「AI泡沫」？「黑色星期五」憶曹Sir，挑通眼眉莫亂嚟！

中國初創「月之暗面」忽然被曝取得AI技術大突破，原本美事一宗，反釀成黑色星期五，全球AI與半導體類股大跌，市場人士講，今次又係一次「DeepSeek時刻」，好多人接唔住。

下周開市邊個夠膽買大中國AI股？說著說著，我想記曹仁超。2010年，我同報行前輩談起曹Sir最like嗰位股神畢菲特，大駕光臨比亞迪深圳廠，那些年仲咪係電動汽車「小學生」的比亞迪，再者，深圳企業以華為最被睇好，2003年，同美國思科打官司，打到出哂位，華為有兩件事好爆︰一、老闆任正非好神秘；二、華為原來搞路由器（Router）與交換機（Switch）好勁，思科都怕咗佢咁話。

再看比—亞—迪，那路的大神？哦，做充電電池出身，點會轉行做電動車呢，賺到錢喺深圳炒樓好過啦，當日我同前輩笑完之後，回頭已是百年身，你知否，畢菲特係2008年聽拍檔芒格話，買「少少地」比亞迪股份玩下，8元入市，買入2.25億股， 2010年股神親身去比亞迪之後，便一揸17年至2025年出貨，全數賺足39倍——2010年比亞迪十幾蚊價位時，我就係掛住笑，無買「少少地」玩下，粗糙計，如果我跟股神賣比亞迪，學佢長揸，至少執到30倍身家啦，笨！！！

股比亞迪走甩咗，可借中國AI股翻身發達乎？《人民日報》曾經寫過曹Sir的傳奇，其投資理論好簡單又好賺——自1969年開始，曹仁超開始涉足股市，他用5000元起家，通過炒作高風險、高回報的股票，3年下來，曹仁超賺得28萬元。

香港那些年經歷文革震盪，那些年21歲的曹Sir夠膽入市，於是搭上「香港會更好」這班車，果然，百業陸續回穩。香港股市是春江鴨，感覺到暖流源源而至，於是升到嘭嘭聲，促成曹Sir獨步的「有智慧不如趁勢」理論——投資必須抓緊趨勢，如能掌握一個浪，足可改變一生命運——曹Sir往後幾番輸輸贏贏的股海生涯，更加印證他的理論是對的。當然，識得上車/幾時要落車；止蝕唔止賺/唔好望賺到天花板，如此種種曹氏秘笈就不必多談。

今時今日今次的中國科投大潮，有點反常，反而提醒我要小心，趁勢，是趁上升之勢，曹Sir教落「寧買當頭起，莫買當頭跌」，悖論的是明明大家知道中國科技好、中國科技勁，點知「AI泡沫」從美國吹過來的，吹出了黑色星期五股災——我要信中國係時候趁勢起，定係要服從不買當頭跌的定律？炒股，唔係咁易，曹Sir都試過「睇得太好，睇住佢燶」的慘痛經驗。

唔好怪我讀得書少，我諗諗下，現階段要學下「睇波唔賭波」的好市民宣傳，嗱，季軍爭奪戰好睇到拍爛手掌，6比4英格蘭險勝法國，欣賞過程賞心悅目，如果話賽前買「波膽」的話，真係財散人安樂。

姑勿論如何，從DeepSeek時刻、Seedance 2.0恐慌、韜定律橫空出世，都是人生難遇的精彩樂章，尤其你是中國人，或者是中國擁躉的外國人，你會感覺到這個世界好有希望。

後記︰「中國人常講『單弦不成音，獨木不成林』。人工智能發展不應該是某個國家的獨奏，而應當是全球合作的交響。」習近平出席2026世界人工智能大會發言如是說，重中之重一句話︰「要抓住難得的歷史性機遇，鼓勵開源開放、合作共享」。

