國際臨「記」怯會

最近有人話傳媒界有個新工會，叫「國際臨記怯會」。我零零發孤陋寡聞，完全冇聽過呢個組織，於是請教業界老best，佢即刻笑出聲，話呢個工會咪係由「記怯」演變出嚟囉！

原來「記怯」喺6月要搞執委會換屆選舉，而根據佢哋會章，最少要有五位會員報名參選，但因為唔夠人報名，所以搞唔成。於是而家嘅執委就決定加長提名期三個月，同埋無限期延長自己任期，直至選出新一屆執委。東拼西湊下，「記怯」終於搵到五條友湊夠數參選，喺上星期六就鬼鬼祟祟咁搞咗個所謂選舉，呢五個人就自動當選成為主席同理事囉。

咁究竟呢個小圈子選舉係乜嘢人參加呢？等我零零發同大家介紹吓：

「鄭X如」
成功連任嘅主席，佢自2024年7 月1日開始做「記怯」主席，而當時佢仲喺美角《華X街日報》嘅駐港記者，但上任主席17日，就被美角總公司「炒魷魚」。自此，佢就以「炒散」記者嘅身份，為不同外媒打工，過住手停口停嘅日子。「鄭X如」一向政治掛帥，唔放過任何機會唱衰香港。好似最近，稅局隨機抽樣調查發現「記怯」同幾個網媒欠稅，於是追討欠款，「鄭X如」就即刻跳出嚟話稅局「打壓新聞自由」，完美示範乜嘢叫賊喊捉賊。

「丹尼仔」
英籍「丹尼仔」早排都仲喺《英角廣播公司》做駐港記者，唔知點解喺7月就突然轉咗做「炒散」。佢做《英角廣播公司》果陣，好鍾意訪問「衣冠聰」、「黃痴瘋」呢啲亂港份子，不但幫佢哋宣傳，又不斷美化用暴力、攪亂香港。疫情期間，佢更用經過設計嘅引導性問題，採訪中國尼日利亞商會主席，將廣州嘅防疫措施抹黑成種族歧視，破壞中尼友誼！不過，2024年「丹尼仔」當選「記怯」理事之後就即刻唔撈，唔知玩邊科？今次唔知又會點呢？

「麥X庭」
作為《法角國際廣播電台》香港特約記者嘅「麥X庭」，佢做「記怯」會員多年，期間除咗推動亂港事務，仲有份編寫多本特刊及期刊，發表大量反政府同抹黑香港法治嘅言論。2019年黑暴時期，佢仲同「白頭李」、「李X人」及「衣冠聰」等反中亂港頭目，去美角游說外部勢力插手香港事務。

「包X哲」
呢位80幾歲瑞士籍嘅退休鐘錶工人，自稱喺「炒散」嘅攝記。佢最出名嗰單嘢就係2019年10月，一班暴徒喺中環搞搞震嘅時候，一名不認同暴徒行徑嘅男子諗住入大廈避難時，「包X哲」就故意阻住佢，又閂咗大廈玻璃門，令到嗰名男子被暴徒圍毆，行為認真無恥！

「蘇X揚」
現屆執委之一，淨係知佢喺「蚊型」網媒任職，冇乜料到，唔多人識。
近年「記怯」嘅執委會換屆選舉，已經多次傳出鬧劇。 喺2024年，當時有位同執委理念唔同嘅參選人，喺提名期最後一刻，被無理DQ。跟著又有兩個參選人，喺公布結果前想退選，但因為冇退選機制，被迫當選，之後就嗱嗱臨辭職。2025年嘅選舉，「記怯」除咗唔比傳媒採訪之外，又唔公開當選嘅執委名單。 而選完之後，同樣有一個當選執委之後，即時劈炮唔撈。呢啲彈出彈入，選完又唔撈嘅操作，唔知係為咗夾硬湊夠數搞選舉，定係要「黑箱作業」確保自己友順利當選？到今年，「記怯」更加連幾時搞換屆選舉，有乜參選人都唔公開，仲叫會員唔可以報導……如果唔係老best收到風，都冇人知佢哋搞咗場內定嘅選舉。

除咗選舉黑箱作業之外，「記怯」嘅財務情況都好吊詭。2025年有會員行駛會員權要求查賬，卻遇到諸多限制，於是向職工會登記局查閱「記怯」過去20年嘅帳目。一查之下，發現「記怯」每年平均嘅存款係3-400萬，但係唔知點解，喺2014同2019年竟然會有成900-1000萬嘅存款? 啲錢喺邊度嚟？用咗去邊？

「記怯」多年嚟以工會之名，行亂港之實，佢哋嘅惡行真係幾日都講唔完。「記怯」為咗可以苟延殘喘，就搵一班「炒散」、臭味相投，以亂港為樂嘅nobody出嚟參選，再透過唔知有幾多人投票嘅小圈子選舉，令佢哋成功當選。呢班國際臨「記」，真係可以代表本地業界？

