京東佳寶8折名不符實？ 減價戰未入肉

京東去年收購咗佳寶超市之後不斷擴充，香港門市突破100間。今日（6月11日）推出「全場貨品8折」優惠，引起網民熱烈關注討論，有網民質疑佳寶抬高價格再打折。

Marketing 係米妮老本行，加埋過江龍對地頭蟲的商戰元素，更加吸晴，自然要親身去佳寶視察，一探究竟。

剛好路過將軍澳廣場，就專門去佳寶，只見人頭湧湧，某些貨架空蕩蕩，好似打風前掃貨嘅現象，睇嚟佳寶呢招「全場8折」得喎。

但有貎似格價專家嘅街坊同米妮講：「呢隻金象牌8公斤泰國米，未做8折之前賣緊80幾蚊一包，而家賣$92.8，仲貴過未減價之前喎，都係去其他超市睇吓先落手啦。」

聽見街坊咁講，我又睇吓其他貨品。例如3枝裝刀嘜花生油（1000毫升）佳寶原價$115，8折後係$92；對比其他超市，同為3枝裝（900毫升，少100毫升）賣$88.8。佳寶3枝8折後換成900毫升計係$82.8 ，少少哋$6。又再睇睇李錦記舊裝特級蠔油，佳寶賣$39一枝，8折咗$31.2，喺其他超市見到，李錦記舊裝特級蠔油2枝加1枝新裝蠔油嘅3枝優惠裝賣$75 ，即係優惠裝平均每枝$25 ，佳寶賣這款蠔油8折後並不算便宜。總的來說，今次佳寶8折貨品仍然有平有貴，平的也不是真係比人哋有8折咁多，講「全場貨品8折」似數字遊戲多啲。看來京東未打真軍，暫時停留在marketing階段，如果京東將來真係要打減價戰，大幅殺價，就另當別論！

雖然減價戰暫時仍處於前哨戰階段，但兩大超市百佳和惠康一啲都唔執輸，已出手反擊。好似百佳超市最新推出6月限定大派$20現金券優惠，實行頂一頂先。

內地去年出現外賣減價大戰，京東都係主要玩家之一，唔知會唔會喺香港出手。本港超市減價戰一觸即發，若然開打，最大得益者當然係市民大眾。米妮當然更加關心幾大玩家嘅marketing策略，觀摩一吓有乜推廣高招。

米妮

Brand起來！

** 博客文章文責自負,不代表本公司立場 **

要成為一代錶王談何容易，擁有百年歷史、追捧者願意等候10年購買心頭好，只是基本要素，所講嘅錶王百達翡麗（Patek Philippe ）早在1845年已擁有製錶革命性專利技術，獲得無匙上弦同時間設定系統專利，革命性發明令用家可以直接透過錶冠為手錶上鍊，不用鎖匙極大方便用家。

錶王嘅多項「第一」里程碑，包括1868年製造出瑞士第一枚腕錶、1925年推出首款具備萬年曆功能嘅腕錶，因此奠下現代腕錶嘅使用基礎，至今影響深遠。錶王現正在香港置地廣場中庭舉行珍藏展，除咗難得一見嘅珍藏展覽外，百達翡麗（Patek Philippe Geneva by The Hour Glass)位於中環置地廣場全新專門店今日（6月9日）亦正式開幕。

珍藏展覽嘅展品，係由一位收藏家借出八件全球天下無雙嘅珍貴座枱鐘，八件展品彌足珍貴，細看琺瑯物料精雕細琢嘅圖案令人拍案叫絕。我現場所見，八件展品中，2014年為慶祝品牌175周年而推出嘅帆船圖案坐枱鐘，工藝尤其細膩。

現場展出收藏家的八件珍藏展品，全球獨一無二，彌足珍貴。

眾所周知，Patek Philippe 是名表愛好者及收藏家至愛，男士Nautilus 系列、Aquanaut 系列溢價強勁，客戶等候名單極長，據知熱門鋼款Nautilus 等待期可長達10年以上。

原來品牌每年總年產量只有75,000隻錶供應全球，當中共有180個款式，每個款式平均生產約400餘隻錶。至於Patek Philippe 全球授權商只有250間，更罕有嘅係，Patek Philippe 全球獨立品牌專門店只有三間，分布於日內瓦、巴黎和倫敦。

想參觀擁有186年歷史Patek Philippe 珍藏展嘅名表愛好者，可到置地廣場品牌新店了解詳情，展期至6月13日。

米妮