的周嘉洛重點聲演主角「阿星」。

《社畜求生101》將揭出阿星並非一般打工仔，其真正身份是獲上司委派前往「獅人公司」扮演普通打工仔、並伺機接近獅子總裁為「動物販賣案」套取情報的「超級無間道」。咪睇阿星其貌不揚，實則演技精湛、能屈能伸，是警隊中的「臥底王牌」。

阿星第一日返工就畀無良老闆狂扣分。

到底阿花會點幫佢呢？

不過打工仔唔單止唔易撈、更加唔易扮，「零職場經驗」的阿星入職初期處處碰壁兼頭頭碰著黑，第一日返工即被訓話兼遭狂扣分扣到懷疑人生、返工短短幾日已苦陷被炒邊緣，幸好危急關頭有深諳職場生存大法的「阿花」（由《多啦A夢》「胖虎」配音員黃啟昌聲演）出手相救，積極培訓阿星成為「頂級社畜」！

為配合港人「快狠準」生活節奏，《社畜求生101》每集只有2.5-3分鐘，一共60集，賣點除了人物Cutie兼表情豐富的AI生成畫面，句句到肉的職場金句亦勢必引爆打工仔共鳴。「呢個遊戲，唔係鬥『做嘢』，係鬥『做戲』」、「喺Office，老細就係公道」、「老細睇唔見嘅努力，就等於嘥力」、「努力只不過係一場Show」。

嘉洛仔配音照片

嘉洛仔配音照片

嘉洛仔配音照片

感恩可向資深配音員偷師
《社畜求生101》另一賣點，是出名活潑搞笑的嘉洛仔，在《社畜求生101》中的聲演亦夠晒盞鬼，不但聲音演繹與AI生成的人物表情夾到弗一弗，而且用語亦相當貼地兼生活化。談到處男替動畫配音表現出色，向來謙虛的嘉洛仔強調全是幕後同事功勞：「其實我仲有好大進步空間，好幸運可以同資深配音員一邊實戰一邊偷師，由於配音要配合番角色畫面嘅嘴型，好多時每一粒字也需要跟到足，但由於我功力未夠，所以幕後同事幫我落咗好多苦工調節，感恩有佢哋。」談到動畫圍繞「打工仔求生」做主題，嘉洛亦有自己一套的必勝法：「我享受我嘅職業，每次工作都搵到樂趣，所以好感恩。」

TVB於今年2月成立的全新AI部門「FF 工作室」（First Frame Studio），打造首部原創AI動畫《社畜求生101》，以職場生活作題材，將打工仔的內心世界攤出來跟觀眾分享。動畫找來上位小生周嘉洛聲演喵喵阿星，並唱出員工卸膊操，甚有睇頭。《社畜求生101》的總監製及總策劃盧思麟（Tommy）笑指自己也是社畜，因此很有信心大家都對這部動畫產生共鳴。

《社畜求生101》的總監製及總策劃盧思麟（Tommy）

《社畜求生101》的總監製及總策劃盧思麟（Tommy）

Tommy說：「其實我哋短劇入面有個對白，就係人生除咗生存，可唔可以為咗生活呢？」他覺得：「好多香港人內心裏面都係住咗隻社畜，因為好多叫做生活上嘅重心擺咗去工作，變咗好多時係起身、返工、OT，再起身、返工、OT、放工，呢個循環嚟㗎嘛，就想用一套幽默啲嘅劇《社畜求生101》，將打工仔嘅內心世界攤出嚟去睇下，幽自己一默。之後去諗人生喺香港生活係咪就得一種方式呢？」

周嘉洛聲演喵喵阿星

原創AI動畫《社畜求生101》

原創AI動畫《社畜求生101》

他自言是社畜，「生活上重心基本上都係都比較放咗喺工作上面，我都有共鳴，呢個共鳴可能都多香港人會有，講關於職場嘅文化。」他又表示：「我係好努力咁提醒自己係要為生活嘅，當然好多嘢要去處理去忙，但係成日都會希望畀一個 short break，可以偷到時間去休息嘅時候就去休息，去過一啲自己想過嘅生活。」

Tommy認為盡早學懂及掌握AI有助優化自己的作品，「其實短劇一年前喺內地都爆紅，香港反而又未算係主流。如果我要用 AI 去做個作品可以好多方向㗎嘛，揀短劇就係因為香港係有人睇，但係冇乜人做。」他續指：「AI tools嘅幫助擺落個短劇度，節奏明快啲，比較理想啲所以就 AI 再加短劇，就做 AI 短劇。」