一場為移民好友餞行的飯局，讓一名年過40歲港男驚覺，與移民好友餘生見面的機會可能只剩約10次、20小時，慨嘆「見一次少一次」。帖文引發網民共鳴，有人分享亡友離世前的最後約定，亦有人憶述移民好友一別後再無重逢，直言「下次再見」未必理所當然，呼籲珍惜每次相遇及陪伴，免留下遺憾。
《少年PI的奇幻漂流》。網上圖片
「好好的告別」這句話來自李安導演的電影《少年PI的奇幻漂流》。長大後的少年PI對故事的最後結論是：「我猜人生到頭來就是不斷放下，但永遠最令人痛心的，就是來不及好好道別。」一句簡單的話，道出了主角Pi在經歷船難後心中最深的遺憾。 人是情感的動物，生命中最難平息的，往往不是死亡本身如何，反而是突如其來的無常與接著面臨的悲歡離合。
示意圖片
一名年過40歲的港男近日在網上發文，事主日前以「朋友聚後感」為題發帖，透露近日與一個已經移民外地、回香港探親的朋友食飯，開心地食咗兩個鐘，最後問他：「下次幾時返嚟？」，他笑住話，應該都兩三年後，然後就各自搭車返屋企。
離別後，事主在回程途中算出了殘酷的倒數：「就喺我行去巴士站時，我心諗，我都年過40了，如真係每3年先見佢一次，即係我有生之年，只係見佢多10次8次。」樓主更指出，這「10次8次」的相聚機會，背後 其實需要建立在許多大前提之上：「仲要未計，大家都可以活到某個年紀，約時間時大家都得閒，大家都沒腦退化仲記得對方。」
「10次係咩概念？大約就係20小時。」想到這裏，事主指自己驚覺兩人的相處時間早已進入倒數，感嘆道：「我的餘下人生中，大概就只能同呢個朋友，面對面相處多20小時。然後，就沒有然後了。心一下子涼咗一截。」
《愛回家》劇照。示意圖片
這番令人感慨萬千的感悟勾起不少網民共鳴，有人直言也有過類似的想法：「覺得你好珍惜朋友，我經常都這樣說及想，不過朋友的反應就無我們咁感性，會說咁想點，我經常想有些朋友認識了30年，即是這些經歷再過一次，大家就是老人了。」有網民指嗎，如果將人生的一切都這樣量化，會發現生命就是「減法」，以現時40歲計：「只要你將所有嘢都咁樣量化，就會覺得有種可怕。如果你有80歲命，你只會過多40個新年、聖誕，同屋企人團年嘅機會理論上少過40次，只可以珍惜當下。」
不少網民留言指，這種「見一次少一次」的倒數狀態，其實不僅適用於移民的朋友，甚至連同在香港的親友或父母亦是一樣：「唔好話朋友，有時親戚過年先見一次，我今年 40 佢地都 60，隨時呢世人最多見多十次八次」、「當親戚過咗50，我話有機會就見，一直唔見，就紅事白事先再見」、「其實你同香港識嘅朋友可能連10次8次都見唔到」、「其實每一日我哋都係倒數緊。」
資料圖片
還有網民分享自己與亡友未完的約定，情節催淚：「大學畢業當年，有個朋友同我講，如果餘生大家可以見到50次，即係平均 一年仲見一次，咁樣做到一世朋友都唔錯。個時我聽到都心酸咗一下，心諗50次！？咁少！？」這位網民續稱：「最後，我哋係見咗倒數的第4X次後，就無再見到面了。因為佢已經不在人世。但對於每次見面，在回憶中都係有 Well Spent（好好度過）的，我會記得同佢做過嘅嘢、 講過嘅話。即使當時唔知係倒數緊，但原來真係有好好相聚過。」
