港鐵公佈高鐵工延誤9個月，原因係「地硬」之餘，仲有「天雨」，黑雨浸壞了鑽挖機。睇完新聞第一個反應就係港鐵「賴天賴地」，之前隱暪不報。政府官員亦都孭鑊，背上「監管不力」的罪責。
事實上，早前已熱傳高鐵工程好大機會因此延誤，但政府以至港鐵一路都唔認。咁遲先至認的副產品係公關災難，高鐵點講延誤因為鑽挖機壞咗所致，運輸房屋局長張炳良話一直相信無事到最近才確認延誤，都唔易令人入信。
去年下半年已經有報章報道高鐵延誤的消息，但講到延誤的原因主要話高鐵總站設計有問題，又指港鐵管理有問題，不斷更改圖則，導致工程延誤云云。
睇落呢啲似承建商放料，講延誤原因未必係咁真。聽聞高鐵延誤的關鍵底因係勞工不足。去年放料俾報章的漏料人唔提勞工不足這個最主要的原因，因為請人是他們的責任，延誤仲要賠俾港鐵，若然話港鐵管理不善，承建商反而可以索償。
知情人士估計，若高鐵要在2015年完工，如今缺乏幾千個勞工咁多，而且缺工在不同階段有不同工種，而家是掘隧道、起車站的工人，到起得七七八八時，又會變成缺裝修工人，好似政府總部接近完工時，單計大型冷氣一級技工，當時就要500人，而呢類大師傅全港只有600人，你睇咁就知下一階段缺裝修工人一樣咁嚴重。承建商由工程師到建築工人都缺，聞說他們和港鐵開會時，就好賴皮咁講，「係請唔到人無辦法架啦」。
港鐵當然有向政府反映缺工人的問題，港鐵最希望好似興建新機場那樣，輸入巨量外勞去完成工程。但在工會反對大量輸入外勞下，政府無力拆呢個缺工的拆彈，就將問題踼入地氈底，亦唔俾港鐵對外大大聲講缺工，因為呢樣嘢政治不正確。
港鐵內部其實慢慢感受到勞工嚴重短缺會令高鐵延期，但又想逼承建商用貴點的方式去興建追番啲時間，結果拖吓拖吓就拖到今天的局面。話番轉頭，政府面對勞工極度短缺的情況，又唔敢去拆彈，係唔係有畏難的問題呢?
盧永雄
我昨日講完特首選舉有A、B、C餐，A餐即是全無篩選長毛都可以參選，係泛民至愛。B餐係阿爺有篩選但爭取吓，佢可能放溫和泛民入場，例如出現「CY、林鄭、張炳良」競逐，係妥協方案。C餐係傾唔掂原地踏步照玩選舉委員會選舉，係僵持的死局。
講普選好多人想食無篩選的A餐，但泛民和阿爺各不相讓，隨時拉倒，變咗硬食維持現狀的C餐，照目前睇，出現呢個狀況成數唔低。
相比之下，B餐衰衰地都叫做有得普選，仲有溫和泛民參與。我昨日寫完「CY、林鄭、張炳良」呢個例子之後，好多人打電話俾我，話溫和泛民都唔少，唔止張炳良，其他人都得，例如去過上海的民主黨單仲楷，或者民協馮檢基，都可能係屬於阿爺所講「愛國愛港的泛民」，一樣去選得。我形容好似去茶餐廳食餐咁，叫句：「B餐換意粉唔該」，雖然唔係完全換乜都得，但你食飯、食意粉、甚至食公仔麵，在有限的選擇中可以揀，可以換，問題係有人定咗餐單你接唔接受。
講起民協基哥，佢而家係泛民飯盒會召集人，搞民主30幾年，搵佢選特首亦唔失禮，若然他能夠拉幾票出來支持一個妥協方案，令政改方案可以通過，更可以因推動普選而留名歷史。
不過一講起「拉走幾票」，其實就觸及泛民內部的敏感話題，李柱銘要去美國，其實就係喝住部份想同阿爺講數的泛民，你唔好亂妥協，要企硬，要爭取最純粹的普選，無就不如拉倒，不如上街，逼到有為止。李馬丁對幾年前上次政制檢討時民主黨幾票走咗支持政改方案，特別反感。
有政圈中人形容，這是李柱銘和司徒華的路線鬥爭，李馬丁要企硬，唔完美的東西情願唔要。華叔較現實，有幾多食幾多，食完再爭。當年華叔尚在，民主黨才夠膽妥協。如今華叔一去，馬丁一喝，就要歸隊企硬。
你估泛民企硬阿爺就頂唔順，還是佢會與泛民硬鬥硬？我覺得企硬好難逼到阿爺讓步，反而好大機會係拉倒兼政制原地踏步，泛民同共產黨打交道咁多年，難道咁結局都睇唔到？
盧永雄
