有個港大女孩叫Betty（黃嘉慧），8歲偷渡來港，一直攞唔到身份證，揸住「行街紙」生活，去年考入港大醫學院，今年1月終獲入境處發香港身份證，佢可能好開心，就在Facebook發咗篇1萬1千字的文章：「2014年之前的我，沒有身份證。」佢成為網絡紅人，不過係負面嗰隻，好多網民認為佢來港搶咗香港的資源。
佢在2003年2月8歲時偷渡來港，由於是家中第二胎，在內地不能入學校讀書，也不能申請來香港與家人團聚，最後自行決定跟蛇頭坐船偷渡來港(年紀少少何來偷渡費？)。Betty後來到入境處自首，她說被入境處職員強逼她承認是家人帶她偷渡來香港的，她堅決否認，「結果這場精神搏鬥我贏了。戰利品是一張讓我合法地出現在香港街道上的行街紙。」
Betty有行街紙但無身份證，不獲一些較好的學校錄取。最後她拼博上位，去年獲得港大醫學院取錄，她也反擊，「政府說我不能考公開試，即使能考『你也考不到大學！跟住唔會搵到工作、唔會有人請！』結果，我考進了港大醫學院」。
她還在Facebook文章再加上一張在入境處門口拍的照片。
這可以是一個奮發上進的故事，當然亦可以一是內地人食盡香港好處的故事，由你去演譯。但在網上世界，很多都以「賊」、「偷渡犯巧威威」去痛罵她。
我比較從一個「年少無知」的角度去演譯。Betty的確是食到香港的好處，偷渡來港，最終攞埋香港身份證，雖然話佢讀書唔叻港大唔會收佢，但佢如今交4、5萬元本地生學費，一個醫學院本科生的培訓成本係100萬，佢只係讀5年佢都「賺」咗475萬。在香港現時比較反內地人的社會氣氛下，Betty得到了好處就不應再出聲了，否則是自招其罵，而且在同學間也出了名，也不利以後人際交往。可能她覺得一口烏氣忍了十多年不吐不快，一時衝動就說出來吧，根本預計不到會有這麼大和這麼負面的迴響。
我因為做生意的關係去過外國，見過華人受歧視的慘況，小時候也見過親戚由內地偷渡來港，見過他們冒上的風險，所以比較同情新移民的處境。40年前表哥偷渡來港抵達我家的一幕，如今還歷歷在目，他兩隻腳被蠔殼割得稀巴爛，告訴我如何避開內地邊防追捕，抱著一個籃球，冒死游水十多個鐘頭來港。年紀小小的我問他為什麼來港，他答謂：「想搵好啲生活。」那些年內地生活真係好難，表哥同村的年青人十有九個想偷渡來港，結果有七、八個葬身大海，真正「兩頭唔到岸」，成功登陸的只有一、兩人。偷渡的人沒有錯，拒絕他們的人同樣沒有錯。
香港地少人多，現實地要將絕大部份偷渡客遺返，但留在香港攞到身份證的人，我也祝願他們視香港為家，生活得好一點。至於Betty，佢只係一個後生女，或者講大咗，由佢啦，放條生路佢行。希望佢將來可以做一個好醫生，回饋這個培養她的社會吧。
盧永雄
港鐵公佈高鐵工延誤9個月，原因係「地硬」之餘，仲有「天雨」，黑雨浸壞了鑽挖機。睇完新聞第一個反應就係港鐵「賴天賴地」，之前隱暪不報。政府官員亦都孭鑊，背上「監管不力」的罪責。
事實上，早前已熱傳高鐵工程好大機會因此延誤，但政府以至港鐵一路都唔認。咁遲先至認的副產品係公關災難，高鐵點講延誤因為鑽挖機壞咗所致，運輸房屋局長張炳良話一直相信無事到最近才確認延誤，都唔易令人入信。
去年下半年已經有報章報道高鐵延誤的消息，但講到延誤的原因主要話高鐵總站設計有問題，又指港鐵管理有問題，不斷更改圖則，導致工程延誤云云。
睇落呢啲似承建商放料，講延誤原因未必係咁真。聽聞高鐵延誤的關鍵底因係勞工不足。去年放料俾報章的漏料人唔提勞工不足這個最主要的原因，因為請人是他們的責任，延誤仲要賠俾港鐵，若然話港鐵管理不善，承建商反而可以索償。
知情人士估計，若高鐵要在2015年完工，如今缺乏幾千個勞工咁多，而且缺工在不同階段有不同工種，而家是掘隧道、起車站的工人，到起得七七八八時，又會變成缺裝修工人，好似政府總部接近完工時，單計大型冷氣一級技工，當時就要500人，而呢類大師傅全港只有600人，你睇咁就知下一階段缺裝修工人一樣咁嚴重。承建商由工程師到建築工人都缺，聞說他們和港鐵開會時，就好賴皮咁講，「係請唔到人無辦法架啦」。
港鐵當然有向政府反映缺工人的問題，港鐵最希望好似興建新機場那樣，輸入巨量外勞去完成工程。但在工會反對大量輸入外勞下，政府無力拆呢個缺工的拆彈，就將問題踼入地氈底，亦唔俾港鐵對外大大聲講缺工，因為呢樣嘢政治不正確。
港鐵內部其實慢慢感受到勞工嚴重短缺會令高鐵延期，但又想逼承建商用貴點的方式去興建追番啲時間，結果拖吓拖吓就拖到今天的局面。話番轉頭，政府面對勞工極度短缺的情況，又唔敢去拆彈，係唔係有畏難的問題呢?
盧永雄