環顧世界科技強國當中，堅持AI技術開源，中國只此一家，試問習慣壟斷專利、閉環開發的暴利者，見到中國你怕唔怕？AI泡沬是有的，恕我直言，呢一瓣，美國只此一家。

黃秉華

** 博客文章文責自負,不代表本公司立場 **

周末忽然放晴，適逢遊到去中山石岐，夜飯啖罷清甜龍眼一大抽，眾人嚷著要去逛孫文西路，講老實，收咗日頭都好熱，不過，驚見好多好多人，目測比起上世紀70年代旺角先施至滙豐總行一帶人海奇景，還要「疊馬」三倍或以上，點解？原先呢條步行街係「放任自由市場」，兩邊盡是小販熟食攤檔，搞到衛生環境好惡劣，加上兩旁舖頭真係孫中山年代，好多舊樓未見其昔日風采，只感覺是破落失收，你話如斯環境有冇運行？

AP圖片

經過三幾年時間，中山市話事層決心執行「香山古城保護活化」，嗱，大家學嘢啦，原本你以為這是「趕走小販」大行動之嘛，結果出來，變成悅目耀眼的工程——1992年奧運在巴塞隆拿舉行，當地政府趁盛事部署巴塞隆納的「都市再生」（Urban Revitalization），成為全球城市規劃的標竿，當時我做記者，印象猶深——石岐市復興一條520公尺的老街，可與西班牙當代偉大項目相提並論嗎？

說著說著，眾好友發現新大陸——百年歷史的思豪大酒店翻身重開營業，這間酒店與隔離香山商業文化博物館，同樣排隊，不是排隊登記入住，而是裡面古色古香，吸引人流，再者，外面咁熱，酒店開足冷氣，順便歇歇腳啦。話分兩頭，我在冷氣大堂讀到《環球時報》海風的文章，題為〈中國“冷實力”是什麼力？〉事緣歐洲大熱（今屆世界盃亦然）係人都知，更搶眼球反而係國產冷氣機在歐洲賣爆了，同比增長超過70%，其中可擕式分體冷氣機甚至在歐洲多國賣到斷貨。大熱的法國更是出現「一機難求」，同樣地，英國可擕式空調搜索量暴增。講時講，兩大熱門有冇機會在決賽碰頭？

話分兩頭，中國「冷實力」贏得有道理，全憑擁有「完整零部件體系，讓研發、製造、法務、認證、物流、管道、售後無縫銜接」的優勢。注意啊，「冷實力」不是硬實力和軟實力之間的新名詞，而是兩者疊加之後，在全球市場上形成的一種現實穿透力。

咁，中國冷氣機是否產能過剩？問得好，依家歐盟正在研究「北京鴨」是否對歐洲市場進行傾銷，兩個問題分別在於歐洲人可以「食無鴨」，不過，有部分身體冇咁掂嘅歐洲人再得不到冷氣機，可能「危害」生命。

講完冷氣與北京鴨，不得不提到依家「大灣區」後生仔女最熱的話題有兩個︰一、年滿35歲，唔係好值得恭喜，你可能成為裁員對象；二、全民熱烈追求人工智能技術，落後者實情係「無得撈」。

So sad，咁點好呢？管理大師杜拉克講企業與創新時，提醒大家，美國70年代在全球逆境經濟環境下，保持了就業增長，原因不是高科技，事關矽谷養不了海量的就業人口，那是什麼？是中小企業別具創新和適應大環境的應變能力，時至今天，顛覆與破壞力俱全的AI普及了，企業與社會適應力包括對新技術應用。

回頭望望孫文西路四周圍人群，哦，再明白多一個道理——石岐文體旅產業可以吸引人流，目的是盡量增加就職，核心在於市政府有本事投資落重本，打造文體旅的軟硬件，例如一块名為「裸眼3D大屏」的立體廣告牌，就聚焦央視十幾次的報導和關注。一句話︰「千里來尋故地，舊貌變新顏」。

後記︰如何在一條街重活熱鬧氣氛、消費與就業、網紅打卡點？點子數不勝數，我在步行街買了四支中山特產「菠蘿啤」，回去欣賞四強爭霸，勁！