「幫緊你」定「害緊你」，「冇得揀」 定「有得揀」?

就大埔宏福苑大火之後嘅長遠居住安排，宏福業主(A-G座)如果想透過「特設銷售計劃」購買同選擇單位，就要喺6月30日前簽署「接受收購建議信件」成為首批揀樓人士，否則就成為第二批揀樓人士(截止日期：8月31日)。宏志閣(H座)業主方面，如果有75%或以上業主喺6月30日前簽署「接受收購建議信件」，政府嘅長遠方案便會包括宏志閣。反之，長遠方案將不會涵蓋宏志閣。

雖然距離6月30日剩返4日，不如都等我零零發分析下呢個收購proposal。
首先大家必須認清一個冷冰冰嘅現實，宏福苑呢個私人屋苑已經無晒市場價值。就算係無被火勢波及嘅宏志閣都已經俾人當做「凶宅」。呢個唔係嚇你，亦唔係危言聳聽，你試吓去任何一個地產網站，揀「宏福苑」嘅「估算價」，得出都係「-」嘅符號。再試吓任何一個銀行網站「網上估價」，得出都係「不適用」嘅答案。大家覺得「-」同「不適用」，等到幾時會有改變？係咪等到大維修(如果有) 之後，等幾耐？

有地產高人指出，政府收購價是合理水平以上嘅價錢，足以令到宏福苑嘅居民重新置業，不單在大埔區，仲可選擇大埔以外嘅地區，甚至有條件選擇私樓。買過樓嘅人都有類似嘅經歷，樓市係瞬息萬變，唔會等人，睇啱嘅心水樓盤，當你猶豫嘅時候，你嘅機會成本不斷增加，可能過多一陣就已經無咗、又或者已經貴咗。

喺法律層面，現時整個宏福苑有啲單位仲有未供完嘅按揭，有啲業主不幸罹難要進行處理遺產程序，甚至有啲業權失聯、根本搵唔到人處理，牽涉一連串複雜嘅法律問題。另外，根據保險投訴局最新公布2025/26年度報告，喺2025年投訴局共接獲857宗投訴個案，較上一年度勁升32.7%，當中主要嘅爭議係保單條款嘅詮釋。同樣，處理法團為屋苑購買嘅火險賠償問題十分複雜，需要法律同保險專業人士處理。咁如果業主同意將業權轉售政府，政府就會承擔相關法律、程序、賠償金額同處理時間上嘅風險。係人都知處理法律細節最麻煩，將啲咁複雜嘅問題交俾政府處理，聽落又真係可以減輕咗宏福業主嘅煩惱。

個人財務方面，今次政府提出嘅收購價，係根據大火前嘅市價，仲要加多啲，金額由三百五十萬到五百萬港元不等，坦白講係幾優厚。平心而論，一個市值已經歸零嘅單位，而家業主有實實在在嘅現金，就可以有最大嘅主動權同彈性，鍾意可以買私樓、買居屋又得、買綠置居都得；想喺大埔原區落腳可以，想搬去九龍、新界其他地方重新出發都得。

正當大家為頭家做一個重大決定嘅時候，偏偏就係有班所謂「有心人」，扮晒災民嘅「代言人」、扮晒「為民請命」，煽動災民去杯葛收購計劃。線人話有一班「有心人」係宏福苑居民，不過佢哋講一套做一套，一邊叫「企硬」、「同政府抗爭到底」，擺出一副同你並肩作戰嘅樣，但另一邊廂，佢哋自己就私底下接受收購，唔知係咪諗住K.O.咁啲人，等少啲人同佢哋爭靚樓? 另一班就係路人「甲乙丙」嘅口水友，成日喺社交媒體搧風點火，又講到政府官商勾結「昆」啲災民賤賣業權咁話，又或者喺度滿腔激情做show……等到一班純真嘅災民誤信讒言、聽佢哋唆擺，miss咗個deadline之後，佢哋就會拍拍籮柚、轉身閃人，對災民日後嘅死活、福祉置之不理！

宏福苑業主嘅選擇，係關乎佢哋未來幾十年嘅生活安排，千祈唔好俾任何別有用心嘅人騎劫！業主一邊要面對失去家園嘅徬徨，一邊又要應付排山倒海嘅法律同財務問題，精神上早已經到咗極限，所以做決定前，真係要保持一份清醒同理性，唔好淨係沉醉喺情懷之中，要認清邊個係真心真意咁幫你重建家園，邊個係攞你嚟做戲！

每個人嘅經歷選擇都好唔同，不過keep住一個唔知幾時可以住、可以放租、可以放盤嘅單位，喺市場上唔應該有人會接手嘅物業，係咪一個適合嘅選擇？「別有用心嘅人」而家就巴巴閉閉，好似「幫緊你、幫緊你」咁，到你錯過咗收購之後，佢哋可能耐唔中喺社交媒體嗶哩吧啦鬧幾句，跟住就人間蒸發…… 你聽咗佢哋講，到時兩頭唔到岸就後悔莫及，仲要面對一籮籮嘅問題，你估佢哋仲會唔會繼續幫你? 不過最重要係，你估佢哋根本有冇能力幫到你先？

