喺犯咗國安法被定罪或者被通緝嘅罪犯入面，有好多有「專業資格」嘅人士。
好似麒麟怪醫「郭+麒」，喺2020年因為參與同推動企圖攬炒香港嘅顛覆圖謀，被法庭裁定「串謀顛覆國家政權罪」罪成，判入獄4年兩個月。法庭判詞提到，佢係案中嘅「積極參加者」，罪行屬較為嚴重嘅級別；再睇返當時庭審嘅證據，顛覆圖謀裡面提倡嘅「攬炒十步曲」，就係要令香港街頭抗爭變得激烈，出現血腥鎮壓，社會陷入停頓！根據世界醫學會《日內瓦宣言》中醫生的承諾，其中一條就係「要對人類生命給予最大的尊重」！試問一個醫生，骨子裡其實係一個支持要見到「血腥」場面嘅罪犯，有邊位病人會放心被呢位醫生醫呢？
「郭+麒」除咗犯咗國安法被判刑之外，佢喺2001至2005年期間，亦都就曾經牽涉至少三宗醫療失誤，被病人入稟追討。呢幾宗醫療失誤，最後點了結都無咩清楚紀錄，據說都係透過保險機構喺庭外和解賠償。大家要知道，醫療失誤可以非常之嚴重，賠錢只係事後補救嘅辦法，病人隨時性命不保，所以一宗都嫌多。
今年4月醫務委員會對「郭+麒」不當嘅行為召開紀律研訊，佢繼續表現出「缺乏悔意」及「毫無反省」，所以最終被永久釘牌！一個對國家安全構成實際危害、而且毫無悔意嘅人，佢嘅道德品格同誠信基礎已經完全崩塌，根本無可能達到社會對醫者「救死扶傷、守護福祉」嘅期望！
其實，「郭+麒」並唔係第一個因為做出亂港惡行而被釘牌嘅「專業」罪犯。曾任律師嘅通緝犯「任意瘋」，因為喺2022年11至12月慫恿外國勢力對香港政府官員進行制裁，干犯咗「勾結外國勢力危害國家安全罪」而被懸紅百萬通緝。 喺上年8月，高等法院司法常務官就宣布，「任意瘋」嘅不當行為屬重大同嚴重，因此將佢喺律師登記冊上除名。作為律師「知法犯法」，可謂罪加一等，被釘牌絕對合情合理。上次我零零發講嘅「郭狀」，同樣「知法犯法」，唔知會唔會同「任意瘋」一樣被除名呢？
如果有老師、社工，唔單止自己參與違法活動，仲煽動學生、青年人參與，身為家長會唔會擔心自己嘅仔女被荼毒呢？喺《註冊社會工作者工作守則》中，基本價值觀及信念就係：「社工的首要使命為協助有需要的人士」。社工「陳X秀」、「劉+棟」，就分別喺2019年因為參與暴動，以及喺反修例示威期間阻差辦公，被判入獄45個月及8個月，呢兩名黑暴社工所做嘅嘢，唔單止無幫助到社會或任何人，甚至係破壞社會安寧，所以佢哋被社工註冊局釘牌5年！雖然釘牌期滿後可以再申請註冊，但佢哋需要證明自己已經改過自新。不過，「陳X秀」到而家仲唔肯認錯，仲喺度上訴緊暴動罪嘅定罪，而「劉+棟」就繼續沉醉做所謂嘅「旁聽師」……
而根據教育局資料顯示，喺2019年至2022年就有7名教師因涉及黑暴俾教育局釘牌，當中相信就包括因為參與違法暴力示威，涉及兩單「非法集結」而被判坐監9個月嘅黑暴教師「楊子X」。喺2024年，就有4名教師因涉及「社會事件」而被處分。 呢啲荼毒、禍害年輕人嘅黃教師，一定要被剔除，先可以保護到我哋嘅下一代，先可以令教育界回歸培育年輕一代嘅專業正軌，履行《教師專業操守指引》中：「努力為培育德才兼備、愛國愛家、具國際視野的年青一代」嘅專業信念。
