非份之罪｜葉靖儀初試啼聲擔大旗壓力爆煲 胡敏芝顛覆乖乖女形象為吳偉豪「戴假胸」變癲婆

《森下仁丹Bifina Si益生菌呈獻：非份之罪》以六個單元故事構成，分別為《無臉女屍》、《石棺禁戀》、《一億殺機》、《危險遊戲》、《骯髒的子彈》及《恐怖情人》；六個單元圍繞形形色色的「貪念」（非份之想），從而引發出連場暗黑「人性迷途」（犯罪）故事，全部取材真人真事。

焦點圖片

賴慰玲陰暗面女護士忠奸難辨

為了增加新鮮感，《非份之罪》起用了相當多的演員，包括實力演技派、金牌綠葉及潛力新生代演員。今日（6月26日）官方率先發布了三位重點女演員：賴慰玲、葉靖儀及胡敏芝在劇中的精彩劇照，三人在各自單元中均有突破性演出。先說《石棺禁戀》主角賴慰玲（阿賴/Winki）及葉靖儀（Michelle），二人分別飾演善良但有著見不得光陰暗面的護士謝芷君（Cathy）；以及為了黐飲黐食、連畀人抽水都唔介意的迷途少女何佩雪（阿雪），兩個原本毫不相干的人，因為一單石棺藏男屍案離奇地走在一起。

劇照

劇照

劇照

劇照

劇照

Michelle首擔大旗即要應付大量對白+情緒戲挑戰極大

《非份》是Michelle首度挑大旗擔當重戲份角色，與出名好戲的前輩賴慰玲及鄧智堅有極多對手戲之餘，還要應付多場極致情緒場口，對於新人來說絕對是嚴峻考牌作。Michelle接受官方訪問時，坦言起初獲Amy姐邀請開會談論劇本及角色時大感意外，因而做足功課之餘，亦大感壓力：「我其實唔識Amy姐，佢話因為睇過我同Winki合作（J2戀綜《CP訓練營》）。呢個角色真係超級大壓力，因為戲份都真係算多，當然我都好開心，因為我真係好鍾意演戲。頭幾日開工真係非常緊張，第一次記咁多對白，同Part咁勁嘅前輩。」、「我呢個角色少女得嚟又有啲大膽嘅，堅哥叫我做乜我就做乜，同啱啱入行嘅我都有啲相似，都算係乜都敢試，只係劇入面個角色再不顧後果啲。」

Michelle分享嘅賴慰玲窩心三招，分別係親授演戲秘技、做咩都陪住你，以及好有耐性。

憑《CP訓練營》演出贏得監製信心 監製王心慰（Amy姐）讚葉靖儀：有潛力更上一層樓

「我亦都好開心好開心第一次拍劇就Part到Winki，其實拍《CP》時佢已經教咗我好多關於做戲上嘅嘢，而我對住佢亦冇咁緊張，因為佢好Nice，佢好多嘢都解釋得好清楚我聽，好似拍喊戲咁，佢話佢自己會聽啲會令自己感觸嘅音樂去幫助入戲，真係幫咗我好多」、「所以我每日開工都好開心，因為無論拍嘢同放飯都係同Winki一齊。」

劇照

問到Amy姐為何如此大膽起用新人出演如此高難度角色，Amy姐坦言一開始便想找新面孔演阿雪：「其實我同導演都搵咗好多新人試呢個角色，呢個角色除咗戇居居，又要靚女，咁佢係啱嘅。試鏡嗰陣，我哋有畀戲Michelle試，主要都係睇吓佢做唔做作。之後我睇埋佢喺《CP訓練營》嘅演出，我就更加有信心，仲有阿賴lead住佢添。」Amy姐還大讚Michelle表現不俗：「當然仲有進步空間，假以時日係有潛力更上一層樓架。」

劇照

《麻雀樂團》可愛二妹大暴走 胡敏芝挑戰「胸大無腦」狂迷

至於之前憑《麻雀樂團》的可愛二妹「程晴」成功入屋的胡敏芝Karen，這次在《危險遊戲》中將顛覆觀眾認知、飾演凡事都去到好盡的狂迷Wendy、嚴重傾慕吳偉豪，更愛到過晒火…除了一洗清純乖乖女外表演癲狂角色，Karen在劇中還要迎來兩大極具視覺衝擊的挑戰—「戴假胸」及「玩飛索」。對於Wendy這個角色，Karen坦言「好有挑戰，同真係好癲」：「因為戲入面我哋好多整蠱人活動，其中一個活動就係玩飛索，我哋特登入咗東龍島，喺崖度跳落去。玩呢啲活動，未玩一定最驚，但其實跳落去嗰吓唔係好驚嘅，因為我本身都Enjoy刺激活動，我之前《野外步出3玩野加大馬》都有飛過。」至於為何要戴假胸，Karen：「呢個角色設定係有少少typical嘅胸大冇腦，所以要戴假胸，而佢亦都因為呢一點被吳偉豪利用。」另值得留意的是，Michelle與Karen在劇中的打扮均充滿青春氣息，值得期待。