鍾情局●零發發

鍾情局

** 博客文章文責自負,不代表本公司立場 **

一個曾經喺政壇風頭一時無兩，仲做埋時代雜誌封面嘅「黃痴瘋」，而家唔知點呢？

「痴瘋」香港出世，15歲出道，而家29。佢自幼有讀寫障礙，成績一路麻麻，加上骨格精奇，所以講靚仔、講「型」就一啲都唔入流，體育、藝術又好似冇乜天份，但佢心頭高，唔甘心，於是喺讀中學嘅時候，就孖同學仔組織咗「學民思潮」，學人批評政府。

2011年5月，佢哋搵咗「國民教育」呢個議題，屈政府洗學生腦，不過當時呢個idea喺政圈冇太多人關注，直至第二年，「痴瘋」喺「維園論壇」同人激辯之後，「反國教」議題就即刻被炒熱，於是「犯民大教主」、「白頭李」、「生果佬」及其他「犯民」政黨就聯同「學民思潮」，喺同年7、8月搞咗個大型遊行示威，以及喺政府總部門外絕食，成功逼政府取消推行「國民教育」。

「痴瘋」知道自己出咗位，所以喺2014年就用「學生」、「香港未來主人翁」嘅包裝，瞓身去「谷」雙普選，並且提出「學界政改方案」，去吸引眼球同埋爭取市民大眾嘅支持。「痴瘋」喺9月26日就拍住學聯「衣冠聰」，組織學界大罷課、帶頭發表宣言、又號召罷課集會人士衝入政府總部……雖然事敗被警方驅散，但就被戴妖等「佔中三子」趁機騎劫咗個運動，而引發咗之後嘅「非法佔中」。

「天要你滅亡，先要你瘋狂」，呢個定律千載不變！美角當時睇準「痴瘋」想出位嘅虛榮心，以及呢個「學生」人設，於是出錢出力去捧紅呢個「學生領袖」。喺10月嘅「時代雜誌」，就頒個豬肉獎比佢，話係當年25個最具影響力少年之一喎！「痴瘋」成世都未試過咁威，所以佢咪咁「聽話」囉！

「佔中」之後，「痴瘋」解散「學民思潮」，喺2017年又再同「衣冠聰」成立「香港眾志」，主打「香港自決、民主自治、港獨」嘅極端路線。當年6月尾國家領導人訪港期間，佢哋兩度霸佔金紫荊廣場，用黑布包住紫荊花雕塑，又用鐵鏈將自己同雕塑鎖埋一齊，抗議未落實「雙普選」，行為極度出位搶fo。佢付出嘅努力終於喺2018年得到美角國會議員提名「落背耳」和平獎，不過結果就梗係冇佢份啦，但已經令「痴瘋」飄飄然，仲成功收買咗佢個「心」同「奴性」去聽主子話！

喺2019年8月黑暴期間，「痴瘋」曾經同時任美角駐港澳總公司的職員伊X麗 (現任美角港澳總公司話事人) 會面，一個月後又多次外訪，包括去德角同美角，更在時任眾議院議長「背落西」安排下，出席美角國會聽証會，呼籲制裁香港。當時仲係學生哥，只得23歲嘅「痴瘋」，可以咁巴閉同所謂外國政要會面，討論香港嘅時局，即刻覺得不可一世，於是佢返港之後，就「雄心壯志」去參選南區區議會選舉，不過佢嘅港獨理念，又點會符合提名資格呢！

「痴瘋」嘅野心，一早就被「戴妖」同一眾「犯民」睇穿，於是喺2020年7月就招攬佢參與「35+」顛覆國家政權嘅陰謀，最後不但失敗告終，而且更被判監禁4年8個。其實「痴瘋」喺2014-2020年期間，就已經因為多次組織、煽惑、參與未經批准集結或藐視法庭等罪，而被判社會服務令及13.5個月嘅監禁，監倉巳經變成咗佢半個屋企。喺舊年6月就「35+」服刑期間，佢又再因為聯同「衣冠聰」及其他人「串謀勾結外力危害國安」罪而被拘捕，現在正等侯轉介高院審訊，外界估計佢將會認罪。高人話佢呢單嘢性質都幾嚴重㗎，隨時可以被判處10年以上監禁！

「痴瘋」本來2027年初，就會坐完「35+」，但現在又牽涉多一單國安案件，相信佢嘅黃金 10-20年要係喺監倉渡過。正如「柴九」名句: 「人生有幾多個10年」? 「痴瘋」從來都冇打過一份工，冇技能，又冇熟人，而佢父母同細佬，喺2021見勢色唔對，就變賣曬佢嘅資產，走咗去澳州避風頭，所以就算「痴瘋」返出嚟，都唔知點過日子！

「生果報」長年累月宣揚反國家、反政府嘅歪理、荼毒青少年嘅思想；「生果佬」、「白頭李」、「戴妖」等一眾「犯民」敗類，喺呢班年青人細細個就開始「栽培」佢哋，搞到一個又一個去做咗死士，走上不歸路，有遺憾嘅人生！ 而「痴瘋」呢個「棄卒」、「棄子」，就係人版！

鍾情局•零零發