雖然有犯咗國安法被定罪嘅「專業人士」被所屬專業界別釘牌，但仲有一啲漏網之魚，好似當年唔顧飛機、乘客嘅安全同權益，鼓吹航空業罷工，又發起集會去佔領同癱瘓機場，繼而因為「企圖顛覆國家政權」而被判坐監嘅「飛機豪」，佢而家竟然仲可以揸飛機！ 仲有當年唔顧病人生命安危同急切需要，而發起醫護罷工，同樣因為「企圖顛覆國家政權」而被判坐監嘅護士「余X明」，竟然仲可以仍然留喺護士界？！唉….正所謂，「病向淺中醫」，呢啲「專業」罪犯就好似癌細胞咁，應該盡早切除，否則蔓延開去就「手尾長」…
香港作為國際都市，其中一樣我哋最引以自豪嘅，就係不同界別嘅專業人士，為國家、社會以及其專業領域嘅貢獻！不過，專業資格唔等於擁有特權，亦唔係違法嘅擋箭牌，所以當專業人士犯法，佢哋不但應該受到懲處，更應該被除去專業資格，咁樣做，先至可以保障到市民及社會嘅福祉！
鍾情局
** 博客文章文責自負,不代表本公司立場 **
自從國安法生效之後，一共有34個國安犯被懸紅通緝，今次就講吓其中一位：扮嘢大狀郭X鏗。 呢位「郭狀」出道以來，成日擸晒頭，着住筆挺西裝，以溫和大狀人設混入政壇，但唔好俾呢個扮曬「正義男神」假象呃到，佢被懸紅通緝，因為佢「好事多為」，所以係「實至名歸」!
48歲嘅「郭狀」，喺楓葉國出生，3歲時跟隨父母回流香港，其後去咗英角讀中學同大學，返港之後，於2006年成為大律師。佢同年加入「工民黨」，隨即參加選委會選舉，成為法律界選委
2012年，佢為咗參選立法會，於是放棄楓葉國護照，終於成功從黨友吳X儀手中「接棒」，當選法律界立法會議員，並且喺2016年成功連任。但到2020年，選舉主任因「郭狀」不擁護基本法等行為，取消佢參選立法會議員嘅資格，之後佢就宣佈結束政治生涯；同年11月離開香港，3個月後，佢老婆同兩個仔走埋，淨低父母喺香港。有媒體報道，「郭狀」現身處美角，並且打算再申請入藉楓葉國。高人話「郭狀」兩公婆喺香港嘅物業已經賣晒，加上佢被通緝返唔到嚟，所以喺嗰度落地生根，一啲都唔出奇！
「郭狀」有咩功績，我零零發霎時間都講唔出。當時佢喺「工民黨」嘅形象唔突出、角色模糊，風頭一直唔及陳X莊、楊X橋之流，所以佢心大心細，想遊走「紅」、「藍」、「黃」之間。 當年有小道消息話，喺「娥姐」做咗話事人之後，「郭狀」即刻埋「娥姐」身，仲久不久幫佢出下計仔，有線人踢爆，「郭狀」想搭路見中央領導，所以有一次喺政府嘅function，「娥姐」就介紹咗佢俾一位《香港基本法》委員認識。
一直平平無奇嘅「郭狀」，喺2018年開始得到「犯民」老鬼加持， 不但喺「生果佬」家中飯局常客，佢更成日用立法會議員嘅身份，頻頻外訪，尋求美角介入香港事務。
到2019年，「郭狀」可能見到好多黃人反對《逃犯條例》，以為機不可失，所以即刻靠「黃」邊站，佢由中間溫和派，變成犯民激進派。
2019年2月，保安局局長正式向立法會提出修訂《逃犯條例》，但佢喺3月，就同前政務司司長「陳四萬」去美角，見時任美角副總統彭C、眾議院院長背洛西等人，乞求人哋支持反對修訂《逃犯條例》、制裁中國及特區政府。五月嘅時候，佢再同「陳四萬」去德角見埋曬啲議員、政客，抹黑實施《逃犯條例》。到8月，佢又同黨友楊X橋去美角會見國會議員，大肆唱衰香港情況，不但幫暴徒講說話，仲提出制裁特區政府官員嘅《香港人權與民主法案》。