劇照

劇照

劇照

劇照

劇照

劇照

劇照

劇照

由王心慰（Amy姐）監製、翁善瑩編審的「人性反思」另類寫實劇集《森下仁丹Bifina Si益生菌呈獻：非份之罪》，逢星期一至五晚八點半翡翠台播映。主要演員有吳啟華、陳煒、阮浩棕、劉佩玥、朱敏瀚、吳偉豪、賴慰玲、何沛珈、徐榮及單立文等。

到底有幾多人覺得佢哋似樣呢？

Momo呢場淚如泉湧嘅喊戲演得好好。

賴B強忍哀痛安慰Momo，獲讚「好戲到癲」。

昨晚（7月6日）第二個單元《石棺禁戀》正式展開，劇情講述護士謝芷君Cathy（賴慰玲飾）與癱瘓的長期病患顧曼莉Mary（吳沚默飾）感情要好，但背地裏，芷君卻是曼莉老公阿Ben（蔡誌恩飾）的秘密戀人…另邊廂，由堅哥（鄧智堅飾）率領的「犯罪三人組」偉錫（方紹聰奶仔飾）及細傻（唐嘉麒飾）壞事做盡，並與一名名叫小雪（葉靖儀Michelle飾）的關係微妙。某天，阿Ben被發現藏屍於某工廈單位灌滿水泥的木箱中，死狀恐怖…警方初步調查懷疑租用單位的「堅哥四人組」，就在警方著力調查之際，小雪忽然背叛同伴選擇自首…

被Momo安慰嗰吓，賴B個樣愕然又激動。

最後賴B崩潰爆喊。

呢張淚流成河，簡直世界級。

《石棺禁戀》懸疑感升級！網民呻真兇「好難估」
對於《非份》第2個單元，網民認為懸疑感升級之餘，並爭相留言指真兇「好難估」，並認為賴B有可疑：「會唔會係賴偷晒阿Ben啲錢」、「似係賴買兇殺人喎」 、「兇手有啲難估，個個都唔似」。而昨晚焦點，落在大婆（Mary）吳沚默及二奶賴慰玲（Cathy）的微妙關係上，原來Mary一早知道Cathy與阿Ben關係，但為了令阿Ben回復生氣，Mary選擇接受及沉默，並對Cathy零恨意，而Cathy亦真心想照顧Mary，而正因這個「不尋常的關係設定」，造就了沚默Momo與賴慰玲（賴B）昨晚兩場超好戲VS！

賴B冧豬樣、同含情脈脈偷望樣都好入戲。

Momo個樣又甜美又溫柔，唔怪之得有網民讚佢靚。

首先在認屍場口，Momo失去老公及依靠自然哭成淚人，而Momo亦將崩潰無助淚湧情緒演得恰到好處；至於賴B，由於當時她尚未知道自己的「小三」身份已被大婆掌握，加上角色生性善良，故賴B全程只能強忍哀痛，雖然單看表情只是普通傷感，但從肢體的無力感卻清楚表達出角色的錐心之痛，不愧為公認的好戲之人，難怪網民大讚好戲：「賴B好戲到癲」、「忍住傷心安慰大婆」。

佢亦將角色四肢無力嘅病情演得好好。

另一場則是Momo與賴B的「攤牌戲」，首先Momo以淡然的哀傷說出：「我冇嬲過你哋」、「呢兩年，我睇住Ben由冇晒生氣到有番少少笑容」，再到痛心自責：「你睇我，我咩都做唔到，我照顧唔到佢，畀唔到幸福佢」已相當好戲，而聽到大婆暖心話後「如釋重負」的賴B，終能「放肆」地將抑壓已久的哀痛一次過爆發出來，而賴B的極痛心喊戲演技，亦自然是神級，難怪網民話「睇到一齊喊」。

呢幕崩潰爆喊自責都好正。

吳沚默親揭私下與賴慰玲惺惺相惜
除了Momo與賴B的「淚之對決」，網民昨晚還掀起了一個有趣的熱討，原來有頗多網民覺得Momo與賴B極似樣，並笑言覺得Momo與賴B之間才是真愛，呼籲二人原地結婚：「佢兩個好似樣」、「我成日以為同一個人」、「終於同框演出」、「支持沚默同賴B原地結婚」、「兩個都係我鍾意嘅演員」。談到被指與賴慰玲撞樣，Momo受訪時笑言：「係真係好多人話我哋似樣，但我又覺得唔似咯，因為我塊面大過佢，哈哈。」Momo續指與賴慰玲雖是第一次合作，但卻覺得大家好夾：「佢係好好嘅演員，我好開心同佢合作，因為我覺得我哋幾Syn（Synchronize 同步到），有種惺惺相惜嘅感覺。好似尋晚場攤牌戲，佢趴喺我大髀上面喊嗰度，係我哋傾出嚟嘅，因為我哋覺得嗰個Moment佢個角色可以釋放，我哋兩個係呢個世界上真係關心呢個男人嘅唯二，嗰刻大家都拋棄咗所謂嘅小情小愛，多咗份共同嘅互相理解，所以就設計咗呢個動作，亦都解釋到後面發生嘅所有嘢。」