鍾情局。零零發

鍾情局

** 博客文章文責自負,不代表本公司立場 **

有對曾經喺瑞典非法居留嘅港人夫婦，個兩歲嘅女Lily被當地社福局看管，咁所以佢哋返香港之後，就喺社交媒體叫人幫手救救Lily，近日佢哋又喺屋企生咗個Danny仔，不過就以個人私隱理由，拒絕進行DNA測試，而令阿仔遲遲做唔到出生登記。Danny爸仲喺電台訪問話：「如果經司法覆核，終審法院判我要交DNA，我先會交DNA」。最後兩個搞到俾警方以涉嫌「疏忽照顧兒童」拘捕。不過Danny爸最後都懸崖勒馬，做咗DNA測試，同阿仔攞到出世紙。

不過有個後生仔，就一直對呢啲「歪理當真理」、「個人自由至上」戒條執迷不悟……咁silly嘅主角就係前「沙田大學」學生會會長「So進瘋」。

「阿So」中學讀名校「皇X書院」，期後入讀「沙田大學」。但可惜當佢自2019年接任「沙田大學」學生會會長之後，可能受到過往幾屆前會長(好似周X峰、區X灝、區X僖)鼓吹「港獨」嘅歪風影響，就不斷利用呢個銜頭，抹黑中央政府同香港特區政府，為反中亂港分子嘅活動站台。

2019年6月黑暴期間，「阿So」連同大專學界召開記者會，威脅政府如果唔撤回修例、收回612暴動定性、釋放並不起訴被捕市民等訴求，就發動不合作運動，包括包圍政府總部及發起「和你塞地鐵」等；同年G20峰會喺日本大阪舉行期間，佢又同其他大學嘅學生會骨幹，飛去大阪參與遊行，乞求外部勢力干預香港； 喺嗰年「沙田大學」嘅新生迎新盛事，「四院會師」期間，佢更帶領超過300個着「暴徒裝」、戴面罩嘅黑衣人喺新生面前狂叫口號，將一個好地地嘅大學迎新會，變為暴徒嘅所謂「誓師大會」。

「阿So」出咗嚟嗌兩聲、揼吓地，就即刻搞到熱血沖昏頭腦。2021年立法會選舉期間，「阿So」喺Facebook轉載通緝犯「許X峯」嘅帖文，煽惑市民投白票或不投票，結果惹禍上身，被廉署拘捕。2022年喺原審法院仲狡辯，話條例「侵犯言論自由」所以「違憲」；結果裁判官當場裁定合憲，佢唯有乖乖認罪，判囚兩個月同緩刑十八個月。點知佢唔甘心，由高等法院一路上訴到終審法院。直至今年5月29日，終審法院裁定佢嘅理據沒有可爭辯之處，直接駁回佢嘅申請。

其實就算「辯論比賽」，都唔係死撐就得㗎。「阿So」嘅大狀喺法庭度，仲死撐話投白票或者唔投票本身唔違法，「阿So」只係鼓勵其他人做合法嘅嘢，所以佢嘅言論自由唔應該被限制咁話。而代表律政司嘅資深大律師余若海指港獨份子嘗試搞所謂「35+」，以「當選議員」嚟搞奪權，不過依家失敗咗奪唔到權，就改以「杯葛選舉、煽惑白票」嚟損害選舉。所以，限制呢啲煽動言論係維護市民參與選舉嘅權利。

法官林文瀚喺庭上亦一針見血咁講：「言論自由唔係絕對！」言論自由受限於尊重他人權利名譽、保障國家安全、公共秩序、公共衞生等。首席法官張舉能更表示有啲國家，甚至會強制選民投票，港府鼓勵選舉、維持秩序絕對係理想嘅政策。「阿So」想攞「言論自由」做遮羞布，根本係自欺欺人，可見佢有嚴重嘅認知盲點。
其實投票權係民主進程嘅里程碑，係好多代人爭取多年先至得到，就好似阿聯酋喺2006年先有第一次選舉，沙特阿拉伯嘅女性，更加要等到2015年先有得投票。投票權唔只係一張選票，仲代表住社會平等嘅實現。

成件事嘅始作俑者「許X峯」，喺2021年立法會選舉投白票，到2025年換屆選舉，佢又同竄逃海外嘅「姜+偉」呼籲杯葛選舉。當呢班「着草先鋒」口口聲聲話要爭取民主，轉個頭就叫人唔好投票，阻止其他人行使公民權利，仲用「言論自由」嚟做藉口，其實係咪佢哋喺度剝削緊人哋嘅自由先? 當佢哋喺海外享受緊所謂「民主、言論自由」嘅時候，點解仲要日日喺網上叫香港人「衝呀、香港人加油呀」?

可惜，香港仲有啲好似「阿So」嘅人信佢哋，戇居居咁，人講乜就做乜，搞到坐監、前途盡毀……根據資料，廉署喺2021年同2025年兩屆立法會選舉入面，總共拉咗21名年齡22至65歲嘅“Silly”煽動投白票！

根據我零零發觀察，每逢「着草先鋒」喺網上告急叫人捐款，或者叫人做呢樣做嗰樣嘅時候，就一定有蠱惑! 所以大家唔好再silly喇，大家齊齊Save “Silly”啦！

鍾情局.零零發