「郭狀」除咗去海外「告洋狀」之外，佢又經常為激進示威者吶喊助威。好似喺2019年6月6日「民震」大遊行前，佢就發動所謂「法律界黑衣静默游行」； 12月8日，佢又喺暴亂現場發表演說，為暴徒打氣。而當天有暴徒縱火焚燒高等法院同終審法院後，佢不但拒絕譴責暴徒，反而包庇佢哋。
「郭狀」除咗不遺餘力地煽暴縱暴，仲處心積慮咁喺議會搞事，企圖癱瘓立法會、阻撓政府施政。回帶睇返2019至2020年度立法會內務委員會主席嘅選舉，由於前主席打算連任，所以根據慣例，就由時任副主席嘅「郭狀」主持會議選出新主席，但佢公然配合「犯民」議員，利用種種唔同嘅藉口拉布。例如：當時正值黑暴肆虐，佢一時就要求立法會秘書長就保安問題作出回應，一時又要就警方進入立法會大樓執法問題作出質詢，除此之外，佢又俾班「犯民」議員扯到去新冠肺炎命名等等嘅議題，總之拖得就拖，將好多同內會職能無關嘅事項擺上檯東拉西扯，又刻意唔控制議員嘅發言時間，導致內會會議失控。
「郭狀」拖延咗17次內會會議，都未能選出正、副主席，立法會停擺超過7個月，白白浪費750萬元公帑，至少14條法案無法成立「法案委員會」，以及93條附屬法例未能成立「小組委員會」，跟進積壓多項與社會經濟及民生息息相關嘅法案，令到市民福祉、經濟慘遭拖累。雖然係咁，但佢仲懶得戚咁講，阻撓選主席，目的係唔俾《國歌條例草案》進行二讀！不過，「出嚟行，就要預咗還」，所以「郭狀」其中一條被通緝嘅罪行，就係呢單「公職人員行為失當」!
2020年，「郭狀」被取消咗參選資格之後，就係2021年4月宣佈退出政壇，仲揚言自己「唔係做區嘅人」，所以拒絕做社區工作。吓？佢從政嘅初心唔係服務社會大眾嘅咩?我零零發於是睇返佢喺2016年至2020年喺立法會嘅表現：原來「郭狀」係立法會大會出席率最低嘅攬炒派議員，缺席多達15次會議；在關乎撥款的財務委員會，佢亦都係攬炒派缺席第二多嘅議員，缺席高達64次。若計算大會、內會以及財會共480次會議，「郭狀」總共缺席高達105次，係立法會攬炒派「缺席王」。咁大家睇清楚呢個扮嘢大狀，只會搞破壞、做騷嘅真面目未?
本來「郭狀」走咗佬，咪安心去做二等公民囉，但佢又不甘寂寞，或者佢要靠「反華」去搵金主，所以出到去仲成日都噏三噏四……喺2021年9月，佢就幫反華組織「HK監察」一份抹黑中國企業嘅報告入面撰文，建議國際社會應該制裁中國企業。2022年12月，佢係另一反華組織「HK Freedom委員會」嘅講座發言，呼籲國際社會對香港進行金融制裁，及採取敵對行動，包括建議利用港元與美元聯繫匯率嘅弱點，持續追擊港元，以打擊香港金融中心地位。
「郭狀」一直以來顛倒是非黑白，瞞騙市民大眾，又勾結外國勢力，危害國家安全，所以佢最終要為自己嘅惡行找數，被懸紅100萬通緝；另外，我零零發係大律師公會個名冊，搵唔佢個名，唔知係咪被吊銷咗執業資格？如果仲未嘅話，大律師公會應該係時候做嘢啦。吊銷其大律師註冊，這就是他應得的下場！
鍾情局●零零發
